މާލޭ ސިޓީގެ ތާރު އަޅާފައި ހުރި މަގުތަކުގައި ހެދިފައި ހުރި ލޯވަޅުތައް ނުވަތަ ޕޮޓްހޯލްސް ބައްދަން ޗައިނާ ކުންފުންޏަކާ ހަވާލު ކުރީ 1.4 މިލިއަން ރުފިޔާއަށް ކަމަށް އެ ކައުންސިލުން ބުނެފި އެވެ.
"އަދަދު" އިން ކުރި ސުވާލަކަށް ޖަވާބު ދެއްވަމުން މާލޭގެ މޭޔަރު ޑރ. މުހައްމަދު މުއިއްޒު ވިދާޅުވީ ޗައިނާގެ ހުނާން ކޮންސްޓްރަކްޝަން އިންޖިނިއަރިން ގްރޫޕަށް ޖުމްލަ 1,496,800ރ. އަށް ކަމަށެވެ.
މުއިއްޒު އިއްޔެ ސޯޝަލް މީޑިއާގައި ލިޔުއްވާފައި ވަނީ ޗައިނާ ކުންފުންޏާ ހަވާލު ކުރީ މަގުތަކުގައި ހެދިފައި ހުރި 32 ލޯވަޅެއް ބައްދަން ކަމަށެވެ.
މަގުގައި ލޯވަޅު ހެދިފައި ހުރި ހިސާބުތައް: މަސައްކަތް ހަވާލު ކުރީ ހުނާން އިންޖިނިއަރިންއާ -- ފޮޓޯ: ކައުންސިލް
އެ މަސައްކަތް ދިވެހި ކުންފުންޏަކާ ހަވާލު ނުކުރި ސަބަބެއް މުއިއްޒު ވިދާޅެއްނުވެ އެވެ.
މާލޭގައި ހެދިފައި ހުރި ޕޮޓްހޯލްތައް ބައްދަން ޗައިނާ ކުންފުންޏަކާ އަގުބޮޑުކޮށް ހަވާލު ކުރިއިރު ޗައިނާއިން ދާދިފަހުން ވަނީ މާލެ ސިޓީއަށް 3000 މަގުބައްތި ހިލޭ ދީފަ އެވެ. އޭގެ ތެރެއިން ބައެއް ބައްތިތަކަކީ ކެމެރާ އަދި ސެންސަރު ވެސް ހަރުކޮށްފައި ހުންނަ ސްމާޓް ބައްތިތަކެކެވެ.
މާލޭ މޭޔަރު މުއިއްޒާއި ޗައިނާއާ ދެމެދު ގާތް ގުޅުމެއް އޮވެ އެވެ. މުއިއްޒު މާލޭގެ މޭޔަރަށް ހޮވުމުން ޗައިނާގެ އެމްބަސީ ހިންގުމާ އެއިރު ހަވާލުވެ ހުންނެވި ޔޫ ޒުއެންގް ވަނީ މުއިއްޒު ގުޅުއްވައި މަރުހަބާ ވިދާޅުވެ ބައެއް މަޝްވަރާތައް ކުރައްވައިފަ އެވެ.
