ސަރުކާރުގެ ހިއްސާ އޮންނަ ކުންފުނިތަކާއި ދައުލަތުގެ އިދާރާތަކުން ކުނި ނެގުމަށް މިހާރު ނަގަމުންދާ އަގު ވޭސްޓު މެނޭޖްމެންޓް ކޯޕަރޭޝަން (ވެމްކޯ) އިން ބޮޑުކޮށްފި އެވެ.
ވެމްކޯއިން މިކަން ހާމަކޮށްފައިވަނީ މިއަދު އެ ކުންފުނިން ބޭއްވި ނޫސްވެރިންގެ ބައްދަލުވުމެއްގަ އެވެ. އެގޮތުން އެ ކުންފުނީގެ މެނޭޖިން ޑިރެކްޓަރު ޔޫސުފް ސިރާޖް ވިދާޅުވީ އެ ކުންފުނީގެ އާ ފީ ސްޓްރަކްޗާ ގާއިމުވެގެން ދިޔަ އިރު އަގު ބޮޑުކޮށްފައިވާނީ ހަމައެކަނި ސަރުކާރުގެ ކުންފުނިތަކާއި ދައުލަތުގެ އިދާރާތަކަށް ދޭ ހިދުމަތުން ކަމަށެވެ.
މީގެ އިތުރުން ސިރާޖް ވިދާޅުވީ އާ ސްޓްރަކްޗާގެ ދަށުން ގޭބިސީތަކުން އަދި އަމިއްލަ ވިޔަފާރިތަކުން ނަގާ އަގަށް ބަދަލެއް ނާންނާނެ ކަމަށެވެ. އަދި ޕިކަޕް ސާވިސް އިން ނަގާ އަގަށްވެސް ބަދަލެއް ނާންނާނެ ކަމަށް އޭނާ ވިދާޅުވި އެވެ.
"ބައެއް ބަދަލު ގެނެވިފައި މިވަނީ ދައުލަތުގެ އިދާރާތަކާއި ސަރުކާރު ހިއްސާވާ ކުންފުނިތަކަށް، އެގޮތުން އިދާރާތަކަށް އަލަށް ކަނޑައެޅި ރޭޓަކީ 1.25ރ، ކުންފުނިތަކަށް ކަނޑައެޅި ރޭޓަކީ ކިލޯއަކަށް 2.25ރ، އޭގެ އިތުރުން އަމިއްލަ ފަރާތްތަކުން ޓްރާންސްފާ ސްޓޭޝަންތަކަށް ގެންނަ ކުންޏަށް އަލަށް ކަނޑައެޅުނު ރޭޓަކީ 1.06ރ،" ސިރާޖް ވިދާޅުވި އެވެ.
މީގެއިތުރުން މި ސްޓަރްކްޗާ އާއެކު އަންނަ އެޕްރީލް މަހުން ފެށިގެން ވެމްކޯއަށް ދައްކަންޖެހޭ މަހު ފީ ކަރަންޓު ބިލާ އެއްކޮށްލެވޭނެ ކަމަށްވެސް ސިރާޖް ވިދާޅުވި އެވެ. މިގޮތަށް ބިލް އެއްްކޮށްލުމުން މާލެ ސަރަހައްދުގެ ގޭބިސީތަކުން މަހަކު ކުނި ބިލުގެ ގޮތުގައި 7.5 މިލިއަން ރުފިޔާ ލިބޭނެ ކަމަށްވެސް ސިރާޖް ވިދާޅުވި އެވެ.
ކުނި މެނޭޖު ކުރުމުގެ މައްސަލައަށް ދާއިމީ ހައްލެއް ހޯދުމުގެ މަގުސަދުގައި ވެމްކޯ އުފެއްދީ މީގެ ހަތް އަހަރު ކުރިން އޭރުގެ ސަރުކާރުންނެވެ. އޭރު ބިލުތަކުގެ އޮނިގަނޑު އެކުލަވާލާފައި އޮތް ގޮތުންނާއި އެ ކުންފުނީގައި ގޭބިސީތައް ރެޖިސްޓާ ކުރުމަށް އެއްވެސް މަޖުބޫރު ކަމެއް ނެތުމުގެ ސަބަބުން މިއަދާ ހަމައަށް ވެސް އެ ކުންފުނީގައި ރެޖިސްޓާ ކޮށްފައި ވަނީ މާލޭގެ ގެބިސީތަކުގެ ގާތްގަނޑަކަށް 35 އިންސައްތަ އެވެ.
އެހެންނަމަވެސް ވެމްކޯގައި ރެޖިސްޓާ ނުކުރާ ގޭބިސީތަކުން އުފައްދާ ކުނި ވެސް އެ ގޭގެއިން މަގުމައްޗަށް ނެރެ އެވެ. މަލޭގެ އާބާދީގެ މަދު ބަޔަކު ފިޔަވައި ގިނަ ގޭބިސީތަކުން މިއަދާ ހަމައަށް ވެސް ކުނި އުކަމުން ދަނީ އެއްވެސް ފައިސާއެއް ނުދައްކަ އެވެ.
އެ މައްސަލައަށް ހައްލެއް ހޯދުމަށްޓަކައި ކަރަންޓު ބިލާއި ވެމްކޯގެ ބިލު އެއްކޮށްލުމުގެ މަސައްކަތް ކުރަމުންދާ ކަމަށް އެންވަރަމަންޓު މިނިސްޓަރު އާމިނަތު ޝައުނާ ވިދާޅުވީ މިދިޔަ ޑިސެމްބަރު މަހު އެވެ.
އެ މަސައްކަތް މިހާރު ނިމުމަކާ ހަމައަށް ގޮސްފައިވާއިރު، އެ ދެ ބިލު އެއްކޮށްލުމުން ރަނގަޅު ނަތީޖާއެއް ފެންނާނެ ކަމަށް ވެމްކޯއިން ބުނެ އެވެ.
