މިދިޔަ ސަރުކާރުގައި ކޮރަޕްޝަނަށް މަގުފަހިވާ ގޮތަށް ޓޫރިސްޓު ރިސޯޓުތައް ތަރައްގީ ކުރުމަށް އެމްއެމްޕީއާރްސީން ރަށްތައް ދޫކޮށްގެން ފައިސާ ހޯދި މައްސަލައިގައި ވިޔަފާރިވެރިއެއްގެ އަތުން 2.46 މިލިއަން އެމެރިކާ ޑޮލަރު ހޯދަން އެންޓި ކޮރަޕްޝަން ކޮމިޝަން (އޭސީސީ) އިން އެމްއެމްޕީއާރްސީއަށް އަންގައިފި އެވެ.
އޭސީސީން މިއަދު ބުނީ ހިޔާނާތުގެ މައްސަލައިގައި ހ.ސްނޫޕީ/މާލެ ސިޓީ، އަބްދުﷲ އާސިމްއަށް ލިބުނު 2.46 މިލިއަން ޑޮލަރު (37.9 މިލިއަން ރުފިޔާ) ހޯދަން މި މަހުގެ 14 ވަނަ ދުވަހު އެ ކުންފުންޏަށް އަންގާފައިވާނެ ކަމަށެވެ.
ވިޔަފާރިވެރިއެއް ކަމަށްވާ އަބްދުﷲ އާސިމް އަކީ އެމްއެމްޕީއާރްސީގެ ކުރީގެ މެނޭޖިން ޑިރެކްޓަރު އަބްދުﷲ ޒިޔަތުގެ ބޮޑުބޭބެ އެވެ. މި މައްސަލައިގައި 2016 ވަނަ އަހަރުގެ ތެރޭގައި އޭނާ ހައްޔަރުކޮށްފައި ވެސް ވެ އެވެ.
އެމްއެމްޕީއާރުސީ މެދުވެރިކޮށް ރަށްރަށާއި ފަޅުތަކާއި ގިރިތައް ވިއްކައިގެން ދައުލަތަށް ލިބެން ޖެހޭ ބިލިއަނަކަށް ވުރެ ގިނަ ރުފިޔާއަށް ހިޔާނާތްތެރިވި މި މައްސަލާގައި ޒިޔަތަށް ހުކުމް ސާބިތުވެ، އިއުތިރާފު އެއްބަސްވުމުގެ ދަށުން ދައުލަތުން އެދުނު ގޮތަށް 2020 ވަނަ އަހަރުގެ ޑިސެމްބަރުގައި 11 އަހަރުގެ ޖަލު ހުކުމެއް ޒިއަތުއަށް އިއްވި އެވެ.
އެމްއެމްޕީއާރުސީ ހިޔާނާތާ ގުޅިގެން މިހާތަނަށް ޖިނާއީ ދައުވާތަކެއް ކުރި ނަމަވެސް، އެ ދައުވާތައް މެދުވެރިކޮށް ވެސް މިހާތަނަށް ދައުލަތަށް އެއްވެސް ފައިސާއެއް ހޯދިފައެއް ނުވެ އެވެ. އަދި މިހާތަނަށް މި މައްސަލައާ ގުޅުން ހުރި މަދަނީ މައްސަލައެއް ވެސް ސިވިލް ކޯޓަށް ހުށަހަޅާފައެއް ނެތެވެ.
