ރާއްޖެއިން ނައްތާލާފައިވާކަން އިއުލާނުކޮށްފައިވާ މެލޭރިއާގެ ކޭސްއެއް ފެނިފައިވާކަން ހެލްތު ޕްރޮޓެކްޝަން އޭޖެންސީ (އެޗްޕީއޭ) އިން ކަށަވަރުކޮށްދީފި އެވެ.
އެޗްޕީއޭއިން ބުނީ، ރާއްޖެއިން ބޭރުން މެލޭރިއާ ޖެިފައި ތިބި މީހުން ރާއްޖެ އައިސްގެން ޕޮޒިޓިވްވާ ކޭސްތައް ފެންނަ ކަމަށެވެ. އަދި, އޮންނަ އުސޫލުގެ ތެރެއިން އެމީހުންނަށް ފަރުވާ ދިނުމާއި، ސިއްހީ ހިދުމަތްދޭ ތަނާ ގުޅިގެން އެޗްޕީއޭއިން މަސައްކަތް ކުރާ ކަމަށެވެ.
އެޗްޕީއޭއިން އިތުރަށް ބުނީ ރާއްޖެއިން މެލޭރިއާގެ ކޭސްއެއް ފެނިގެން އުޅުނު ނަމަވެސް އެ ބަލި މުޖުތަމައު ތެރޭގައި ފެތުރުމުގެ ފުރުސަތު ނެތް ކަމަށެވެ. މިކަމާ ގުޅޭ އިތުރު ތަފްސީލެއް އެޗްޕީއޭއިން ހާމަކޮށްފައެއް ނުވެ އެވެ.
މެލޭރިއާއަކީ ރާއްޖެއިން ނައްތާލެވިފައިވާ ބައްޔެއް ކަމަށް 2015 ވަނަ އަހަރު ޑަބްލިއު އެޗްއޯއިން ވަނީ ކަނޑައަޅާފަ އެވެ. މެލޭރިއާގެ ކޭސްއެއް ނުފެންނަތާ ތިން އަހަރުވެފައިވާ ގައުމުތަކަށް، އެ ގައުމުން މި ބަލި ނައްތާލެވިފައިވާ ކަމަށް ކަނޑައަޅަން އެދި ޑަބްލިއުއެޗްއޯއަށް ހުށަހެޅޭނެ އެވެ.
މަދިރީގެ ޒަރިއްޔާއިން ޖެހޭ މެލޭރިއާއަށް އުފެއްދި ވެކްސިނަށް ޑަބްލިއުއެޗްއޯއިން ހުއްދަ ދީފައި ވަނީ 2021 ވަނަ އަހަރެވެ. މެލޭރިއާއާ ދެކޮޅަށް ރަނގަަޅު ވެކްސިނެއް އުފައްދަން ސައިންސްވެރިން ވަނީ ގަރުނަކަށް ވުރެ ގިނަ ދުވަސް މަސައްކަަތްކޮށްފަަ އެވެ.
ޑަބްލިއުއެޗްއޯގެ ދުނިޔޭގެ މެލޭރިއާ ރިޕޯޓު 2020 ގައިވާ ގޮތުން މި ބަލީގެ ސަބަބުން އެންމެ ގިނަ ބަޔަކު މަރުވަނީ އެފްރިކާ ގައުމުތަކުގަ އެވެ. އެގޮތުން 2018 ގައި 411،000 މީހުން އަދި 2019 ގައި 409،000 މީހުން މުޅި ދުނިޔެއިން މެލޭރިއާ ޖެހިގެން މަރުވި އެވެ.
މެލޭރިއާ ޖެހިގެން މަރުވާ މީހުންގެ 90 ޕަސެންޓު ނިސްބަތްވަނީ އެފްރިކާ އަށެވެ. އަދި އެފްރިކާގައި ވެސް އެންމެ ގިނައިން މަރުވަނީ ކުޑަކުދިންނެވެ.
