ކުނި މެނޭޖުކުރުމުގެ ގާނޫނުގެ ދަށުން ޕްލާސްޓިކް ކޮތަޅުން ދެ ރުފިޔާގެ ފީއެއް ނަގަން ފެށުމާ ގުޅިގެން ވެމްކޯއިން ފޯރުކޮށްދޭން ޖެހޭ ޕްލާސްޓިކް ޑަސްޓްބިން ކޮތަޅު ބުރާސްފަތި ދުވަހުން ފެށިގެން ލިބޭނެ ކަމަށް އެ ކުންފުނިން ބުނެފި އެވެ.
ވިޔަފާރިތަކުން ދޫކުރާ ކޮތަޅުން ރުފިޔާ ނަގަން ލާޒިމްވީ ނަމަވެސް، ކުނި މެނޭޖް ކުރުމާ ގުޅޭ އިދާރާ އިން ފޯރުކޮށްދޭ ކޮތަޅުން ފީ ނަގައިގެން ނުވާނެ ކަމަށް ގާނޫނުގައި ބަޔާން ކޮށްފައިވެ އެވެ. އެހެންނަމަވެސް ގާނޫނަކުން އަމަލު ކުރަން ފެށިއިރު ވެސް އެކަން އޮތީ ނުވެ އެވެ.
މިކަމާ ގުޅިގެން އާންމުންގެ ގިނަ ކަންބޮޑުވުންތައް ހުރިއިރު، ވެމްކޯއިން މިރޭ ނެރުނު ބަޔާނެއްގައި ބުނީ އެޕްރީލް 27 އިން ފެށިގެން ބިންލައިނާ ކޮތަޅު ވިއްކަން އެ ކުންފުނިން ފަށާނެ ކަމަށެވެ. މި ކޮތަޅުތައް ލިބެން ހުންނާނީ ވެމްކޯ ވޭސްޓް ޓްރާންސްފާ ސްޓޭޝަންތަކުގެ ފްރޮންޓް އޮފީސްތަކުންނެވެ.
ވެމްކޯއިން ވަނީ ތިން ސައިޒެއްގެ ކޮތަޅެއް ވިއްކަން ނިންމައިފަ އެވެ. އެއީ 17 އިންޗި، 11 އިންޗީގެ ކޮތަޅާއި 27 އިންޗި 18 އިންޗީގެ ކޮތަޅާއި 48 އިންޗި 36 އިންޗީގެ ކޮތަޅެވެ. މި ކޮތަޅުތަކުގެ ތެރެއިން ނެތިފަނާވެދާ ކުނި ބަންދު ކުރާނީ ފެހިކުލައިގެ ކޮތަޅުގައި ކަމަށާއި އެހެނިގެން ކުނި ބަންދުކުރާނީ ކަޅު ކުލައިގެން ކޮތަޅުގައި ކަމަށް އެ ކުންފުނިން ބުނެ އެވެ.
ކުނި އުކާލުމަށް ހަމައެކަނި މި ކޮތަޅު ބޭނުން ކުރުމަށް އެ ކުންފުނިން އިލްތިމާސްކޮށްފައިވެ އެވެ. އެހެންނަމަވެސް ކޮތަޅު ވިއްކާ އަގު އާންމުކޮށްފައިނުވެ އެވެ.
