ފެނަކަ ކޯޕަރޭޝަނުގެ ބިލިން ސޮފްޓްވެއާއެއް ހެދުމަށް އަމިއްލަ ކުންފުންޏަކާއި އުސޫލާ ހިލާފަށް ހަވާލުކުރި މައްސަލާގައި އެ ކުންފުނީގެ ކުރީގެ ދެ މުވައްޒަފެއްގެ މައްޗަށް ދައުވާ ކޮށްދިނުމަށް އެދި އެންޓި ކޮރަޕްޝަން ކޮމިޝަން (އޭސީސީ) އިން ޕްރޮސެކިޔުޓާ ޖެނެރަލް (ޕީޖީ) ގެ އޮފީހަށް ފޮނުވައިފި އެވެ.
މިއީ ފެނަކަ ކޯޕަރޭޝަނުން ބިލިން ސޮފްޓްވެއާއެއް ހެދުމަށް ހަވާލުކުރި އަމިއްލަ ކުންފުޏަކަށް އުސޫލުތަކާއި ހިލާފަށް އެ ކޯޕަރޭޝަނުން ފައިސާ ދޫކުރި މައްސަލައިގައި ޕްރޮސިކިއުޓަރ ޖެނަރަލްގެ އޮފީހުން އިސްލާހު ކުރުމަށް އެންގި ކަންކަން އިސްލާހު ކުރުމަށްފަހު ފޮނުވި މައްސަލައެކެވެ.
އޭސީސީން ޕީޖީގައި އެދިފައި ވަނީ ފެނަކައިގެ ޑެޕިއުޓީ ޑިރެކްޓަރެއްގެ މަގާމުގައި ކުރިން ހުރި މ.ފެހިވިދުވަރުގެ، އިސްމާޢީލް ޝަމްއޫން އާއި، އެ ކުންފުނީގެ ޑެޕިއުޓީ ޑިރެކްޓަރު، ސޭލްސް އެންޑް ބިލިން ޑިޕާޓްމަންޓްގެ މަގާމުގައި ހުރި އަހްމަދު ނަޖާހުގެ މައްޗަށް މި މައްސަލާގައި ދައުވާ ކޮށްދިނުމަށެވެ.
ފެނަކަ ކޯޕަރޭޝަން ލިމިޓެޑްގެ ކަސްޓަމަރުންނަށް ބިލް ކުރުމަށްޓަކައި، ބިލިން ސޮފްޓްވެއަރއެއް ހެދުމަށް އަމިއްލަ ކުންފުންޏަކާ އެކު ހަދާފައިވާ އެއްބަސްވުމުގައި އެ މަސައްކަތް ނޮވެމްބަރު 6، 2017 ގެ ނިޔަލަށް ނިންމުމަށް ބަޔާންކޮށްފައިވެ އެވެ.
އެހެން ނަމަވެސް އެ ހިދުމަތް އަދި މިހާތަނަށް ފެނަކަ ކޯޕަރޭޝަން ލިމިޓެޑަށް ލިބިފައިނުވާއިރު، އެ ސޮފްޓްވެއާ ނިމުނު ކަމަށް އިސްމާއީލް ޝަމްއޫން ސޮއިކޮށް ލިޔުން ދޫކުރުމުގެ ސަބަބުން މަސައްކަތް ހަވާލުކުރި ކުންފުންޏަށް ދޭންޖެހޭ އެންމެހާ ފައިސާ ދޫކޮށްފައިވާތީ، މިކަމުގެ އެކުންފުންޏަށް ނާޖާއިޒު މަންފާއެއް ހޯދައިދީފައިވާކަން އެނގޭ ކަމަށް އޭސީސީން ބުނެ އެވެ.
އެހެންކަމުން، އޭނާ އާއި އަހްމަދު ނަޖާހުގެ މައްޗަށް ދައުވާކުރުމަށް ފޮނުވާފައިވަނީ ރަސްމީ ހައިސިއްޔަތު ނަހަމަ ގޮތުގައި ބޭނުންކުރުމުގެ ކުށުގެ ދައުވާ އާއި، މަގާމުގެ ނުފޫޒު ބޭނުންކޮށްގެން ނާޖާއިޒް މަންފާ ހޯދައިދިނުމުގެ ކުށުގެ ދައުވާ އެވެ.
އަދި އެއްބަސްވުމާ ގުޅިގެން މަސައްކަތް ހަވާލުކުރި ކުންފުންޏަށް ދޫކޮށްފައިވާ ޖުމުލަ 1,389,342.00 (އެއް މިލިއަން ތިންސަތޭކަ އަށްޑިހަ ނުވަ ހާސް ތިންސަތޭކަ ސާޅީސް ދޭއް) ރުފިޔާ ފެނަކަ ކޯޕަރޭޝަނަށް ގެއްލިފައިވާކަން އެނގޭތީ، އެ ފައިސާ އަނބުރާ ހޯދުމަށް ފެނަކަ ކޯޕަރޭޝަން ލިމިޓެޑަށް ވަނީ އަންގާފަ އެވެ.
