ތިލަފުށީގެ ބިން ބޮޑުކުރުމުގެ މަޝްރޫއުގެ ދަށުން އެ ރަށުގެ ދެވަނަ ފިޔަވަހީގައި ހިމެނޭ 'އޭރިއާ ސީ' ހިއްކުމުގެ މަސައްކަތް ފަށައިފި އެވެ.
ތިލަފުށި ބަލަހައްޓާ ހައުސިން ޑިވެލޮޕްމަންޓު ކޯޕަރޭޝަން (އެޗްޑީސީ) އިން މިއަދު ބުނީ މިއީ ސިނާއީ ދާއިރާއަށް މިހާރު ކުރިމަތިވެފައިވާ ދަތިތަކަށް ހައްލެއް ހޯދައިދިނުމަށް މި ސަރުކާރުން ކުރަމުން ގެންދާ މަސައްކަތުގެ ތެރެއިން ކުރެވޭ މަސައްކަތެއް ކަމަށެވެ. އަދި މިއީ މިހާރު އޮތް ތިލަފުށި މާސްޓާޕްލޭނާ އެއްގޮތައް ކުރިއަށް ގެންދާ މަޝްރޫއެއް ކަމަށްވެސް އެޗްޑީސީއިން ބުންޏެވެ.
އިއްޔެ މި މަސައްކަތް ފަށާފައިވާއިރު 120 ދުވަހުގެ ތެރޭގައި ނިންމާގޮތަށް އެޗްޑީސީއިން މި މަޝްރޫއުގެ އަމަލީ މަސައްކަތް ހަވާލުކޮށްފައިވަނީ ކެޕިޓަލް މެރިން އެންޑް ސިވިލް ކޮންސްޓްރަކްޝަން ކޮމްޕެނީއާ އެވެ. މި މަޝްރޫއުގެ ދަށުން ޖުމްލަ 20 ހެކްޓަރުގެ ބިން ހިއްކުމަށް ވަނީ ހަމަޖެހިފަ އެވެ.
ތިލަފުށީ ދެވަނަ ފިޔަވަހީގެ ބިން ހިއްކުން ފެށުމާ ގުޅިގެން އެޗްޑީސީއިން އިތުރަށް ބުނެފައިވަނީ އެ ކުންފުނިން އަބަދުވެސް މަސައްކަތް ކުރަމުންދަނީ މާލެ ސަރަހައްދުގައި ދިރިއުޅެމުންދާ ފަރާތްތަކަށް ރައްކާތެރި މާހައުލެއް ގާއިމުކުރުމަށް ކަމަށެވެ.
އެގޮތުން ރާއްޖޭގަ ހުރި ގިނަ ސިނާއަތްތަކަށް ބޭނުންވާނެ އެންމެ ޒަމާނީ އަދި ފުރިހަމަ ވަސީލަތްތައް ގާއިމުކުރުމަކީ އެ ކުންފުނިން ބޮޑު އިސްކަމެއް ދީގެން ކުރަމުންދާ ކަމެއް ކަމަށްވެސް އެޗްޑީސީއިން ވަނީ ބުނެފަ އެވެ.
