ވެމްކޯގެ ބިލާއި ސްޓެލްކޯގެ ބިލު އެއްކޮށްލުމުގެ މަސައްކަތް އަންނަ މާޗު މަހަށް ނިންމާލެވޭތޯ މަސައްކަތް ކުރަމުންދާ ކަމަށް ވެމްކޯއިން ބުނެފި އެވެ.
އެ ކުންފުނީގެ މެނޭޖިން ޑިރެކްޓަރު، ޔޫސުފް ސިރާޖު މި ނޫހަށް ވިދާޅުވީ، ދެ ކުންފުނީގެ ބިލު އެއްކޮށްލުމުގެ މަޝްވަރާތައް މިހާރު ކުރަމުން އަންނަ ކަމަށެވެ. އެކަމުގައި ގޮތެއް ނިންމާނީ މަޝްވަރާ ކުރުމަށްފަހު، ދެ ކުންފުނިން ވެސް ބޭނުންވާ ގޮތަށް ކަމަށް އޭނާ ވިދާޅުވި އެވެ.
އޭގެއިތުރުން، ވެމްކޯގެ ބިލުތަކުގެ އޮނިގަނޑު އަލުން އެކުލަވާލައި ޔުޓިލިޓީ ރެގިއުލޭޓަރީ އޮތޯރިޓީއަށް ހުށަހަޅާފައިވާ ކަމަށް ވެސް އޭނާ ވިދާޅުވި އެވެ. ފީގެ ގޮތުގައި އެ ކުންފުނިން މިހާރު ނަގަމުންދާ އަގަކީ މަސައްކަތް ކުރުމަށް ހިނގާނެ ހަރަދުތައް ބަލައިގެން އެކުލަވާލައިފައި އޮތް އޮނިގަނޑެއް ނޫން ކަމަށް ސިރާޖު ވިދާޅުވި އެވެ.
"އޭރު އެކަން ކޮށްފައި އޮތީ މަސައްކަތް ކުރުމަށް ދާނެ ހަރަދަށް ބަލައިގެނެއް ނޫން، އެކަމަކު ބިލުތައް ރީސްޓްރަކްޗާ ކުރިޔަސް ގޭބިސީތަކުން ނަގާ ފީއަކަށް ހަމަ ޔަގީނުންވެސް ބަދަލެއް ނާންނާނެ،" އޭނާ ވިދާޅުވި އެވެ.
ކުނި މެނޭޖު ކުރުމުގެ މައްސަލައަށް ދާއިމީ ހައްލެއް ހޯދުމުގެ މަގުސަދުގައި ވެމްކޯ އުފެއްދީ މީގެ ހަތް އަހަރު ކުރިން އޭރުގެ ސަރުކާރުންނެވެ. އޭރު ބިލުތަކުގެ އޮނިގަނޑު އެކުލަވާލައިފައި އޮތް ގޮތުންނާއި އެ ކުންފުނީގައި ގޭބިސީތައް ރެޖިސްޓާ ކުރުމަށް އެއްވެސް މަޖުބޫރު ކަމެއް ނެތުމުގެ ސަބަބުން މިއަދާ ހަމައަށް ވެސް އެ ކުންފުނީގައި ރެޖިސްޓާ ކޮށްފައި ވަނީ މާލޭގެ ގެބިސީތަކުގެ ގާތްގަނޑަކަށް 35 އިންސައްތަ އެވެ.
އެހެންނަމަވެސް ވެމްކޯގައި ރެޖިސްޓާ ނުކުރާ ގޭބިސީތަކުން އުފައްދާ ކުނި ވެސް އެ ގޭގެއިން މަގުމައްޗަށް ނެރެ އެވެ. މަލޭގެ އާބާދީގެ މަދު ބަޔަކު ފިޔަވައި ގިނަ ގޭބިސީތަކުން މިއަދާ ހަމައަށް ވެސް ކުނި އުކަމުން ދަނީ އެއްވެސް ފައިސާއެއް ނުދައްކަ އެވެ.
އެ މައްސަލައަށް ހައްލެއް ހޯދުމަށްޓަކައި ކަރަންޓު ބިލާއި ވެމްކޯގެ ބިލު އެއްކޮށްލުމުގެ މަސައްކަތް ކުރަމުންދާ ކަމަށް އެންވަރަމަންޓު މިނިސްޓަރު، އާމިނަތު ޝައުނާ ވިދާޅުވީ މިދިޔަ ޑިސެމްބަރު މަހު އެވެ.
އެ މަސައްކަތް މިހާރު ނިމުމަކާ ހަމައަށް ގޮސްފައި ވާއިރު، އެ ދެ ބިލު އެއްކޮށްލުމުން ރަނގަޅު ނަތީޖާއެއް ފެންނާނެ ކަމަށް ވެމްކޯއިން ބުނެ އެވެ.
