އާބަންކޯގެ އިސް ވެރިންތަކަކަށް ފުލެޓުތަކެއް ބަހާފައިވާ ކަމަށް ބުނެ ސޯޝަލް މީޑިއާއާއި ބައެއް ނޫސްތަކުގައި ފަތުރާފައިވާ ހަބަރު އާބަންކޯއިން ދޮގުކޮށްފި އެވެ.
އެ ކޯޕަރޭޝަނުން މިއަދު ނެރުނު ނޫސް ބަޔާނެއްގައި ބުނީ، އެއްވެސް މުވައްޒަފަކަށް ފުލެޓެއް ބަހާފައި ނުވާނެ ކަމަށާއި، ދައުރު ކުރަމުން ގެންދަނީ ސައްހަ ލިސްޓެއް ނޫން ކަމަށެވެ.
އަދި މިދިޔަ ބުރާސްފަތި ދުވަހު، އެ ކޯޕަރޭޝަނުގެ މުވައްޒަފުންނަށް ނެރުނު މެމޯގައި ބަޔާން ކޮށްފައިވާ 34 ހައުސިން ޔުނިޓަކީ އެއީ މިދިޔަ އަހަރު، އޭރުގެ އެޗްޑީސީން ކުރިއަށް ގެންދިޔަ މުވައްޒަފުންނަށް ބޯހިޔާވަހިކަން ކަށަވަރު ކުރުމަށް ހިންގި މަޝްރޫއުގެ ތެރެއިން 'އެންޑު ޔޫސާ ފައިނޭންސް މޮޑެލް' ގެ ދަށުން ވިއްކުމަށް ހުޅުވާލި ފުލެޓުތަކުގެ ތެރެއިން، ފުލެޓުތައް ގަތުމަށް ޝަރުތު ހަމަވި ބައެއް މުވައްޒަފުން ދޫކޮށްލި ފުލެޓުތަކާއި އެއްވެސް މުވައްޒަފަކު ގަތުމަށް ފޯމު ހުށަހަޅާފައި ނުވާ ޔުނިޓުތަކެއް ކަމަށް ވެސް އެ ބަޔާނުގައި ބުނެފައިވެ އެވެ.
އަލުން އެ ޔުނިޓުތައް ވިއްކުމަށް ހުޅުވާލީ އެ ޔުނިޓުތަކަށް ޝަރުތު ހަމަވާ 800 އަށްވުރެ ގިނަ މުވައްޒަފުން މިހާރު ވެސް އާބަންކޯގައި ތިބުމާއި، އެ ކޯޕަރޭޝަނުން ހިންގަން ރާވާފައިވާ މަޝްރޫއުތަކަށާއި ވިޔަފާރި އުސޫލުން ދޫކޮށްފައިވާ ބިންތަކުގެ އަގު ހަމަ ކުރުމުގެ ގޮތުން ކަމަށް އާބަންކޯއިން ބުނެފައިވެ އެވެ.
"2022 ވަނަ އަހަރު ހިންގުނު ސްޓާފް ހައުސިން ސްކީމް ހުޅުވާލިފަހުން އެއް އަހަރު ވެފައިވުމާ އެކު، އެ ސްކީމްގެ ތެރެއިން ފުރުސަތު ނުލިބޭ ތިބިކަން ވަނީ ފާހަގަ ކުރެވިފަ އެވެ. މިހެންކަމުން މި މުވައްޒަފުންނަށް އާ ފުރުސަތެއް ދިނުމާ އެކު މި ކޯޕަރޭޝަނުން ހިންގަން ރާވާފައިވާ މަޝްރޫއުތަކަށާއި ވިޔަފާރި އުސޫލުން ދޫކޮށްފައިވާ އަގު ހަމަކުރަން ބޭނުންވާތީ،" އަލުން އެ ޔުނިޓުތައް ވިއްކުމަށް ހުޅުވާލި ސަބަބު ބަޔާން ކުރަމުން އާބަންކޯއިން ބުނެފައިވެ އެވެ.
ހުޅުމާލޭގައި އަމިއްލަ ފަރާތްތަކުން އިމާރާތް ކުރާ ފުލެޓުތަކުން، ބިމުގެ އަގު ދެއްކުމުގެ ބަދަލުގައި ބައެއް ހައުސިން ޔުނިޓުތައް އަސްލު އަގަށްވުރެ ހެޔޮކޮށް އާބަންކޯއަށް ދޭން ޖެހެއެވެ. އެގޮތުން އަލުން ވިއްކުމަށް ހުޅުވާލާފައި ވަނީ ހުޅުމާލޭގައި އިމާރާތް ކުރި ހަތަރު ފުލެޓެއްގެ ތެރެއިން އާބަންކޯއަށް ލިބިފައިވާ ޔުނިޓުތަކެކެވެ.
އެޗްޑީސީގެ ވެރިންނަށް ފުލެޓުތަކެއް ބަހާލާފައިވާ ކަމަށް ބުނެ މީސްމީޑީއާގައި ދައުރުކުރަމުންދާ ލިސްޓަކީ އަމިއްލައަށް ބަޔަކު ތައްޔާރުކޮށްފައިވާ ލިސްޓެއް ކަމަށާއި އެ ވާހަކަތައް ބައެއް މީޑިއާތަކުން ރިޕޯޓުކޮށްފައި ވަނީ އެ ކޯޕަރޭޝަނުގެ އެއްވެސް ބަހެއް ނުހިމަނައިކަން އާބަންކޯއިން ފާހަކޮށްފައިވެ އެވެ. އަދި އެ ހަބަރު ފަތުރަމުން ގެންދަނީ އެ ކޯޕަރޭޝަނުގެ އަގު ވައްޓާލުމުގެ ގޮތުން ކަމަށް ވެސް އެ ބަޔާނުގައި ބުނެފައިވެ އެވެ.
ހ'ުޅުމާލޭގައި ހިންގޭ މަޝްރޫއުތަކާއި ވަކިން ހާއްސަކޮށް އާންމު ރައްޔިތުންނާ ގުޅިފައި ހުންނަ މިފަދަ މަސައްކަތްތައް ބައްޓަން ކުރެވިފައި ވަނީ ވީހާވެސް ހާމަކަން ބޮޑުކޮށް، ކަނޑައެޅިފައިވާ އުސޫލުތަކާއި ގަވާއިދުތަކުގެ ތެރެއިންނެވެ،" އާބަންކޯގެ ބަޔާނުގައި ބުނެފައިވެ އެވެ.
އިތުރަށް އެ ބަޔާނުގައި ބުނެފައި ވަނީ އެ މަސައްކަތް ގެންދަނީ އާބަންކޯގެ އިންޓާނަލް އޮޑިޓުން ގަވާއިދުން ބަލަމުން ކަމަށާއި، ކަމާބެހޭ އެހެން މުއައްސަސާތަކުން ވެސް އެ މަސައްކަތް ކުރިއަށް ދާގޮތް ބެލުމަށް އެ ކޯޕަރޭޝަނުން ފުރިހަމަ އެއްބާރުލުން ދޭނެ ކަމަށެވެ.
އަދި އާބަންކޯއިން ކުރިއަށް ގެންދާ ހުރިހާ މަޝްރޫއުތަކަކާ ބެހޭ ގޮތުން ވެސް އެއްވެސް އުނި އިތުރުކުރުމެއް ނެތި، މީޑިއާތަކުންނާއި ރައްޔިތުން ކުރާ ސުވާލުތަކަށް ވެސް ޖަވާބު ދޭނެ ކަމަށް އާބަންކޯއިން ބުނެފައިވެ އެވެ.
"އަދި ރައްޔިތުންގެ އެއްވެސް ހައްގަކަށް އުނިކަމެއް އަންނާނެ ފަދަ، އަދި ހައްގެއް ނިގުޅައިގަނެވޭނެ ފަދަ އެއްވެސް އަމަލެއް މި ކޯޕަރޭޝަނުން ނުހިންގާނެ ކަމުގެ ޔަގީންކަން އަރުވަމެވެ،" އެ ބަޔާނުގައި ބުނެފައިވެ އެވެ.
އާބަންކޯއިން މިފަދަ ބަޔާނެއް ނެރެފައި ވާއިރު މީގެ ކުރިން ވެސް އެކި ކަންކަމާ ގުޅިގެން ބައެއް ނޫސްތަކުގައި ހަގީގަތާ ހިލާފު ވާހަކަތައް ރިޕޯޓުކޮށްފައިވެ އެވެ. އޭގެތެރެއިން ބައެއް ފަހަރު އެ ނޫސްތަކުން މައާފަށް ވެސް އެދިފައިވެ އެވެ.
