ސަރުކާރު ހިއްސާވާ ކުންފުނިތައް އުފެއްދުމާއި، އުވާލުމާއި، ރެޖިއުލޭޓު ކުރުން ފަދަ ކަންކަން ގާނޫނެއްގެ ތެރެއަށް ފައްތަން ގޮވާލައި ރައްޔިތުންގެ މަޖިލީހަށް ގަރާރެއް ހުށަހަޅައިފި އެވެ.
މަޖިލީހުގެ އިއްުޔެގެ ޖަލްސާގައި މި ގަރާރު ހުށަހަޅުއްވާފައިވަނީ ހުޅުދޫ ދާއިރާގެ މެންބަރު އިލްޔާސް ލަބީބް އެވެ.
ގަރާރުގައި ބުނެފައިވާ ގޮތުގައި ސަރުކާރު ހިއްސާވާ ކުންފުނިތަކުގެ މައިގަނޑު މަގުސަދަކީ ކުންފުނިތަކުގެ މެންޑޭޓާ އެއްގޮތަށް ވިޔަފާރިކޮށް، ނަފާ ހޯދައި، ދައުލަތަށް އިގްތިސޯދީ ފައިދާ ހޯދުން ކަމަށްވީ ނަމަވެސް، ކުންފުނިތަކުގެ ހިންގުން ދޯދިޔާވެ، ހަގީގީ މަގުސަދު ހާސިލް ނުވާ ކަމަށެވެ.
"[އެކަމުގެ ސަބަބުން] އިގްތިސޯދީ ކުރިއެރުމަށާއި ދެމެހެއްޓެނިވި ތަރައްގީއަށް ނޭދެވޭ އަސަރު ކުރާ ކަމާއި، އަދި ކުންފުނިތަކުގައި އުފެދި އާލާވަމުންދާ ފަސާދައިގެ އަމަލުތަކަކީ ދައުލަތް ހިންގުމުގައި ނަޒާހާތްތެރިކަން ކުރިއެރުވުމަށް ކުރެވޭ މަސައްކަތަށް ދިމާވާ ގޮންޖެހުމެއް،" ގަރާރުގައި ބުނެފައިވެ އެވެ.
ގަރާރުގައި އިތުރަށް ފާހަގަކޮށްފައިވާ ބައެއް ކަންކަން؛
- ކުންފުނިތަކުގެ އަދަދު ގިނަވީނަމަވެސް ދައުލަތަށް ފިސްކަން ރެވެނިއު ދަށްވުން
- ކުންފުނިތަކުގެ މާލީ ގާބިލު ކަމަށް ނުބަލާ ޕްރޮޖެކްޓުތައް ހިންގުމާއި ހަރަދުކުރުމުގެ ސަބަބުން ފައިދާ ނުވުން
- ކުންފުނިތަކަށް ލިބޭ ގެއްލުން ފޫބެއްދެމާއި ވޯކިން ކެޕިޓަލް ހަރަދުތައް ދައުލަތުގެ ބަޖެޓުން ކުރަން ޖެހުން
- ކުންފުނިތައް ކުރިއަރުވާނެ ބިޒްނަސް ޑިވޮލޮޕްމެންޓް ޕްލޭނެއް ނެތުން
- އޭސީސީއަށް ދެވަނައަށް އެންމެ ގިނައިން ހުށަހެޅެނީ ކުންފުނިތަކުގެ މައްސަލަކަން
މީގެ އިތުރުން ކުންފުނިތަކުގެ މަގުސަދު ސާފުކޮށް ކަނޑައަޅާފައި އޮތް ނަމަވެސް، އަސާސީ ގަވައިދުގައި ކަނޑައަޅާފައި ނެތް ކަންކަން ހަވާލުކުރާކަމާއި އިދާރީ އޮނިގަނޑު އެކުލަވާލާފައިވާ ނަމަވެސް އެކަމަށް އަމަލު ނުކުރާ ކަން ފާހަގަކޮށްފައިވެ އެވެ.
"ވަޒީފާތަކަށް މީހުން ނެގުމުގައި އެއްވެސް ހިފެހެއްޓުމެއްނެތި ބައެއް ކުންފުނިތަކުން މީހުން ވަޒީފާއަށް ނަގާކަން ފާހަގަކުރެވިފައި [ވޭ]،" ގަރާރުގައި ބުނެފައިވެ އެވެ.
އަދި، ކުންފުނިތަކުން ސީއެސްއާރަށް ހަރަދުކުރާނެ އުސޫލެއް ނޯންނަ ކަން ފާހަގަކޮށް، އެއީ ކޮރަަޕްޝަނަށް މަގުފަހިވާނޭ ކަމެއްގެ ގޮތުގައި ފާހަގަކޮށްފައިވެ އެވެ.
މި ސަބަބުތަކަށް ޓަކައި ކުންފުނިތައް ރެޖިއުލޭޓު ކުރެވޭނެ ގާނޫނެއް އުފެދުމުގެ ކަންކަން ތަރުތީބުކޮށް އިންތިޒާމު ކުރުމަށް ގަރާރުގައި ވަނީ ގޮވައިލައިފަ އެވެ.
