ކުރިއަށް އޮތް ރޯދަ މަހާ ދިމާކޮށް ހުޅުމާލެ ދެ ވަނަ ފިޔަވަހީގައި ވަގުތީ މާރުކޭޓެއް ހެދުމަށް ނިންމާފައިވާ ކަމަށް ހައުސިން ޑިވޮލޮޕްމެންޓް ކޯޕަރޭޝަނުން ބުނެފި އެވެ.
އެޗްޑީސީން މިއަދު ނެރުނު ބަޔާނެއްގައި ބުނީ މި މާރުކޭޓުން 18 ގޮޅިއެއް ދޫކުރުމަށް ނިންމާފައިވާ ކަމަށާއި އޭގެ ތެރެއިން ނުވަ ގޮޅި ދޫކުރާނީ ހިޔާ ސަރަހައްދުގައި ދިރިއުޅޭ މީހުންނަށް ކަމަށެވެ.
ބާކީ ނުވަ ގޮޅި ދޫކުރާނީ އާންމުކޮށް އިއުލާނުކޮށްގެން ކަމަށް ބުނެފައިވެ އެވެ.
ރޯދަ މަހަކީ މުދަލަށް ޑިމާންޑު ބޮޑު ދުވަސްވަރަކަށް ވާތީ މާލޭ ސިޓީ ކައުންސިލުން އެ ސަރަހައްދުގައި ވަގުތީ މާރުކޭޓެއް އެޅުމަށް ވެސް ބިން ދޫކޮށްފައިވާ ކަމަށް އެޗްޑީސިން ބުނެފައިވެ އެވެ.
މީގެ އިތުރުން އެސްޓީއޯގެ ހިދުމަތްތައް ފޯރުކޮށްދިނުމަށް ވިނަރެސް ކޮމާޝަލް ޔުނިޓެއް ވެސް ދޫކުރެވިފައިވާ ކަމަށް ބުނެފައިވެ އެވެ.
ވިނަރެސް ފްލެޓުގެ ތިރީގައި ހުޅުވުމަށް ތައްޔާރުވަމުން އަންނަ އެ ފިހާރަ އަންނަ މަހުގެ ނިޔަލަށް ހުޅުވޭވަރު ވާނެ ކަމަށް އެސްޓީއޯއިން ވަނީ ލަފާ ކޮށްފަ އެވެ.
އެސްޓީއޯއިން އާންމުކޮށް އެތެރެކުރާ ހުރިހާ ބާވަތެއްގެ މުދާ ހޯލްސޭލްކޮށް އަދި ރީޓެއިލްކޮށް ވެސް އެ ފިހާރައިން ގަންނަން ލިބޭނެ އެވެ. އަދި ރޯދަމަހަށް ހާއްސަކޮށް އެ ކުންފުނިން އެތެރެ ކުރާ ފިޔާ، އަލުވި، ބިސް ވެސް އެ ފިހާރައިން ލިބޭނެ އެވެ.
