ހުޅުމާލޭގައި ހައުންސިން ޔުނިޓެއް އެޅުމުގެ މަސައްކަތް ކުރުމަށް އެމްޓީސީސީގެ ހިއްސާ އޮންނަ މޯލްޑިވްސް ރިއަލް އެސްޓޭޓް އިންވެސްޓްމަންޓް ކޯޕަރޭޝަން ޕްރައިވެޓް ލިމިޓެޑް (އެމްއާރުއީއައިސީ)އިން އޮސްޓްރޭލިޔާގެ ކުންފުންޏަކަށް 2007 ވަނަ އަހަރު ދިން ފަސް ލައްކަ އެމެރިކާ ޑޮލަރު އަނބުރާ ހޯދުމަށް އެންޓި ކޮރަޕްޝަން ކޮމިޝަން (އޭސީސީ) އިން އަންގައިފި އެވެ.
އެމްއާރުއީއައިސީ އަކީ އެމްޓީސީސީގެ 99.99 އިންސައްތަ ހިއްސާ އޮންނަ ކުންފުންޏެކެވެ.
އޭސީސީއިން މިއަދު ބުނި ގޮތުގައި ދައުލަތަށް އެ ފައިސާ ހޯދުމަށް އެމްޓީސީސީ އަދި އެމްއާރުއީއައިސީގެ މައްޗަށް އެންގީ އޮސްޓްރޭލިޔާގެ، އިންޓަނޭޝަނަލް ފައިނޭންސް ކޯޕަރޭޝަން އޮސްޓްރޭލިޔާ (އައިއެފްސީއޭ) ކިޔާ ކުންފުންޏަކާއެކު ވެފައިވާ އެއްބަސްވުމުގެ ދަށުން ގެދޮރު ބިނާކޮށް، ރިއަލް އެސްޓޭޓް ޑިވެލޮޕްކުރުމަށް ބޭނުންވާ ވަރަށް ގިނަ ފައިސާ (550،000 އެމެރިކާ ޑޮލަރު) ދިން މައްސަލައެއް ތަހުގީގުކުރުމަށްފަހު އެވެ.
އަދި، މި ފައިސާއަކީ މަސައްކަތަށް ބޭނުންވާ ކެޕިޓަލް ފައިސާ އައިއެފްސީއޭއިން ހޯދުމަށްފަހު އެމްއާރުއީއައިސީއަށް އަނބުރާ ހަވާލުކުރަންޖެހޭ ފައިސާ ކަމަށް އޭސީސީން ބުންޏެވެ.
ނަމަވެސް، އެ ފައިސާއަކީ އެ ޕްރޮޖެކްޓާ ގުޅިގެން އެމްޓީސީސީން އެމްއާރުއީއައިސީއަށް ދީފައިވާ ފައިސާކަން އެނގޭއިރު، އައިއެފްސީއޭ އިން މިއަދާ ހަމައަށް ވެސް އެ ފައިސާ އަނބުރާ އެމްއާރުއީއައިސީއަށް ދީފައިނުވާ ކަމަށް ވެސް މި މައްސަލައިގެ ތަހުގީގަށްފަހު އޭސީސީއިން މީޑިއާތަކާ ހިއްސާކުރި ތަފުސީލުގައި ބުނެފައިވެ އެވެ.
