އިދިކޮޅު ޕީޕީއެމްގެ ރިޔާސީ ޓިކެޓު މިވަގުތު ޖަލުގައި ހުންނެވި އެ ޕާޓީގެ ލީޑަރު އަބްދުﷲ ޔާމީނަށް ދީފައި އޮއްވައި، އެ ޕާޓީގެ މެމްބަރު އަދި މާލޭގެ މޭޔަރު ރިޔާސީ އިންތިހާބަށް ކެމްޕެއިން ކުރައްވާ ކަމަށް ކުރާ ތުހުމަތުތައް އޭނާ މިއަދު ދޮގު ކުރައްވައިފި އެވެ.
މުއިއްޒަށް ރިޔާސީ ޓިކެޓު ހޯދުމަށް މަސައްކަތް ކުރި މައްސަލައެއް ޕާޓީން ބަލަން ފަށާފައި އޮއްވައި އޭނާ މިއަދު "އަދަދު" އާ ވާހަކަ ދައްކަވަމުން ވިދާޅުވީ އެފަދަ ވާހަކަތައް ބަޔަކު ފަތުރަނީ ޕާޓީ ބައިބައި ކުރުމުގެ މަގްސަދުގައި ކަމަށެވެ.
"ބަޔަކު ރާވައިގެން ބައިބައިކުރަން ދައްކާ ވާހަކަތަަކެއް އެއީ. އަޅުގަނޑުމެންގެ ކެނޑިޑޭޓަކީ ރައީސް ޔާމީނު ހަމަ. އިރާދަކުރެއްވިއްޔާ ރައީސް ޔާމީނަށް އިންތިހާބުގައި ވާދަކުރެވޭނެ،" މުއިއްޒު ވިދާޅުވި އެވެ.
މުއިއްޒަށް ރިޔާސީ ޓިކެޓު ހޯދަން މަސައްކަތް ކުރި ކަމަށް ތުހުމަތުކޮށް ބެލީ މާލޭ ސިޓީ ކައުންސިލް މެމްބަރު އާދަމް ރަމީޒުގެ މައްސަލައެކެވެ. ނަމަވެސް ޕާޓީން މައްސަލަ ބަލަން ފެށި ހިސާބުން އޭނާ ވަނީ ޕީޕީއެމުން ވަކިވެފަ އެވެ. ޕާޓީން ފަހުން ބުނީ ރަމީޒުގެ މައްސަލަ ބަލަން ފެށީ ޔާމީން އަންގަވައިގެން ކަމަށެވެ.
"ރިޔާސީ ކެންޑިޑޭޓުގެ ކެންޑިޑެސީއަށް ހުރަސް އެޅޭ ނުވަތަ އުނިކަން އަންނަ ފަދަ ކަމެއް ރިޔާސީ ކެންޑިޑޭޓަށް އެނގިވަޑައިގެން ހިނގާ ކަމަށްވާ ނަމަ އެކަމާ ދޭތެރޭ އެމަނިކުފާނަށް އޮންނާނެ ފުރިހަމަ އިހުތިޔާރު އެކަމަށް ގޮތެއް ނިންމުމަށް،" ޕީޕީއެމްގެ ޑެޕިއުޓީ ލީޑަރު އަހުމަދު ޝިޔާމް ވިދާޅުވެފައިވެ އެވެ.
ރިޔާސީ އިންތިހާބު ބޭއްވުމަށް ކަނޑައަޅާފައިވާ މުއްދަތު ކައިރިވަމުން އަންނަ އިރު، ޕީޕީއެމްގެ ލީޑަރު އަަދި ކުރީގެ ރައީސް އަބްދުﷲ ޔާމީނު ގެންދަވަނީ އެމަނިކުފާނުގެ މައްޗަށް މިދިޔަ ޑިސެމްބަރުު 25، ވަނަ ދުވަހު ކުރި 11 އަހަރުގެ ޖަލު ހުކުމް ތަންފީޒުކުރައްވަމުންނެވެ.
ގާނޫނު އަސާސީގައި ބަޔާންކޮށްފައިވާ ގޮތުން ރައީސްކަން ކުރުމުގެ އެއް ޝަރުތަކީ ޖިނާއީ ކުށެއް ކުރިކަން ސާބިތުުވެގެން 12 މަސްދުވަހަށް ވުރެ ދިގު މުއްދަތެއްގެ ހުކުމެއް އޮތް ނަމަ، އެ ހުކުމް ތަންފީޒުކޮށް ނިމުނުތާ ނުވަތަ ކަނޑައެޅުނު އަދަބު މައާފުކުރެވުނުތާ ތިން އަހަރު ވެފައިވާ މީހަކަށް ވާން ޖެހެ އެވެ.
