ވިލިމާލޭގައި ބަގީގެ ހިދުމަތް މި މަހުގެ 16 ގައި ފަށާނެ ކަމަށާއި، ރޯދަ މަހުން ފެށިގެން ފިތުރު އީދު ނިމެންދެން ބަގީގެ އާންމު ދަތުރުތައް ހިލޭ ކުރާނެ ކަމަށް މާލޭ ސިޓީގެ މޭޔަރު ޑރ. މުހައްމަދު މުއިއްޒު ވިދާޅުވެއްޖެ އެވެ.
ސިޓީ ކައުންސިލުން ބަގީގެ ހިދުމަތް ދިނުމަށް އިލެކްޓްރިކް 10 ބަގީ ވަނީ ގެނެސްފަ އެވެ. އަގުތައް ކަނޑަޅާފައިވާއިރު، އާންމު ރޫޓުން ކުރާ ކޮންމެ ދަތުރަކަށް ނަގާނީ 2 ރުފިޔާގެ ފީއެކެވެ. ނަމަވެސް، ރޯދަ މަހުން ފެށިގެން ފިތުރު އީދު ނިމެންދެން އެ ދަތުރުތައް ހިލޭ ކުރެވޭނެ އެވެ.
މާލޭ މޭޔަރު ޑރ. މުހައްމަދު މުއިއްޒު ކުރެއްވި ޓްވީޓުގައި ވިދާޅުވީ ރޯދަ މަހު ބަގީގެ އާންމު ދަތުރުތައް ހިލޭކުރި ނަމަވެސް، ކުލީ ދަތުރުތަކަށް އަގު ނަގާނެ ކަމަށެވެ.
އަމިއްލަ ދަތުރުތަކުގެ އަގުތައް
- 4 ސީޓްގެ ބަގީއަކަށް 6 ރުފިޔާ
- 6 ސީޓްގެ ބަގީއަކަށް 10 ރުފިޔާ
- 12 ސީޓްގެ ބަގީއަކަށް 15 ރުފިޔާ
ފިތުރު އީދަށް ފަހު ވެސް، 6 އަހަރުން ދަށުގެ ކުޑަކުދިންނާއި 65 އަހަރުން މަތީގެ މީހުންނާއި އެންސްޕާގައި ރެޖިސްޓަ ވެފައިވާ ނުކުޅެދުންތެރިކަން ހުންނަ ފަރާތްތަކާއި ސްކޫލް ޔުނިފޯމްގައި ދަތުރުކުރާ ދަރިވަރުންނަށް ބަގީގައި ހިލޭ ދަތުރުކުރެވޭނެ ކަމަށް ސިޓީ ކައުންސިލުން ބުންޏެވެ.
ސިޓީ ކައުންސިލުން ބަގީގެ ހިދުމަތް ފަށާއިރު، އެމްޓީސީސީން ވަނީ އެ އަވަށުގައި މިނީ ބަހުގެ ހިދުމަތް ފަށައިފަ އެވެ. މިކަމާއި ގުޅިގެން މޭޔަރު މުއިއްޒު މީގެ ކުރިން ވަނީ އެމްޓީސީސީއަށް ވަރަށް ބޮޑަށް ފާޑުކިޔުއްވާފަ އެވެ.
"ކައުންސިލް އިން ރައްޔިތުންގެ ވިސްނުމާ އެއްގޮތަށް ބަގީ ސާވިސް ފެށުމަށް ހުރިހާ ތައްޔާރީއެއްވެ ނިމިފައި އޮއްވައި ސަރުކާރުން މިކަން ކުރަން އުޅުމަކީ ލާމަރުކަޒީ ނިޒާމާ ބީރައްޓެހި ނާތަހުޒީބް އަމަލެއް،" ވިލިމާލެއަށް މިނީ ބަސް ތައާރަފްކުރުމާ ގުޅިގެން އޭރު ކުރެއްވި ޓުވީޓެއްގައި ޑރ. މުއިއްޒު ވިދާޅުވި އެވެ.
ސިޓީ ކައުންސިލުން ވިލިމާލޭގައި ބަގީގެ ހިދުމަތް ދޭން ފެށީ، ކުރިން އެ އަވަށުގައި ބަގީގެ ހިދުމަތް ދޭން ހަވާލުކުރި އަމިއްލަ ކުންފުނިން އެ ހިދުމަތް ހުއްޓާލުމުންނެވެ.
ވިލިމާލޭގައި ބަގީގެ ހިދުމަތް ކުރިއަށްނުދާތީ، އެ ހިދުމަތް ދިނުމަށް ހަވާލުކޮށްފައި އޮތް ކުންފުނިން އެ މަސައްކަތް ހުއްޓާލައި، ދީފައިވާ ބިންތައް ހަތް ދުވަސް ތެރޭގައި ހަވާލުކުރުމަށް މާލޭ ސިޓީ ކައުންސިލުން އެ ކުންފުންޏަށް އެންގުމުން ސިވިލް ކޯޓަށް ހުށަހެޅި މައްސަލައާ ގުޅިގެން އެ އެނގުމަށް އަމަލު ނުކުރަން ވަނީ ވަގުތީ އަމުރެއް ނެރެފަ އެވެ.
ވިލިމާލޭގައި ބަގީގެ ހިދުމަތް ދިނުމަށް ހަވާލުކޮށްފައި އޮތީ އިމްޕްރިންޓް ނަމަކަށް ކިޔާ ކުންފުންޏަކާ އެވެ. އެހެން ނަމަވެސް، އެ ކުންފުނިން ވަނީ ފަހުން އެ މަސައްކަތް 99 ހޯލްޑިންސް ކުންފުންޏަށް ބަދަލުކޮށްފަ އެވެ.
