މާލެ ސިޓީ ކައުންސިލާއި ފުލުހުންނާ ދެމެދު ހެދުނު ސްޕެޝަލް ކޮންސްޓެބިއުލަރީ ހިދުމަތުގެ އެއްބަސްވުން އުވާލުމަށްފަހު ސިޓީ ކައުންސިލުން މާލެތެރެ ބެލެހެއްޓުމަށް އަލަށް އުފައްދާ މަގުފާރަވެރިންގެ ހިދުމަތައް، އިތުރު 300،000ރ. ހަރަދުވާނެކަމަށް ސިޓީ ކައުންސިލުން ބުނެފި އެވެ.
މާލެ ސިޓީ ކައުންސިލްގެ ހަތަރު ވަނަ ދައުރުގެ 94 ވަނަ ރަސްމީ އާންމު ޖަލްސާގައި ވާހަކަދައްކަވަމުން އެ ކައުންސިލްގެ ސެކެޓްރީ ޖެނެރަލް މުޖުތަބާ ޖަލީލް ވިދާޅުވީ މިހާރު މަގުފާރަވެރިންގެ ގޮތުގައި ސިޓީ ކައުންސިލުން ނަގާފައިވާ 60 މުވައްޒަފުންގެ މުސާރަ އާއި އިނާޔަތްތަކުގެ ގޮތުގައި ޖުމްލަ 675،000ރ. ހަރަދުކުރުން ޖެހޭނެ ކަމަށެވެ.
ނަމަވެސް މާލެއާއި ވިލިމާލޭގެ ހުރިހާ ސަރަހައްދެއް ބެލެހެއްޓުމަށް އިތުރު 20 މުވައްޒަފުން ބޭނުންވާ ކަމަށާއި އެ ފަރާތްތަކުގެ އުޖޫރައާއެކު މަގުފާރަވެރިންނަށް ޖުމްލަ 925،000ރ. ހަރަދުވާނެ ކަމަށްވެސް މުޖުތަބާ ވިދާޅުވި އެވެ.
"މި އަދަދަކީ އަޅުގަނޑުމެންނަށް މިހާރުވެސް މެނޭޖުކުރެވޭނެ އަދަދެއް، އަޅުގަނޑު ކުރިން ދެންނެވިހެން 12 ވަރަށް މިލިއަން އަޅުގަނޑުމެން ސްޕެންޑް މި ކުރަނީ ކްލަބް ގްރާންޓުގެ ތެރެއިން،" މުޖުތަބާ ވިދާޅުވި އެވެ.
ފުލުހުންގެ ކޮންސްޓެބުލަރީ ހިދުމަތަށް މަހަކު ދައްކަން ޖެހުނީ 619،000ރ. އެވެ. އެއީ އަހަރެެއްގެ މައްޗަށް ހަތް މިލިއަނެއްހާ ރުފިޔާ އެވެ. ފުލުހުން ވަނީ މި ހިދުމަތް ދިނުމަށް 40 ކޮންސްޓެބުލަރީން މާލެ ސިޓީ ކައުންސިލަށް ފޯރުކޮށްދީފަ އެވެ.
ސިޓީ ކައުންސިލާއެކު ފުލުހުން ހެދި ކޮންސްޓެބިއުލަރީ ހިދުމަތުގެ އެއްބަސްވުން އުވާލީ ފައިސާގެ މައްސަލައެއް ޖެހިގެންނެވެ. އެގޮތުން އެ ހިދުމަތަށް ދައްކަންޖެހޭ ފައިސާ ސިޓީ ކައުންސިލުން މިހާތަނަށް ދައްކާފައެއް ނުވެ އެވެ.
މިކަމާ ގުޅިގެން މާލެ ސިޓީގެ މޭޔަރު ޑރ. މުހައްމަދު މުއިއްޒު ވިދާޅުވީ، ފުލުހުން އެ ހިދުމަތް ހުއްޓާލީ ކައުންސިލާ އެއްވެސް މަޝްވަރާއެއް ކުރުމެއް ނެތިކަމަށާއި، ފައިސާގެ ކަންކަންވެސް ހައްލުކުރުމަށް ކައުންސިލުން ފުލުހުންގެ އެހީތެރިކަމަށްވެސް އެދުނު ކަމަށެވެ.
"ސަބަބެއް ކަމަށް ބުނެފައި އިންނަނީ އެމީހުންނަށް ދޭން އޮތް ފައިސާ ނުދޭ ވާހަކަ، ދެން އަޅުގަނޑު ބަލައިލި އިރު މި މައްސަލައިގައި އަޅުގަނޑުމެންނާ އެއްވެސް ވަރަކަށް މީޓުކޮށް މަޝްވަރާކުރެވިފައެއް ނެތް، އަޅުގަނޑުމެން އެކަން ހައްލުކުރަން އިސްވެ ހުށަހަޅާފަވެސް އޮންނާނެ،" މޭޔަރު ވިދާޅުވި އެވެ.
މުއިއްޒު އިތުރަށް ވިދާޅުވީ ފައިސާ ދެއްކުމުގެ ކަންތައް ނުވެ އޮތީ، ސިޓީ ކައުންސިލުގެ އެކައުންޓުން ޕޭމަންޓު ހަދާއިރު ފުލުހުންނަކީ ސަރުކާރުގެ އިދާރާއެއް ކަމުން ވަކި އެކައުންޓެއް ހެދުމަށް އިދާރީ ގޮތުން ކުރަންޖެހޭ ކަމެއްގައި ލަސްވެގެން ކަމަށެވެ.
