ރައްޔިތުންގެ މަޖިލީހުގެ މީދޫ ދާއިރާގެ މެންބަރު އަހުމަދު ސިޔާމް ނޫސްވެރިންތަކަކަށް ބިރު ދެއްކި މައްސަލައިގައި ކުއްލި މައްސަލައެއް ހުށަހަޅައި ބަހުސް ފަށައިފި އެވެ.
"ސިޔާމާއި ހިލްޓަންގެ މައްސަލަ؛ ރާއްޖެއިން އިންވެސްޓަރުންނަށް ރަތުގެ އިންޒާރެއް" ނަމުގައި "ދައުރު" ނޫހުގައި ޝާއިއު ކުރި ރިޕޯޓަކާ ގުޅިގެން އާޓިކަލް ލިޔުނު ނޫސްވެރިޔާ އަދި އެމްޖޭއޭގެ ސެކްރެޓަރީ ޖެނެރަލް، އަހުމަދު ނާއިފަށާއި އެ ނޫހުގެ އެޑިޓަރަށް ސިޔާމް ގުޅައި ބިރު ދައްކާފައިވާ ކަމަށް ވަނީ ބުނެފަ އެވެ.
އަދި އޭގެ ފަހުން އެ ނޫސްވެރިޔާއަށް ވަނީ މަރުގެ އިންޒާރުގެ މެސެޖުތައް ލިބިފަ އެވެ. ނާއިފާއި ސީނިއާ އެޑިޓަރަށް ފޮނުވި މެސެޖުގައި އެ ދެމީހުންނާ "މަގުމަތިން ދިމާކޮށްލާނެ" ކަމަށާއި "ފުރާނަ ދުއްވާލަން ވެސް ފަސްނުޖެހޭނެ" ކަމަށް ބުނެފައި ވެއެވެ. މި މައްސަލަ މިހާރު ނާއިފް އަދި ދައުރު ނޫހުގެ ފަރާތުން ވަނީ ފުލުހުންނަށް ހުށަހަޅާފަ އެވެ.
މި މައްސަލައިގައި ރައްޔިތުންގެ މަޖިލީހުގެ މެދު ހެންވޭރު ދާއިރާގެ މެންބަރު އަލީ އާޒިމް މިއަދު ހުށަހެޅުއްވި ކުއްލި މައްސަލައިގައި ވަނީ އެ މައްސަލައިގައި ފުރިހަމަ ތަހުގީގެއް ހިންގުމަށް ގޮވައިލައިފަ އެވެ.
"މި ނޫސްވެރިންނަށް މަރުގެ އިންޒާރު ދީފައިވާއިރު، މީގެ ކުރިން ވެސް ނޫސްވެރިންނަށް ދީފައިވާ މަރުގެ އިންޒާރުތަކާއި ނޫސްވެރިން ވަގަށް ނެގުމާއި އަދި ހަމަލާތަކުގެ ފުރިހަމަ ތަހުގީގެއް ހިންގި އިންސާފު ގާއިމް ކޮށްދެވިފައިނުވޭ،" ކުއްލި މައްސަލައިގައި ބުނެފައިވެ އެވެ.
މި މައްސަލައިގައި ފިޔަވަޅު ނޭޅުމަކީ ނޫސްވެރިންނަށް އޮތް ރައްކާތެރިކަން ގެއްލި، ނޫސްވެރިކަމުގެ މިނިވަންކަމުގައި ރާއްޖެ އޮތް ހިސާބަށް ވުރެ އިތުރަށް ފަހަތަށް ގޮސްދާނޭ ކަމެއް ކަމަށް ވެސް ބުނެފައިވެ އެވެ.
ސަރުކާރާ ދެކޮޅު މެންބަރުން މަޖިލީހަށް ހުށަހަޅާ އެހެން ކުއްލި މައްސަލަތަކާ ހިލާފަށް މި މައްސަލަ ވަނީ ބަލައިގަނެ، ބަހުސް ފަށައިފަ އެވެ. މައްސަލަ ބަލައިގަތީ ވޯޓުގައި ބައިވެރިވެވަޑައިގެންނެވި 18 މެންބަރުންގެ ވޯޓުންނެވެ. ނުފެންނަ ކަމަށް އެއް މެންބަރަކު ވޯޓު ދެއްވެވި އެވެ.
