ޗައިނާގެ ޔުނާން ޕްރޮވިންސުން މާލެ ސިޓީ ކައުންސިލަށް ހަދިޔާކުރި 'ސްމާޓް ސިޓީ ލައިޓްސް' މާލޭގެ މަގުތަކުގައި ޖެހުން އިފްތިތާހުކޮށްފި އެވެ.
މިއަދު މާލޭގައި ހުންނަ ޗައިނާގެ އެމްބަސީ ކުރިމަތީގައި މިކަމަށް ބޭއްވި ހާއްސަ ހަފުލާއެއްގައި މި މަޝްރޫއު ރަސްމީކޮށް އިފްތިތާހު ކޮށްދެއްވީ މާލެ ސިޓީގެ މޭޔަރު ޑރ. މުހައްމަދު މުއިއްޒު އަދި ރާއްޖޭގައި ހުންނަވާ ޗައިނާގެ ސަފީރު ވެންގް ލިޒިން އެވެ.
މި ހަފުލާއަށްފަހު ނޫސްވެރިންނަށް މައުލޫމާތު ދެއްވަމުން މުއިއްޒު ވިދާޅުވީ މި މަޝްރޫއަކީ މާލެ ސިޓީ ކައުންސިލްގެ މި އަހަރުގެ އެކްޝަން ޕްލޭންގައި ހިމެނޭ ޑިޖިޓަލް މާލެ ސިޓީގެ އަމާޒު ހާސިލް ކުރުމަށް ފެށިގެންދިޔަ މުހިންމު މަޝްރޫއެއް ކަމަށެވެ.
އެގޮތުން މުއިއްޒު ވިދާޅުވީ ސިޓީ ކައުންސިލުން ޗައިނާގެ ސަފީރާ ބައްދަލުކޮށް މި ޕްލޭން ހާސިލްކުރުމަށް ޗައިނާ ސަރުކާރުގެ އެހީއަށް އެދުމުން، މާލެ ސިޓީ އާއި "ސިސްޓާ ސިޓީ" ގެ ގުޅުން މިހާރުވެސް އޮތް ޔުނާން ސިޓީ ޕްރޮވިންސާ އެކު މި މަޝްރޫއު ހިންގުމަށް މަގުފަހިކޮށްދެއްވި ކަމަށެވެ.
"މިއީ ޔުނާން ޕްރޮވިންސުން އަޅުގަނޑުމެންނަށް ދިން ހަދިޔާއެއް، ދެން މިވަގުތު އެބޭފުޅުންގެ ބަޖެޓު ހުރި ގޮތުން ޕައިލެޓް ޕްރޮޖެކްޓެއްގެ ގޮތުގައި ދީފައި މިވަނީ ދިހަ ޕޯލް، އެ ދިހަ ޕޯލް އަޅުގަނޑުމެން ޖަހަން މި ނިންމީ މި (ބޮޑުތަކުރުފާނު މަގުގެ އާޓިފިޝަލް ބީޗު ސަރަހައްދު) މަގުގައި،" މުއިއްޒު ވިދާޅުވި އެވެ.
ޗައިނާއިން ހަދިޔާކުރި ޒަމާނީ މަގުބައްތިއެއް މާލޭގެ މަގެއްގައި ހަރުކޮށްފައި - ފޮޓޯ: މުހައްމަދު ޝާބިން / އަދަދު
އެ 10 ބައްތި އެ ސަރަހައްދުގައި ޖެހުމަށް ނިންމީ އެއީ ގިނަ މީހުން ދަތުރުކުރާ އަދި ގިނަ މީހުންނަށް ފެންނާނެ ސަރަހައްދަކަށް ވާތީ ކަމަށެވެ. އޭގެ އިތުރުން އެތެރޭގެ މަގުތަކުގައި އެ އަދަދުން ލައިޓު ޖެހުން އެކަށީގެން ނުވާކަންވެސް މުއިއްޒު ފާހަގަކުރެއްވި އެވެ.
ޗައިނާގެ ޔުއާން ޕްރޮވިންސުން ހަދިޔާކުރި މި ބައްތިތަކަކީ ޒަމާނީ ގިނަ އާލާތްތައް އެކުލެވޭ ބައްތިތަކެކެވެ. އެގޮތުން ބައްތީގެ އިތުރުން، އަރިމަތީގައި ލެޑު ލައިޓު އަދި ފަހަތުގައި ލެޑު ޑިސްޕްލޭއެއް ހިމެނޭއިރު، ހިލޭ ވައިފައި ދޫކުރެވޭ ރައުޓަރަކާއި ސެކިއުރިޓީ ކެމެރާވެސް މި ބައްތީގައި ހިމެނެ އެވެ.
މުއިއްޒު ވިދާޅުވި ގޮތުގައި އެ ކެމެރާތަކުން ރެކޯޑުކުރެވޭ ފުޓޭޖުތައް މިހާރުވެސް ކައުންސިލުން ބޭނުންކުރަމުންދާ ސިސްޓަމަށް ރައްކާކުރެވޭނެ ކަމަށާއި ފުލުހުން ނުވަތަ ތަހުގީގީ އެހެން އިދާރާއަކުން އެ ފުޓޭޖު ބޭނުންވެއްޖެ ހާލަތެއްގައި އެކަން ކައުންސިލުން ހަމަޖައްސައިދޭނެ ކަމަށެވެ.
