ޑިފެންސް މިނިސްޓަރު މާރިޔާ އަހުމަދު ދީދީ މަޖިލީހަށް ހާޒިރުކުރައްވައި މެންބަރު ކުރެއްވި ގިނަ ސުވާލުތަކަކީ ގާނޫނީ ތަރަހައިން ބޭރު ސުވާލުތަކެއް ކަމަށް އެކަމަނާ ވިދާޅުވެއްޖެ އެވެ.
މަޖިލީހުގެ މިއަދުގެ ޖަލްސާއަށް މާރިޔާ ހާޒިރުކޮށްފައިވަނީ އިންޑިއާއަށް ގޮސް އުޅެނިކޮށް އެ ގައުމުގެ އިމިގްރޭޝަންގެ ބެލުމުގެ ދަށަށް ގެނެސް ޑީޕޯޓުކޮށްލި ޕީޕީއެމްގެ ހުޅުމާލެ ދާއިރާގެ ރައީސް އަބްދުއްސަމަދާ ގުޅޭގޮތުން އަލިމަސް ކާނިވަލުގައި އެމްޑީޕީގެ ރިޔާސީ ޓިކެޓު ހަވާލުކުރުމަށް ބޭއްވި ރަސްމިއްޔާތުގައި އޭނާ ދެއްކެވި ވާހަކަތަކާ ގުޅޭ ގޮތުން ސުވާލު ކުރުމަށެވެ.
ނައިފަރު ދާއިރާގެ މެންބަރު އަހުމަދު ޝިޔާމް ކުރެއްވި ސުވާލުގައި ވަނީ އިންޑިއާ ސިފައިން ރާއްޖޭގައި ތިބުމާ ދެކޮޅު ހަދާ މީހުންނާ މެދު އިހާނެތި ކޮށް ހިތުމަކީ ތާއީދު ކުރާ ކަމެއްތޯ އާއި އަދި ޝަރަފުވެރިކަމާ އެކު ރިޓަޔާވެފައިވާ ބޭފުޅުންނަށް ކުޑައިމީސް ބަސް ބުނުމަށްފަހު މާފަށް އެދެން ޖެހޭނެ ކަމަށް ގަބޫލުކުރައްވާތޯ ސުވާލު ކުރައްވައިފަ އެވެ.
އެ ސުވާލަށް ޖަވާބު ދެއްވަމުން މާރިޔާ ވަނީ ދިފާއީ ވަޒީރުގެ ހައިސިއްޔަތުން ކުރާ ރަސްމީ މަސައްކަތްތައް ގާނޫނުގައިވާ ގޮތަށް ކިޔައިދެއްވައިފަ އެވެ. އަދި، ދިފާއީ ވަޒީރުގެ ހައިސިއްޔަތުން މެންބަރުގެ ސުވާލުގައިވާ ފަދަ އެއްވެސް ކަމެއް ކޮށްފައި ނުވާނެ ކަމަށް ވިދާޅުވި އެވެ.
މެންބަރު ސުވާލު ކުރެއްވީ ދިފާއީ ވަޒީރުގެ ހައިސިއްޔަތުން ކުރި ކަމެއް ކަމުގައި ނޫން ކަމަށާއި އަމިއްލަ ކަމެެއްގައި ސުވާލު ކުރެވޭނީ އެ ކަމަކީ ގާނޫނާ ހިލާފު ކަމެއް ކަމަށް ތުހުމަތު ކުރެވޭ ކަމެއް ނުވަތަ ރައްޔިތަކަށް ގެއްލުމެއް ލިބިދޭ ފަދަ ކަމަކަށް ނުވާނަމަ ކަމުގައި އޭނާ ވިދާޅުވި އެވެ.
"އަޅުގަނޑު ގާނޫނާ ހިލާފު ކަމެއް ކޮށްފައެއް ވެސް ނުވާނެ، ސަރުކާރަށް ނުވަތަ ރައްޔިތުންނަށް ގެއްލުމެއް ލިބިދާނެ ފަދަ އެއްވެސް ކަމެއް ވެސް ކޮށްފައިނުވާނެ، އެހެންކަމުން އިއްޒަތްތެރި މެންބަރުގެ ސުވާލަކީ ގާނޫނު ނަންބަރު 2/2005 ވަޒީރުންނާ ސުވާލު ކުރުމުގެ ގާނޫނުގެ ދަށުން އަޅުގަނޑާ ކުރެވޭނެ ސުވާލެއް ކަމުގައި އަޅުގަނޑު ގަބޫލެއް ނުކުރަން،" މާރިޔާ ވިދާޅުވި އެވެ.
އިތުރު ސުވާލު ކުރުމުގެ ވަގުތުގައި މާވަށު ދާއިރާގެ މެންބަރު މުހައްމަދު ސައީދު ވަނީ ރައީސް އިބްރާހިމް މުހައްމަދު ސޯލިހުގެ މޮޓޯކޭޑު ހުއްޓުވީ ދުރާލާ ރާވައިގެން ކުރި ކަމެއްތޯ އާއި އާންމުކޮށް މުޒާހަރާ ކުރާ މަގަކުން ދަތުރުކުރީ ގަސްދުގައިތޯ ސުވާލު ކުރައްވައިފަ އެވެ.
އެ ސުވާލަށް ވެސް މާރިޔާ ދެއްްވީ ހަމަ އެ ޖަވާބެވެ. އެ ސުވާލަކީ ވަޒީރުންނާ ސުވާލު ކުރުމުގެ ގާނޫނުގެ ތެރެއިން ކުރެވޭނެ ސުވާލެއް ނޫން ކަމަށެވެ.
"ވަޒީރުގެ ރަސްމީ ދައުރުގެ މަސައްކަތްތަކުގެ ތެރޭގައި ހިމެނޭ ކަމެއް ނޫން ރައީސް އިބްރާހިމް މުހައްމަދު ސޯލިހުގެ ރޫޓު ކަނޑައެޅުމަކީ ދިފާއީ ވަޒީރު ކުރާ ކަމެއް ނޫން، އެހެންވީމާ ވަޒީރުންނާ ސުވާލުކުރުމުގެ ގާނޫނުގެ ތަރަހައިގެ ތެރޭގައި ހިމެނޭ ސުވާލެއް ކަމަކަށް ގަބޫލެއް ނުކުރަން،" މާރިޔާ ވިދާޅުވި އެވެ.
މި ދެ މައްސަލައިގައި ވެސް މާރިޔާއަށް ބޮޑެތި ތުހުމަތުތަކާއި ފާޑުކިޔުން އަމާޒުވެފައިވެ އެވެ.
