ކުރިއާ ސާވިސްއެއް މެދުވެރިކޮށް ރާއްޖެއަށް އެތެރެކުރަން އުޅުނު އެއް ކިލޯގެ މަސްތުވާތަކެތި ކަސްޓަމްސްއިން އަތުލައިގެންފި އެވެ.
ކަސްޓަމްސްއިން އިއްޔެ ނެރުނު ބަޔާނެއްގައި ބުނެފައިވަނީ މި ތަކެތި އަތުލައިގެންފައިވަނީ މި މަހުގެ 15 ގައި ކުރިއާ ސާވިސް މެދުވެރިކޮށް އިނގިރޭސިވިލާތުން ރާއްޖެއަށް ގެނައި ޕެކޭޖަކުން ކަމަށެވެ.
އެގޮތުން އެ ޕެކޭޖުގައި ޝައްކުކުރެވޭ ބާވަތެއް ހުރުމުން، އެތަކެތި އިތުރަށް ބަލާ ފާސްކުރުމުން، ޕެކޭޖުގެ ތެރޭގައި ހުރި ހަތަރު ޕެކެޓަކުން މަސްތުވާތަކެތީގެ ބާވަތެއް ކަމަށްވާ މެފެޑްރޯން ފެނިފައިވާ ކަމަށެވެ. ކަސްޓަމްސްއިން ބުނެފައިވަނީ މި ޕެކޭޖުން ފެނިފައިވަނީ 1040 ގުރާމުގެ މަސްތުވާތަކެތި ކަމަށާއި އެ ތަކެތީގެ މަގުމަތީ އަގު 1.8 މިލިއަން ރުފިޔާއަށް އަރާނެ ކަމަށް ލަފާކުރެވޭ ކަމަށެވެ.
މި މަސްތުވާތަކެތި ރާއްޖެއަށް ގެނެސްފައިވަނީ ކޮން ކުރިއާ ސާވިސްއެއް މެދުވެރިކޮށް ކަމެއް ކަސްޓަމްސްއިން ހާމަކޮށްފައެއްނުވެ އެވެ.
އެ އިދާރާއިން އިތުރަށް ބުނެފައިވަނީ މި މައްސަލަ އިތުރަށް ތަހުގީގުކުރުމަށް އަތުލައިގަނެވުނު މަސްތުވާތަކެތި ފުލުހުންނާ ހަވާލުކޮށްފައިވާ ކަމަށެވެ.
