މާލޭ ދެކުނު ފަރާތު ބޭރު މަގުގައި ސިޓީ ކައުންސިލުން އިންދި ކަދުރު ރުއްތަކުގެ ދޭތެރެއިން ޕާކިން ސްލޮޓުތައް ދޫނުކުރާ ކަމަށް މާލެ ސިޓީގެ މޭޔަރު ޑރ. މުހައްމަދު މުއިއްޒު ވިދާޅުވެއްޖެ އެވެ.
މުއިއްޒު މިހެން ވިދާޅުވީ ކަދުރު ދެ ރުއް ދޭތެރެއިން ޕާކިން ސްލޮޓު ދޫކުރަނީތޯ އާންމު މީހަކު ސޯޝަލް މީޑިއާގައި ކޮށްފައިވާ ޕޯސްޓަކާއި ގުޅިގެން "އަދަދު" އިން ސުވާލުކުރުމުންނެވެ. އެ ޕޯސްޓުކުރި ފަރާތުން ސޯޝަލްމީޑިއާގައި ހިއްސާކުރި ފޮޓޯތަކުން ފެންނަ ގޮތުން ބޭރުމަގުގައި ހުންނަ މެރީ ބްރައުން ރެސްޓޯރަންޓާ ދިމާލުން ސައިކަލު ޕާކު ކުރެވޭނެ ގޮތަށް ރޮނގު ކުރަހާފައި ހުއްޓެވެ.
އެކަމާ ގުޅިގެން މުއިއްޒު ވިދާޅުވީ އެއީ ކުރިން ދުވާރާ ހިސާބަށް ވަރަށް ބޮޑަށް ގޮނޑުވެފައި އޮތް ސަރަހައްދެއް ކަމަށާއި އެ ތަނުގައި ހެދިފައިހުރި ވިނަތަކާއި 'އުކާލާފައި' ހުރި ވެހިކަލްތައް ސިޓީ ކައުންސިލުން ނަގާ ސާފުކުރުމަށްފަހު އެ ތަނުގައި ޕާކް ކުރެވޭނެ ގޮތް ހެދީ އެ ހިސާބުގައި ޕާކިން ޖާގައެއް ނެތުމުން ކަމަށެވެ.
"ގްރައުންޑުކޮށްފަ ހުރި ވެހިކަލްތަކެއް ނަގާފަ(ޕާކިން ޖާގަ ދިނީ)، އެތަނުގައިވެސް އިންނާނީ 6 ސައިކަލު ޕާކްކުރާނެ ޖާގަ، ދެން އެ ހިސާބުގަ އެއްގޮތަކަށްވެސް ނުހުރޭ ވިއްޔަ ޕާކިން އޭރިއާއެއް،" މުއިއްޒު ވިދާޅުވި އެވެ.
މުއިއްޒު އިތުރަށް ވިދާޅުވީ ބޭރު މަގުގައި ދެން އިންދާފައިވާ ހުރި ރުއްތަކުގެ މެދުގައި އާންމުކޮށް މީހުން ޕާކް ކުރަމުންދަނީ ސިޓީ ކައުންސިލުން ހުއްދަދީގެން ނޫން ކަމަށާއި އެއީ ގަވާއިދާ ހިލާފަށް ކުރަމުންދާ ކަމެއް ކަމަށެވެ.
