ތިލަފުއްޓާއި ގުޅީފަޅުގެ ފަޅުތެރެއަށް ދޫކޮށްލާފައި ހުރި އުޅަނދުތަކާއި ތަކެތި އެތަނުން ނެގުމަށް އަމަލުކުރާނެ އުސޫލެއް ހައުސިން ޑިވެލޮޕްމަންޓު ކޯޕަރޭޝަން (އެޗްޑީސީ)އިން އިއުލާންކޮށްފި އެވެ.
އެޗްޑީސީއިން ބުނި ގޮތުގައި މި އުސޫލުގެ ބޭނުމަކީ އެ ދެ ރަށުގެ ފަޅުގެ ސަރަހައްދުގައި އުސޫލެއް ނެތި ދޫކޮށްލާފައި ހުރި ތަކެއްޗާއި އުޅަނދުތަކުގެ ސަބަބުން ދެ ރަށް ތަރައްގީކުރުމަށް އެކުލަވާލެވިފައިވާ މާސްޓާ ޕްލޭނަށް ހުރަސް އެޅުމުގެ އިތުރުން އެ ތަކެތީގެ ސަބަބުން އެ ސަރަހައްދުގެ ތިމާވެއްޓަށް ކުރަމުންދާ ނޭދެވޭ އަސަރުތައް ކުޑަކުރުމެވެ.
މި އުސޫލުގެ ދަށުން ގުޅީފަޅާއި ތިލަފުށީގެ ފަޅުގެ ސަރަހައްދުގެ ގޮތުގައި ބަލާނީ އެ ދެ ރަށުގެ ސަރަހައްދުގެ ތެރޭގައި ހިމެނޭ، ވިލުތަކާއި ގިރިތައް ހިމެނޭހެން ކަނޑާއި ގުޅިފައިވާ ކަނޑު ކަމުގައި ނުބެލެވޭ ސަރަހައްދުތަކެވެ.
އެޗްޑީސީއިން އިތުރަށް ބުނެފައިވާ ގޮތުގައި ފަޅުތެރެއަށް ދޫކޮށްލާފައިވާ އުޅަނދު ނޫނީ ތަކެތި ކަމުގައި ބެލޭނީ އެ އެއްޗެއް ހުރި ނުވަތަ އޮތް ހާލަތައް ބެލުމަށްފަހު އޭގެ ސަބަބުން އެ ސަރަހައްދު ބޭނުންކުރާ ފަރާތްތަކަށް ނުވަތަ ހިންގާ މަޝްރޫއަކަށް ދަތިވާނަމަ ނުވަތަ އެ އެއްޗެއްގެ ސަބަބުން އެ ސަރަހައްދުގެ ތިމާވެއްޓަށް ގެއްލުންވާނަމަ އެވެ.
އަދި، ހުންނަންޖެހޭ ގޮތް ނޫނީ ބާއްވަންޖެހޭގޮތް ނޫން އެހެން ގޮތަކަށް ފަޅުތެރޭގައި ދޫވެފައި ހުންނަ ނުވަތަ ފަޅުތެރެއަށް ފެތިފައި ހުންނަ ތަކެތިވެސް މި އުސޫލުގެ ދަށުން ފަޅުތެރެއަށް ދޫވެފައިވާ އެއްޗެހި ކަމަށް ބެލެވޭނެ އެވެ.
އުސޫލުގައި ބުނެފައިވާގޮތުން ދޫކޮށްލެވިފައިވާ އެއްޗެއް ކަމަށް ކަނޑައެޅުމަށްފަހުވެސް ވަކި މުއްދަތަކަށް އެ އެއްޗެއް އެތަނެއްގައި ބޭއްވުމަށް އެޗްޑީސީއިން ހުއްދަ ދެވޭނެ ކަމަށެވެ.
އުސޫލުގައި އިތުރަށް ބުނެފައިވަނީ، ހުއްދަ ނުހޯދާ ތަކެތި އެތަނުން ނެގުމަށް، ތަކެތި އޮތް ހާލަތަށް ބަލާ ހަތް ދުވަހާއި 30 ދުވަހާ ދެމެދުގެ މުއްދަތެއް ދެވޭނެ ކަމަށާއި ވެރިފަރާތެއް ނޭނގޭ އެއްޗެހީގެ ވެރިއެއް ހޯދުމަށްވެސް 30 ދުވަހުގެ އިއުލާނެއް ކުރެވޭނެ ކަމަށެވެ.
މި މުއްދަގައި ނުނަގާ އަދި ވެރިފަރާތެއް ނުނަގާ ތަކެތި އެ ތަނުން ނަގައި، ނައްތާލުމުގެ ނުވަތަ ބީލަމުގައި ވިއްކާލުމުގެ ބާރު މި އުސޫލުގެ ދަށުން އެޗްޑީސީއަށް ވަނީ ލިބިދީފަ އެވެ. އަދި، މިހެން ނައްތާލެވޭ ނުވަތަ ވިއްކާލެވޭ ކޮންމެ އެއްޗަކާމެދު ކަންކުރި ގޮތުގެ ތަފުސީލީ ރިޕޯޓެއް އެޗްޑީސީއިން ތައްޔާރުކުރަން ޖެހޭނެ ކަމަށްވެސް އުސޫލުގައި ބުނެފައިވެ އެވެ.
