ސަރުކާރުގެ ބޯހިޔާވަހިކަމުގެ ސިޔާސަތުގެ ދަށުން ހުޅުމާލޭއިން ދޫކޮށްފައިވާ ފްލެޓުތަކަށް ބަރާބަރަށް ކުލި ދައްކައިގެން އުމްރާ ދަތުރެއް ލިބޭ ޕްރޮގްރާމެއް ފަށައިފި އެވެ.
އާބަންކޯ (ކުރީގެ އެޗްޑީސީ) އިން ބުނީ "ޕޭ އެންޑް ވިން" ނަމުގައި ފެށި ޕްރޮގްރާމުގައި، ކުލި ދައްކާ ފަރާތްތަކުގެ މެދުގައި ކޮންމެ ތިން މަހަކުން ގުރުއަތު ނަގައި ހޮވޭ ފަރާތަކަށް އުމްރާ ދަތުރެއް ލިބޭނެ ކަމަށެވެ. މި ޕްރޮގްރާމު ހިންގުމަށް ރާވާފައި ވަނީ އެއް އަހަރަށެވެ.
އެކި ހާލަތްތަކުގެ ސަބަބުން ބައެއް ހައުސިން ޔުނިޓުތަކުގެ ކުލި ބަރާބަރަށް ނުދައްކާކަން ފާހަގަކޮށް އާބަންކޯއިން ބުނީ އެފަދަ ފަރާތްތަކަށް އުމްރާ ދަތުރު ލިބޭ ޕްރޮގްރާމުގައި ބައިވެރިވުމުގެ ފުރުސަތު ފަހިކޮށްދީފައިވާނެ ކަމަށެވެ.
"ޖެހިޖެހިގެން ހަ މަސް ވަންދެން ގަވާއިދުން ކުލި ދައްކައިފި ނަމަ މި ލަކީޑްރޯގައި ބައިވެރިވެވޭނެ އެވެ. މި ކޯޕަރޭޝަންގެ މަގުސަދަކީ ވީހާވެސް ގިނަ ފަރާތްތަކަށް މި ފުރުސަތު ހޯދައިދީ، ގަވާއިދުން ކުލި ދެއްކުމަށް ބާރުއެޅުމެވެ،" އާބަންކޯގެ ބަޔާނުގައި ބުނެފައިވެ އެވެ.
އެކި ސަބަބުތަކާއި ހެދި ފައިސާ ނުދެއްކި ހުރި ފަރާތްތަކަށް ނުދެއްކި ހުރި ޖުމުލަ ކުލި ބަހާލައިގެން ދެއްކޭނެ ފުރުސަތު ވެސް އޮންނާނެ ކަމަށް އެ ކޯޕަރޭޝަނުން ބުނެ އެވެ.
