ފުވައްމުލަކުގެ އިހްތިސާސްގެ ތެރޭގައި ޑައިވް ކުރާނަމަ، ފީއެއް ނެގުމުގެ ވިސްނުން ގެންގުޅޭ ކަމަށް ފުވައްމުލަކު ސިޓީ ކައުންސިލުން ބުނެފި އެވެ.
ފުވައްމުލައް ސިޓީގެ މޭޔަރު އިސްމާއިލް ރަފީގު "އަދަދު" އަށް ވިދާޅުވީ، ކައުންސިލުގެ ވިސްނުން ހުރީ ރަށުގެ އިހްތިސާސްގެ ތެރޭގައި ޑައިވް ކުރާނަމަ ފީއެއް ނެގުން ކަމަށާއި، އެކަމަކު ބަޔޮސްފިއާ ރިޒާވްގައި ޑައިވްކުރާނަމަ ފީއެއް ނެގެން ނެތް ކަމަށެވެ.
ފުވައްމުލަކު ބަޔޮސްފިއާ ރިޒާވުގެ ގޮތުގައި ރަށުގެ ބޮޑުބައެއް ހިމެނޭއިރު އެއީ ޗަކަބިން ސަރަހައްދުތަކާއި، ކަނޑުގެ ވަކި ސަރަހައްދެއް ވެސް ހިމެނޭ ގޮތަށެވެ. ބަޔޮސްފިއާ ރިޒާވްގެ ގޮތުގައި ހިމެނޭ ފުވައްމުލަކު ނޭޗާ ޕާކުން މިހާރުވެސް ދަނީ ވަކި ވަރެއްގެ ފީއެއް ނަގަމުންނެވެ.
"ޑައިވިން އަށް ބަލާއިރު، ރަށުގެ ގިނައިން ޑައިވް ކުރާ ސަރަހައްދަކީ ބަޔޮސްފިއާ ރިޒާވުގެ ޕްރޮޓެކްޓެޑް އޭރިއާއެއް ނޫން. އެއީ ބަނދަރު ކުރިމަތީގައި އޮންނަ ސަރަހައްދު. އެހެންކަމުން ބަޔޮސްފިއާ ރިޒާވް ބޭނުންކުރާތީއޭ ކިޔާފަ ފީއެއް ނެގޭކަށް ނެތް،" މޭޔަރު ވިދާޅުވި އެވެ.
ބަޔޮސްފިއާ ރިޒާވު ބޭނުންކުރާނަމަ ޑައިވަރުންގެ އަތުން ފީއެއް ނެގެން ނެތް ނަމަވެސް، ކައުންސިލުން ޑައިވް ސްކޫލުތަކާ މަޝްވަރާކުރުމަށްފަހު ރަށުގެ ވަށައިގެން ޑައިވް ކުރާނަމަ ފީއެއް ނަގަން ވާހަކަ ދެކެވޭ ކަމަށް އޭނާ ވިދާޅުވި އެވެ.
ރަފީގު އިތުރަށް ވިދާޅުވީ އުއްމީދަކީ އެކަމާ ގުޅޭ އުސޫލެއް ހެދުމަށްފަހު އަންނަ ސީޒަނުގައި ފީ ނަގަން ފެށުން ކަމަށެވެ.
އެގޮތުން، މޭޔަރު ވިދާޅުވި ގޮތުގައި އަންނަ ސީޒަން ފެށުމުގެ ކުރިން އުސޫލު އާންމު ކުރާނެ އެވެ. އަދި އެކަން ކުރިއަށް ދަނީ ޑައިވް ސްކޫލުތަކާއި، ސްޓޭކްހޯލްޑަރުންނާ ވަރަށް ބޮޑަށް ވާހަކަދެކެވިގެން ކަމަށެވެ.
"ރަށުގެ އިހުތިސާސްގެ ތެރޭގައި ޑައިވް ކުރާނަމަ ފީއެއް ނެގިގެން ދާނެ. ރަށުގެ އިންހައުސް ގެސްޓުން ވިޔަސް، ސަފާރީގައި އަންނަ ބަޔަކަށް ވިޔަސް ޑައިވް ކުރާނަމަ ފީއެއް ނަގާނެ،" މޭޔަރު ވިދާޅުވި އެވެ.
ރާއްޖޭގެ އުތުރުގައި ބަޔޮސްފިއާ ރިޒާވެއްގެ ގޮތުގައި ކަނޑައަޅާފައި އޮންނަ "ހަނިފަރު ބޭ" އަށް ޑައިވް ކުރާނަމަ އެކަމަށް ފީއެއް ނަގަ އެވެ.
އެގޮތުން، ބ. އަތޮޅު ބަޔޮސްފިއާ ރިޒާވްގައި އަހަރީ ފީއެއް ނެގުމުގެ އިތުރަށް ހަނިފަރަށް ޒިޔާރަތްކުރާ ކޮންމެ ފަހަރަކު ބޮލަކަށް ވެސް ވަކި ފީއެއް ނަގަ އެވެ. މެއި މަހާއި ނޮވެމްބަރު މަހާ ދެމެދު ހަނިފަރަށް ޒިޔާރަތްކުރާނަމަ ނަގަނީ 310ރ. އެވެ. އަދި ޑިސެމްބަރުން އޭޕްރީލްއާ ދެމެދު އެ ސަރަހައްދަށް ޒިޔާރަތްކުރާނަމަ ނަގަނީ 155ރ. އެވެ.
