ޕޮޓަރީ އަދި ސެރަމިކް އާޓް ތައްޔާރުކޮށް، ދަސްކޮށްދޭ ކްލޭ ސްޓޫޑިއޯއެއް ހުޅުމާލޭގައި ހުޅުވައިފި އެވެ.
އެ ސްޓޫޑިއޯ ހުޅުވީ ހުޅުމާލޭގެ ރެއިން ކްރެސްޓް ރެސިޑެންސް އިމާރާތުގެ ގްރައުންޑް ފްލޯގަ އެވެ. އެ ސްޓޫޑިއޯ ރަސްމީކޮށް ހުޅުވައި ދެއްވީ އެޗްޑީސީގެ މެނޭޖިން ޑިރެކްޓަރު އަހުމަދު އާތިފެވެ.
ރޭ ހުޅުވި ކްލޭ ސްޓޫޑިއޯއިން ޕޮޓަރީ އަދި ސެރަމިކް އާޓްގެ ފަންނު ދަސްކޮށްދިނުމަށް ކޯސްތައް ހިންގަ އެވެ. އަދި އެ މަސައްކަތް ތަޖުރިބާކޮށްލަން ބޭނުންވާ ފަރާތްތަކަށް އެ ފުރުސަތުތައް ވެސް ފަހިކޮށްދެ އެވެ.
ކްލޭ ސްޓޫޑިއޯގެ މަސައްކަތްތައް ތަޖުރިބާކޮށްލުމަށްޓަކައި ރައްޓެހިންނާއި އެކުވެރިންނާއެކު ގަޑިތައް ނެގޭނެ އެވެ. އަދި އިންޑިވިޖުއަލް ގަޑިތައް ވެސް ނެގޭނެ އެވެ. މީގެ އިތުރުން ކުޑަކުދިންނަށް ވެސް އެ ފަންނު ދަސްކޮށް ތަޖުރިބާކުރުމުގެ ފުރުސަތު ވެސް އެ ސްޓޫޑިއޯއިން ފަހިކޮށްދެ އެވެ.
އޭގެ އިތުރަށް އެކި ވޯކްޝޮޕްތަކާއި ފަންނުވެރިންގެ ހުނަރު ދައްކުވައިދޭ އެގްޒިބިޝަންތައް ބޭއްވުމަށާއި ފްރީލާންސް އާޓިސްޓުންނަށް ވެސް ކްލޭ ސްޓޫޑިއޯ ބުކްކޮށްގެން ބޭނުންކުރެވޭނެ އެވެ.
ފަންނުވެރި ހުނަރުވެރި ތަޖުރިބާކާރުންތަކެއް ހިންގާ މި ސްޓޫޑިއޯއަކީ ރާއްޖޭގައި ހިންގާ ޕޮޓަރީ އަދި ކްލޭ އާޓްގެ ފުރަތަމަ ސްޓޫޑިއޯ އެވެ.
