ހުޅުމާލެ ދެވަނަ ފިޔަވަހީގެ ބިމުގައި އިމާރާތްކޮށްފައިވާ ހިޔާ ފްލެޓްތަކުގައި ދިމާވާ ފެންލީކުވުމާއި ފާހާނާ އަދި ބެލްކަނީގެ ސްލޯޕްވުމާއި ފާހާނާގެ ޑްރެއިން ބްލޮކްވުމާއި ކަރަންޓުގެ މައްސަލަތައް ހައްލުކޮށްދޭން މިހާރު އާބަންކޯއިން ފޯރުކޮށްދޭ ހިދުމަތްތައް ދެވޭނީ ޖޫން މަހުގެ ނިޔަލަށް ކަމަށް އެ ކުންފުނިން ބުނެފި އެވެ.
އާބަންކޯއިން މިއަދު ނެރުނު އިއުލާނެއްގައި ވަނީ ހިޔާ ފްލެޓް އެއްބަސްވުމުގައި ވެސް ބުނާ ގޮތުން ފްލެޓާ ހަވާލުވާ ދުވަހުން ފެށިގެން ފްލެޓް ހުންނާނީ ގަންނަ ފަރާތުގެ ފުރިހަމަ ޒިންމާ އާއި ބެލުމުގެ ދަށުގައި ކަމެވެ.
އެހެން ނަމަވެސް, ހިޔާ ސަރަހައްދަކީ ބޮޑު އާބާދީއެއް އެއްފަހަރާ ދިރިއުޅޭން ފެށި ސަރަހައްދަކަށް ވާތީވެ، ފްލެޓްތަކުގައި ދިމާވާ މިފަދަ މައްސަލަތައް ހައްލުކޮށްދިނުމުގެ ގޮތުން ވީހާވެސް ދިގު މުއްދަތަކަށް އެ ހިދުމަތްތައް އާބަންކޯއިން ފޯރުކޮށްދިނުމަށް ނިންމީ ކަމަށް އެ އިއުލާނުގައި ފާހަގަކޮށްފައިވެ އެވެ.
މިހާތަނަށް އާބަންކޯއަށް ހުށަހެޅި އެފަދަ ގިނަ މައްސަލަތައް ހައްލުކޮށްދެމުން ދިޔަ ކަމަށް އެ ކުންފުނިން ބުންޏެވެ. އަދި, މިހާރު އެފަދަ މައްސަލަ ހުށަހެޅޭ މިންވަރު މަދުވެފައިވާތީ، ޖޫން 30 ގެ ފަހުން ފޯރުކޮށްދޭނީ ފަންނީ އެހީއެއް އެކަނި ކަމުގައި އެ އިއުލާނުގައި ބަޔާންކޮށްފައިވެ އެވެ.
"30 ޖޫން 2023 ގެ ފަހުން މި ކޯޕަރޭޝަނުން ބަލަމުން ގެންދާނީ ހިޔާ އިމާރާތުގައި ހިމެނޭ އާންމު ތަންތަނާއި ވަސީލަތްތަކަށް ދިމާވާ މައްސަލަތައް އެކަނި ކަމުގައި ދަންނަވަމެވެ. އަދި ފްލެޓްގެ އެތެރެއަށް ދިމާވާ މައްސަލަތަކުގައި މި ކޯޕަރޭޝަނުން ފޯރުކޮށްދޭނީ ފަންނީ އެހީ އެކަނި ކަމުގައި ދެންނެވީމެވެ."
