ހުޅުމާލޭގެ ދެ ވަނަ ފިޔަވަހީގެ ދަށުން ހިއްކާފައިވާ 17 ބިމެއް ފަހި ދިރިއުޅުން ކޯޕަރޭޝަން (އެފްޑީސީ) އަށް ވިއްކާފައި ވަނީ ސަރުކާރުން ކުރިއަށްގެންދާ އިޖުތިމާއީ ބޯހިޔާވަހިކަމުގެ މަޝްރޫއުތަކުގެ ތެރެއިން 4،000 ހައުސިން ޔުނިޓު އެޅުމަށް ކަމަށް ހައުސިން ޑިވެލޮޕްމެންޓު ކޯޕަރޭޝަން (އެޗްޑީސީ) އިން ބުނެފި އެވެ.
އެ ބިންތައް ވިއްކިކަން އެނގުނީ އެ މުއާމަލަތަކީ ސައްހަ މުއާމަލާތެއްގެ ގޮތުގައި ކަނޑައަޅައިދިނުމަށް ސިވިލް ކޯޓަށް އެޗްޑީސީން ހުށަހެޅި މައްސަލައިގެ ޝަރީއަތް ނިމުނުގެ ގޮތުގެ ރިޕޯޓް އެ ކޯޓުން އާންމުކުރުމުންނެވެ.
ސިވިލް ކޯޓުގެ ހުކުމުގައި ބުނެފައިވާ ގޮތުން، އެ 17 ބިމުގައި ޖުމްލަ 552،429.91 އަކަފޫޓު ހުރެ އެވެ. އަދި އެ ބިންތަކަށް ޖުމުލަ 878،363،556.90ރ. ފިނޭންސް މިނިސްޓްރީން ވަނީ ދައްކައިފަ އެވެ.
މިއީ 4،000 ހައުސިން ޔުނިޓުގެ މަޝްރޫއުއެއް ހިންގުމަށް އެޗްޑީސީ އާއި އެފްޑީސީ އިތުރުން ފިނޭންސް މިނިސްޓްރީން ވެފައިވާ އެއްބަސްވުމެއްގެ ދަށުން ވިއްކި ބިންތަކެއް ކަމަށް އެޗްޑީސީން ހާމަކޮށްފައިވެ އެވެ.
މި ބިންތަކަށް މިހާރު ސަރުކާރުން ފައިސާ ދައްކައި ހަލާސްކޮށްފައިވުމާ އެކު، ކޯޓު މެދުވެރިކޮށް ބިންތަކުގެ މިލްކުވެރިކަން މިހާރު ބަދަލުކޮށްފައިވާ ކަމަށް ވެސް އެޗްޑީސީން ބުނެފައިވެ އެވެ.
އެޗްޑީސީން އިތުރަށް ބުނީ ހުޅުމާލޭގެ ދެ ވަނަ ފިޔަވަހި ހިއްކުމަށާއި އެހެނިހެން އުމްރާނީ ހަރަދުތައް ކޮށްފައިވަނީ އެ ކުންފުނިން ލޯނު ނަގައިގެން ކަމަށް ވުމާއެކު، އެކި ބޭނުމަށް ވިއްކި ބިމަށް އަގު ކަނޑައެޅިފައިވާ ކަމަށެވެ.
އަދި އެފްޑީސީއަށް ދޫކޮށްފައިވާ ބިންތަކަކީ ސޯޝަލް ހައުސިން އަށް ދޫކުރި ބިންތަކެއްކަމުން، ބިމުގެ އަގު ކަނޑައަޅާފައިވާނީ އާންމުންނަށް ހައުސިން ޔުނިޓުތައް ދޫކުރުމުގައި ލުއި އަގުތަކެއް ހަމަޖެއްސޭނެ ގޮތަށް ބަލައިގެން ކަމަށް ވެސް ބުނެފައިވެ އެވެ.
ފަހި ދިރިއުޅުން ކޯޕަރޭޝަނަކީ ދިވެހިރައްޔިތުންނަށް އަތްފޯރާފަށުގައި ބޯހިޔާވަހިކަން ފޯރުކޮށްދިނުމުގެ ސިޔާސަތުގެ ދަށުން މުޅި ރާއްޖެއަށް އަމާޒުކޮށްގެން ބޯހިޔާވަހިކަން ފޯރުކޮށްދިނުމުގެ މަޝްރޫއުތައް އެއް ފުރާޅެއްގެ ދަށުން ކުރިއަށް ގެންދިއުމުގެ މަގުސަދުގައި ސަރުކާރުން ފެބްރުއަރީ 2019 ގައި އުފެއްދި ކުންފުންޏެކެވެ.
އޭގެ ފަހުން، އެ ކޯޕަރޭޝަނުން ހުޅުމާލޭގައި 4،000 ހައުސިން ޔުނިޓް އެޅުމުގެ މަސައްކަތް ދަނީ ކުރަމުންނެވެ. އެ މަޝްރޫއު ކުރިއަށްގެންދިޔުމަށް އިންޑިއާގެ އެގްޒިމް ބޭންކުން ކްރެޑިޓް ފެސިލިޓީއެއް ވަނީ ނަގާފަ އެވެ.
އެއީ 227 މިލިއަން ޑޮލަރުގެ ފެސިލިޓީ އެކެވެ. މިފެސިލިޓީގެ ދަށުން އެކޯޕަރޭޝަނަށް ދޫކޮށްފައި ވަނީ ދެ ލޯނެކެވެ. އެއީ 110.5 މިލިއަން ޑޮލަރުގެ ލޯނަކާއި 116.45 މިލިއަން ޑޮލަރުގެ ލޯނެކެވެ.
އެ ހައުސިން ޔުނިޓްތައް އިމާރާތްކުރުމަށް ފަހި ދިރިއުޅުން ކޯޕަރޭޝަނުން ހަވާލުކޮށްފައި ވަނީ އިންޑިއާގެ ދެ ކުންފުންޏަކާ އެވެ.
