ފޭކް ޓެލެގްރަފިކް ޓްރާންސްފާ (ޓީޓީ) ދައްކައިގެން ބޭރު ކުންފުނިތަކުން މުދާ ގަނެ ރާއްޖެ އެތެރެކޮށް ވިޔަފާރިކުރުމުގައި ހަރަކާތްތެރިވަމުން ދިޔަ އިސް މީހަކަށް މަނީ ލޯންޑަރިންގެ ބޮޑެތި ދައުވާތަކެއް އުފުލައި ކްރިމިނަލް ކޯޓަށް ހުށަހަޅައިފި އެވެ.
ލައްކައަކަށް ވުރެ ގިނަ ޑޮލަރުގެ މުއާމަލާތްތައް ކުރުމަށް ފަހު ފައިސާ ދެއްކުމުގައި މަކަރާއި ހިލާތް ހެދުމުގެ އެ މައްސަލާގައި ޖުމުލަ 23 ދައުވާއެއް ދައުލަތުން އުފުލާފައިވަނީ، މއ. ހަނީސަކްލް-1، ހުސައިން ޝިފާއުގެ މައްޗަށެވެ.
ޖިނާއީ މައްސަލަތަކުގައި ދައުލަތް ތަމްސީލްކުރާ ޕްރޮސެކިއުޓާ ޖެނެރަލް (ޕީޖީ) އޮފީހުން ބުނި ގޮތުގައި، ހުސައިން ޝިފާއުގެ "ސްކޭމް" ހިންގަމުން ދިޔައީ އިތުރު މީހަކާ ވެސް ބައިވެރިގެން އިކޮނޮމިކް މިނިސްޓްރީގައި ރަޖިސްޓްރީކޮށްފައިވާ "ކިންގްޑަމް" އޮފް ފުރުޓްސް" ވިޔަފާރި މެދުވެރިކޮށެވެ.
އުމުރުން 37 އަހަރުގެ ހުސައިން ޝިފާއު، ފޭކް ޓީޓީ ދައްކައިގެން ރާއްޖެ އެތެރެކޮށް ވިޔަފާރިކުރަމުން ދިޔައީ މޭވާއާއި ތަކުރާރީ އެވެ.
ހުސައިން ޝިފާއުގެ މައްޗަށް އުފުލާފައިވާ ދައުވާތައް؛
- ގާނޫނުލްއުގޫބާތުގެ ދަށުން، އެނގި ހުރެ ސައްހަ ނޫން ލިޔުމެއް ދިނުމުގެ ކުށުގެ ނުވަ ދައުވާ
- ގާނޫނުލްއުގޫބާތުގެ ދަށުން، މަކަރާއި ހީލަތް ހެދުމުގެ ކުށުގެ ހަތް ދައުވާ
- މަނީ ލޯންޑްރިންގެ ގާނޫނު ދަށުން، މަނީ ލޯންޑްރިންގެ ކުށުގެ ހަތް ދައުވާ
މި ދައުވާތައް ސާބިތުވެއްޖެނަމަ މަދުވެގެން 38 އަހަރުގެ ޖަލު ހުކުމެއް އަންނާނެ ކަމަށް ޕީޖީ އޮފީހުން ބުންޏެވެ.
ޕީޖީ އޮފީހުން މިރޭ ބުނި ގޮތުގައި އެ މައްސަލާގައި ހިމެނޭ ފައިސާގެ ޖުމުލަ އަދަދު 123،844.54 އެމެރިކާ ޑޮލަރަކަށް އަރަ އެވެ. އެއީ 1،909،682 ދިވެހި ރުފިޔާ އެވެ. އެ ފައިސާ ދައުލަތަށް ނެގުމަށް ޕީޖީ އޮފީހުން ކޯޓަށް ހުށަހެޅި މައްސަލާގައި އެދިފައިވެ އެވެ.
