ސިނާއީ ބޭނުމަށް ތިލަފުށިންް ބޭރު ކުންފުނިތަކަށް ބިންް ކުއްޔަށް ދޭނީ އެއީ ސަރުކާރުގެ ފޮރިން ޑިރެކްޓު އިންވެސްޓުމެންޓު (އެފްޑީއައި) ޕޮލިސީ ހުއްދަކުރާ ވިޔަފާރިއެއް ކުރާ ކުންފުންޏަކަށް ވާނަމަ އެކަނި ކަމަށް ހައުސިން ޑިވެލޮޕްމަންޓު ކޯޕަރޭޝަން (އެޗްޑީސީ)އިން ބުނެފި އެވެ.
އެޗްޑީސީއިންް މިއަދު ނެރުނު ނޫސްބަޔާނެއްގައި ބުނީ، ތިލަފުށިން ހިއްކާ ސަރަހައްދުން ބިން ގަތުމަށް ބީލަމަށް ލެވޭނީ ހަަމަައެކަނި އެފްޑީއައި ޕޮލިސީގެ ދަށުން ހުއްދަ ދެވިފައިވާ އަދި ރާއްޖޭގައި ރަޖިސްޓްރީކޮށްފައިވާ ވިޔަފާރިތަަކަށް އެކަނި ކަމަށެވެ. އެފްޑީއައި ހުއްދަ އޮތްތޯ ބެލުމުގެ މަރުހަލާ ކުރިއަށް ގެންދާނީ ބީލަން ހުށަހެޅުމުން އިކޮނޮމިކް މިނިސްޓްްރީ އާ ގުޅިގެން ކަމަށް އެޗްޑީސީން ބުނެފައި ވެއެވެ.
އަދި ޕްރޮޖެކްޓު ބޭސިސްގައި ކޮންސްޓްރަކްޝަން މަޝްރުއޫތައް ކުރިއަށް ގެންދިއުމުގެ ހުއްދަ ދެވިފައިވާ ކުންފުނިތަކަށް ބީލަމުގައި ބައިވެރި ނުވެވޭނެ ކަމަށް އެކުންފުނިން ބުންޏެވެ.
އެޗްޑީސީއިން އިއުލާނުކޮށްފައިވާ އުސޫލުގެ ދަށުން ތިލަފުށިން ގަންނަ ބިންތައް ދިވެއްސެއް ނުވަތަ ދިވެހި ކުންފުންޏަކުން ބީލަން ކާމިޔާބުކޮށްފި ނަމަ ބިން މިލްކު ކުރެވޭނެ އެވެ. ނަމަވެސް ބޭރު މީހެއް ނުވަތަ ބޭރު ކުންފުންޏަކުން ބީލަން ކާމިޔާބުކޮށްފި ނަމަ ބިން ކުއްޔަށް ދޫކުރާނީ 99 އަހަރަށެވެ.
މިފަދަ ދިގު މުއްދަތަކަށް ތިލަފުށިން ބޭރުގެ ކުންފުނިތަކަށް ބިންް ވިއްކުމަށް ނިންމުމާއި ގުޅިގެން ގިނަ ވިޔަފާރިތަކަކުން އަންނަނީ ކަންބޮޑުވުން ފާޅުކުރަމުންނެވެ. މި މައްސަލައާ ގުޅިގެން ރާއްޖޭގެ ބޮޑެތި ގިނަ ކުންފުނިތަކަކުން އެއްތަންވެ މި މައްސަލައިގެ ޝަކުވާ ރައީސުލްޖުމްހޫރިއްޔާ އަށް ހުށަހެޅުމަށް ނިންމާފައި ވެއެވެ.
ތިލަފުށިން ދޫކުރުމަށް ހަމަޖެހިފައިވާ ބިމުގެ 90 އިންްސައްތަ ދޫކުރަނީ ދިވެހި ވިޔަފާރިތަކަށެވެ. ބިމަށް އެދި ބީލަން ހުށަހެޅުމުގެ ފުރުސަތު ހުޅުވާލާފައި ވަނީ މިމަހުގެ ހަތް ވަނަ ދުވަހުން ފެށިގެންނެވެ.
ސަރުކާރުން ތިލަފުށި ތަރައްގީކުރަން އެކުލަވާލި މާސްޓާ ޕްލޭނުގައިވާ ގޮތުން އިތުރު 151 ހެކްޓަރުގެ ބިން ހިއްކާ ތަރައްގީކުރުމަށް ވަނީ ހަމަޖެހިފަ އެވެ.
އަދި ތިލަފުށި ކުނި މެނޭޖުކުރާ ރަށެއްގެ ގޮތުގައި އޮތް އޮތުން ނިމުމަކަށް ގެނެސް، އެ ރަށަކީ ރާއްޖޭގެ "ސިނާއީ މައި ހަބު" އަށް ހެދުމަށް މަސައްކަތް ކުރަމުން އަންނަ ކަމަށް އެޗްޑީސީން ބުނެފައި ވެއެވެ.
