ރައްޔިތުންގެ މަޖިލީހުގެ މިއަދުގެ ޖަލްސާއަށް ކުޅިވަރާ ބެހޭ ވަޒީރު އަހުމަދު މަހުލޫފަށް ހާޒިރުނުވެވޭތީ ސުވާލުކުރުން ކެންސަލް ކޮށްފި އެވެ.
މިއަދުގެ ޖަލްސާގައި އެޖެންޑާ ކޮށްފައި އޮތީ ތިމަރަފުށީ ދާއިރާގެ މެންބަރު އަބްދުﷲ ރިޔާޒް، ވޭމަންޑޫ ޒުވާނުންގެ މަރުކަޒާ ގުޅޭ ގޮތުން ކުރާ ސުވާލަކާ ގުޅިގެން ވަޒީރު ހާޒިރުކުރުމެވެ.
އެހެންނަމަވެސް ޖަލްސާ ފައްޓަވަމުން ރިޔާސަތުގައި އިންނެވި މަޖިލީހުގެ ރައީސް ވިދާޅުވީ ވަޒީރު ބަލިވެ އުޅުއްވާތީ ވަޑައިގެންނެވެން ނެތް ކަމަށް އަންގާފައިވާ ކަމަށެވެ.
"ވަޒީރު މަޖިލީހަށް ގުޅުއްވީ މިއަދު ހެނދުނު 09:00 ގައި،" ނަޝީދު ވިދާޅުވި އެވެ.
ވަޒީރަކާ ސުވާލު ކުރުމަށް ލިބޭ ފުރުސަތުގައި ސުވާލު ކުރަން އޮތް ވަޒީރަކަށް މިފަދަ ހާލަތެއް މެދުވެރިވެއްޖެ ނަމަ އެ ސުވާލު ކުރުމުގެ ފުރުސަތު މަޖިލިސް ގަވާއިދުން އަލުން ލިބެ އެވެ.
އެހެންނަމަވެސް، އެ ފުރުސަތުގައި ވެސް ވަޒީރު ހާޒިރުނުވެއްޖެ ނަމަ ދެ ވަނަ ފަހަރަށް ފުރުސަތު ލިބޭނޭ ގޮތެއް ގަވައިދުގައި ނޯވެ އެވެ.
