ވެމްކޯއިން ފޯރުކޮށްދޭ ބިންލައިނާ (ކޮތަޅު) ހޯލްސޭލް އަދި ރީޓެއިލްކޮށް ރައްޔިތުންނަށް ވިއްކަން ޝައުގުވެރިވާ ވިޔަފާރިތައް ހޯދަން އިއުލާން ކޮށްފި އެވެ.
ވެމްކޯއިން ވަނީ އެކަމަށް ޝައުގުވެރިވާ ވިޔަފާރިތަކުން ފޯމު ހުށަހެޅުމުގެ ފުރުސަތު ހުޅުވާލާފަ އެވެ.
ކުނި މެނޭޖުކުރުމުގެ ގާނޫނުގެ ދަށުން ޕްލާސްޓިކް ކޮތަޅުން ދެ ރުފިޔާގެ ފީއެއް ނަގަން ފެށުމާ ގުޅިގެން ވެމްކޯއިން ފޯރުކޮށްދޭން ޖެހޭ ޕްލާސްޓިކް ޑަސްޓްބިން ކޮތަޅު ބުރާސްފަތި ދުވަހުން ފެށިގެން ވިއްކުމަށް ވެމްކޯއިން ދަނީ ތައްޔާރުވަމުންނެވެ.
ވިޔަފާރިތަކުން ދޫކުރާ ކޮތަޅުން ރުފިޔާ ނަގަން ލާޒިމްވީ ނަމަވެސް، ކުނި މެނޭޖް ކުރުމާ ގުޅޭ އިދާރާ އިން ފޯރުކޮށްދޭ ކޮތަޅުން ފީ ނަގައިގެން ނުވާނެ ކަމަށް ގާނޫނުގައި ބަޔާން ކޮށްފައިވެ އެވެ. އެހެންނަމަވެސް ގާނޫނަކުން އަމަލު ކުރަން ފެށިއިރު ވެސް އެކަން އޮތީ ނުވެ އެވެ.
އެކަމާ ގުޅިގެން އާންމުންގެ ގިނަ ކަންބޮޑުވުންތައް ހުރިއިރު، ވެމްކޯއިން ބުނީ އެޕްރީލް 27، އިން ފެށިގެން ބިންލައިނާ ކޮތަޅު ވިއްކަން އެ ކުންފުނިން ފަށާނެ ކަމަށެވެ. އަދި މި ކޮތަޅުތައް ވެމްކޯ ވޭސްޓް ޓްރާންސްފާ ސްޓޭޝަންތަކުގެ ފްރޮންޓް އޮފީސްތަކުން ލިބެން ހުންނާނެ ކަމަށް ވެސް އެ ކުންފުނިން ބުންޏެވެ.
ވެމްކޯއިން ވަނީ ތިން ސައިޒެއްގެ ކޮތަޅެއް ވިއްކަން ނިންމައިފަ އެވެ. އެއީ 17 އިންޗި، 11 އިންޗީގެ ކޮތަޅާއި 27 އިންޗި 18 އިންޗީގެ ކޮތަޅާއި 48 އިންޗި 36 އިންޗީގެ ކޮތަޅެވެ. މި ކޮތަޅުތަކުގެ ތެރެއިން ނެތިފަނާވެދާ ކުނި ބަންދު ކުރާނީ ފެހިކުލައިގެ ކޮތަޅުގައި ކަމަށާއި އެހެނިގެން ކުނި ބަންދުކުރާނީ ކަޅު ކުލައިގެން ކޮތަޅުގައި ކަމަށް އެ ކުންފުނިން ބުނެ އެވެ.
ކުނި އުކާލުމަށް ހަމައެކަނި މި ކޮތަޅު ބޭނުން ކުރުމަށް އެ ކުންފުނިން އިލްތިމާސްކޮށްފައިވެ އެވެ. އެހެންނަމަވެސް ކޮތަޅު ވިއްކާ އަގު އާންމުކޮށްފައިނުވެ އެވެ.
