ކުނި އުކުމަށް މާލޭގެ ގިނަ ގޭބީސީތަކުން ފައިސާ ނުދައްކާތީ ވޭސްޓް މެނޭޖްމަންޓް ކޯޕަރޭޝަނަށް ދައްކަންޖެހޭ ފީ ކަރަންޓުގައި ބިލުގައި ހިމަނައިގެން ނެގުމަށް ތިމާވެއްޓާ ބެހޭ މިނިސްޓްރީން މިއަދު ނިންމައިފި އެވެ.
އެ މިނިސްޓްރީން މިއަދު ނެރުނު ބަޔާނެއްގައި ބުނީ މާލޭގައި 53,690 ގޭބީސީ ހުންނައިރު ފީ ދައްކަނީ އެންމެ 20،000 ގޭބީސީން ކަމަށެވެ. އެހެންކަމުން ކުނި އުކުމުގެ ފީ 63 ޕަސެންޓުން ގޭބީސީން ނުދައްކަ އެވެ.
"އެހެންކަމުން ދެމެހެއްޓެނިވި ގޮތެއްގައި މި ހިދުމަތްދިނުމަށާއި ކުނި މެނޭޖްކުރުމަށް މި ގެނެވޭ ބޮޑެތި ބަދަލުތަކުގެ ހަރަދު ބެލެހެއްޓޭނީ ހިދުމަތް ހޯއްދަވާ ހުރިހާ ފަރާތަކުންވެސް ވެމްކޯއަށް ފީ ދައްކަވައިގެންކަމުގައިވާތީވެ، އެންމެ ފަސޭހައިން، ހަރަދުކުޑަކޮށް މި ފީ ލިބިގަނެވޭނެ ގޮތަކީ އާންމު ބޭނުންތަކުގެ އެހެން ހިދުމަތެއްގެ ބިލުގައި ހިމަނާއިގެން ފީ ކަލެކްޓްކުރުން،" ތިމާވެއްޓާ ބެހޭ މިނިސްޓްރީގެ ބަޔާނުގައިވެ އެވެ.
ތިމާވެއްޓާ ބެހޭ މިނިސްޓްރީން ބުނެފައި ވަނީ ވެމްކޯގެ ފީ އާންމު ހިދުމަތް ދޭ އެހެން ތަނެއްގެ ބިލުގައި ހިމަނައިގެން ނެގުން ގާނޫނުން ހުއްދަ ދޭ ކަމަށެވެ.
"އެހެންކަމުން ވެމްކޯއިން މާލެ ސަރަހައްދުގައި ދެމުންދާ ހިދުމަތްތަކަށް ކަނޑައަޅަފައިވާ ފީ ސްޓޭޓް އިލެކްޓްރިކް ކޮމްޕެނީ ލިމިޓެޑް (ސްޓެލްކޯ) ގެ ބިލުގައި ހިމަނައިގެން ނެގުމަށް ވަނީ މިހާރު ނިންމާފަ،" އެ ބަޔާނުގައިވެ އެވެ. "ވީމާ، ވެމްކޯ އިން މާލެ ސަރަހައްދުގައި ދެމުންގެންދާ ކުނި މެނޭޖްކުރުމުގެ ހިދުމަތްތަކަށް ކަނޑައަޅާފައިވާ ފީ ސްޓެލްކޯގެ ބިލުގައި ހިމަނައިގެން 1 އޭޕްރީލް 2023 އިންފެށިގެން ނެގުމަށް ވެމްކޯއަށް ހުއްދަ ދީފައިވާތީ އެކަން އެއްމެހާ ފަރާތްތަކުގެ ސަމާލުކަމަށް ގެނައުމަށްޓަކައި ދެންނެވީން."
ވެމްކޯއަށް ދައްކަންޖެހޭ ފީ ކަރަންޓު ބިލުގައި ހިމެނުމަށް ގަސްދުކުރައްވާ ކަމަށް ތިމާވެއްޓާ ބެހޭ މިނިސްޓަރު އައިމިނަތު ޝައުނާ މީގެ ކުރިން ވެސް ވަނީ ވިދާޅުވެފަ އެވެ. މިނިސްޓަރު ވިދާޅުވީ ކުނި އުކުމަށް ދައްކަންޖެހޭ ފައިސާ ސްޓެލްކޯގެ ބިލުގައި ހިމަނަނީ އެއީ އެންމެ ބަރާބަރަށް ގިނަ ބަޔަކު ދައްކަމުން އަންނަ ބިލު ކަމަށްވާތީ ކަމަށެވެ.
