ވެރިކަން ކުރާ މާލެ ނޫން ރަށްރަށަށް ފެނާއި ކަރަންޓުގެ ހިދުމަތް ދޭ ދައުލަތުގެ ކުންފުނި ފެނަކަ ކޯޕަރޭޝަންގެ ޕެޓީ ކޭޝް ފައިސާއިން ވައްކަން ކުރި މުވައްޒަފަކު ވަޒީފާއިން ވަކިކޮށް އެ ފައިސާ ދައްކަން އަންގައިފި އެވެ.
ދުވަހުން ދުވަހަށް ކުންފުންޏަށް ބޭނުންވާ ކުދި މުދަލާއި ހިދުމަތް ހޯދުމަށް ބަހައްޓާ ޕެޓީ ކޭޝް ފައިސާއިން 151،182ރ. ވަގަށް ނެގި މައްސަލައެއް ފެންމަތިވީ ފެނަކައިގެ އައްޑޫ ސިޓީ ބްރާންޗުގަ އެވެ.
އެ މައްސަލައިގައި ތުހުމަތު ކުރެވޭ މީހާ ވަނީ އިއްޔެ މަގާމުން ވަކިކޮށްފައިކަން މި ނޫހަށް އެނގިފައިވެ އެވެ. އޭނާއަކީ ޖެނުއަރީ، 2023 އިން ފެށިގެން މާޗް، 2023 އާ ހަމައަށް ކުންފުނީގެ ޕެޓީ ކޭޝް ބެލެހެއްޓި މީހާ އެވެ.
ވައްކަމުގެ ތުހުމަތުވާ މުވައްޒަފަށް ފެނަކައިން އަންގާފައި ވަނީ ކުންފުންޏަށް ނުލިބޭ މުދަލާއި ހިދުމަތަށް ބިލުކޮށް އަމިއްލަ އެކައުންޓަށް ޕެޓީ ކޭޝް ޖަމާ ކުރުމަށްފަހު ފައިސާއަށް ހިޔާނާތްތެރިވެފައިވާކަން ތަހުގީގުން ސާބިތުވާ ކަމަށެވެ.
ފެނަކައިން އެންގީ އެ ކުންފުނިން ގެއްލުނު ފައިސާ ގިނަވެގެން ހަތް ދުވަހުގެ ތެރޭގައި ދެއްކުމަށެވެ.
