ޔަމަނުގައި ހިނގަމުންދާ ހަނގުރާމަ ނިމުމަކަށް ގެނައުމަށް ސައުދީ އަރަބިއާއިން ކުރަމުންދާ މަސައްކަތްތަކަށް ރާއްޖެއިން ތާއިދުކޮށްފި އެވެ.
ޔަމަނު ހަނގުރާމަ ނިމުމަކަށް ގެނައުމުގެ އިތުރަށް ފުރިހަމަ ސިޔާސީ ހައްލެއް ހޯދުމަށް ވެސް ސައުދީ އަރަބިއާއިން އިސްވެ ދަނީ މަސައްކަތްތަކެއް ކުރަމުންނެވެ.
ފޮރިން މިނިސްޓްރީން މިއަދު ނެރުނު ނޫސް ބަޔާނެއްގައި ވަނީ، ސައުދީ އަރަބިއާއިން ޔަމަނަށް ކަނޑައަޅުއްވާފައި ހުންނަވާ ސަފީރު، މުހައްމަދު އަލް ޖާބިރް އިސްވެ ހުންނަވައި ޔަމަނުގެ ވެރިރަށް ސަންއާާގައި މިމަހު އަށަކުން 13 އަށް ސައުދީގެ ވަފުދުން ބޭއްވި ބައްދަލުވުންތައް ފާހަގަކޮށް އެކަމަށް މަރުހަބާ ކިޔާފަ އެވެ.
ސައުދީ ވަފުދުގެ މިބައްދަލުވުންތަކަކީ ޔަމަނުގައި ހަމަލާ ބަދަލުކުރުން ހުއްޓާލާފައިވާކަން އދ. އިން އިއުލާނު ކުރީއްސުރެ އެ ގައުމުގެ މަސްރަހަށް އައިސްފައިވާ ހެޔޮ ބަދަލުތަކުގެ މައްޗަށް ބިނާކުރެވިގެން ދިޔަ ބައްދަލުވުންތަކެކެވެ.
މިއީ 2021، މާޗް މަހު އިއުލާނުކުރި ސައުދީ އިނީޝިއޭޓިވް އާއި އިންސާނީ އެހީތެރިކަން ފޯރުކޮށްދިނުމަށްޓަކައި ކުރިއަށް ގެންދިޔަ ބައްދަލުވުންތަކެކެވެ.
އޭގެ އިތުރަށް ރާއްޖެއިން ވަނީ ޔަމަނުގައި ތަރައްގީއާއި ފާގަތިކަމާއި ސުލްހައާއި ހަމަޖެހުން ގާއިމުކުރުމަށް ޔަމަނުގެ ރައްޔިތުން ދެކެމުންދާ ހުވަފެންތައް ހަގީގަތަކަށް ހެދުމަށްޓަކައި ކުރެވެމުން އަންނަ މިފަދަ މަސައްކަތްތަކަށް އެއްބާރުލުން ދިނުމަށް ޔަމަނުގެ ގާނޫނީ ސަރުކާރަށާއި ހޫތީންނަށް ގޮވާލާފަ އެވެ.
