މުމްބާއީ (އޭޕްރީލް 17) - އިންޑިއާގެ ލެޖެންޑަރީ ކްރިކެޓް ތަރި، ސަޗިން ޓެންޑުލްކަރުގެ ދަރިފުޅު، އަރްޖުން ޓެންޑުލްކާ، ފުރަތަމަ ފަހަރަށް އިންޑިއާގެ މަޝްހޫރު ފްރެންޗައިސް ލީގު، އިންޑިއަން ޕްރިމިއާ ލީގު (އައިޕީއެލް)ގައި މެޗެއްގައި ކުޅެފި އެވެ.
މުމްބާއީ އިންޑިއަންސް އަށް ކުޅޭ 23 އަހަރުގެ އަރްޖުން ޓެންޑުލްކާގެ ފުރަަތަމަ މެޗަކީ ރޭ ވަންކެޑޭ ސްޓޭޑިއަމްގައި މުމްބާއީ އިން ފަސް ވިކެޓުން ކޮލްކަތާ ނައިޓް ރައިޑާސް ބަލިކުރި މެޗުގަ އެވެ. ވިކެޓެއް ނުނެގި ދެ އޯވަރުގައި އުކި އަރްޖުން އަތުން 17 ލަނޑު ގެއްލުނު ނަމަވެސް މުޅިން އަލަށް މި ލެވަލްގެ މެޗަކަށް ނުކުމެ ދެއްކި ސާބިތުކަމަށް އޭނާގެ ބައްޕަ، ސަޗިން ވަނީ ތައުރީފުކޮށްފަ އެވެ.
"އަރްޖުން، މިއަދު (ރޭ) ތި ވަނީ ކްރިކެޓް ކުުޅުންތެރިއެއްގެ ދަތުރުގައި ވަރަށް މުހިންމު ފެށުމެއް ފަށާފައި. ބައްޕަ އެއްގެ ހައިސިއްޔަތުންނާއި ކްރިކެޓްގެ ލޯބިވެރިއެއްގެ ހައިސިއްޔަތުން އަހަރެން އެދެނީ ކާމިޔާބަށް އަދި ކްރިކެޓުން އިހުތިރާމް ލިބި އެ ވަރުގެ ކުޅުމެއް ދައްކާނެ ކަމަށް ހީކުރަން،" ސޯޝަލް މީޑިއާގައި ޝުއޫރުފާޅުކުރި ސަޗިން، 49، ބުންޏެވެ.
"މި ހިސާބަށް އަންނަން އަރްޖުން ވަރަށް މަސައްކަތް ކޮށްފި، އެދެނީ ތި މަސައްކަތުގައި އިތުރު ކާމިޔާބީތަކެއް ހޯދުން،"
ސަޗިން އާއި އަރްޖުން އަކީ އައިޕީއެލް ތާރީހުގައި ވެސް މި މުބާރާތުގައި ކުޅުނު ފުރަތަމަ ދެބަފައިންނެވެ. ފަސް ފަހަރު އައިޕީއެލް ކާމިޔާބުކުރި މުމްބާއީ އިންޑިއަންސް ޓީމުގައި 2021 ވަނަ އަހަރުން ފެށިގެން އަރްޖުން ހިމެނެމުން އައި ނަމަވެސް މެޗެއް ކުޅެލަން މި ލިބުނީ މި ފަހަރު އެވެ.
ބޭނުންވި ދުވެލީގައި ކެރިއަރުގައި ކުރިއަރައިގެން ނުދިޔަ ނަމަވެސް އަރްޖުން ފަހަކަށް އައިސް އަންނަނީ ކެރިއަރުގައި ރަނގަޅު ކުރިއެރުންތަކެއް ހޯދަމުންނެވެ. އެ ގޮތުން، އިންޑިއާގެ ޑޮމެސްޓިކް ކްރިކެޓުގެ އެންމެ ބޮޑު މުބާރާތް، ރަންޖީ ޓްރޮފީގައި ގޯއާ ޓީމުގައި ހިމެނިގެން ކުޅެމުން މިދިޔަ އަހަރު އަރްޖުން ވަނީ ފާހަގަކޮށްލެވޭ ކުޅުމެއް ދައްކައިފަ އެވެ.
