މާލެ އަދި ވިލިމާލޭގެ އާންމު ސަރަހައްދުތަކުން ކުނި ނެގުމުގެ މަސައްކަތް ހަރުދަނާ ކުރުމުގެ ގޮތުން މާލެ ސިޓީ ކައުންސިލުން ވޭސްޓް މެނޭޖްމެންޓް ސެކްޝަނެއް މިއަދު ހުޅުވައިފި އެވެ.
މިއަދު ހެނދުނު މާލެ ސިޓީ ކައުންސިލްގެ ވޭސްޓް މެނޭޖްމެންޓް ސެކްޝަން ރަސްމީކޮށް ހުޅުވައިދެއްވީ މާލެ ސިޓީގެ މޭޔަރު ޑރ. މުހައްމަދު މުއިއްޒެވެ.
ވޭސްޓް މެނޭޖްމެންޓް ސެކްޝަން ހުޅުވައިދެއްވުމަށް ފަހު މުއިއްޒު ވިދާޅުވީ އެ ސެކްޝަންގެ ބޭނުމަކީ މާލެ ސަރަހައްދުން ކުނި ނަގައި އެ ކުނި މެނޭޖް ކުރުމަށް ސިޓީ ކައުންސިލުން ކުރަމުންދާ މަސައްކަތަށް ބޭނުންވާ އިދާރީ މަސައްކަތްތަކަށް އިތުރު ޖާގަ ބޭނުންވާތީ، އެ ޖާގަ ހަމަޖެއްސުން ކަމަށެވެ.
"މީގެ ނަތީޖާއަކަށް ވާނީ އިރާދަކުރެއްވިއްޔާ ކުރިއަށް އޮތް ތަނުގައި އިތުރަށް ހަރުދަނާކޮށް މާލެތެރެ ރީތިކޮށް ސާފުކޮށް ބޭއްވުމުގެ މަސައްކަތް ރަނގަޅަށް ގެންދިއުން،" މުއިއްޒު ވިދާޅުވި އެވެ.
މާލެ ސާފުކޮށް ބެލެހެއްޓުމަށް ވޭސްޓް މެނޭޖްމަންޓް ކޯޕަރޭޝަނާއެކު މާލެ ސިޓީ ކައުންސިލުން ވެފައި އޮތް އެއްބަސްވުން ފަސް އަހަރަށްފަހު މި ޑިސެމްބަރު 26، ގައި ހަމަވުމުން އެ އެއްބަސްވުމުގެ މުއްދަތު އިތުރު ނުކުރީ އެ ކުންފުނީގެ މަސައްކަތާ މެދު ހިތްހަމަނުޖެހިގެންނެވެ.
ކައުންސިލުން ފާހަގަ ކުރި މައިގަނޑު ދެ މައްސަލައަކީ ވެމްކޯއިން މަސައްކަތް ކުރާ އަގު ބޮޑުވުމާއި މަސައްކަތުގެ ޒިންމާ ރަނގަޅަށް އަދާނުކުރުމެވެ.
އެއާއެކު ގޭބީސީތަކުން މަގުމައްޗަށް ނެރޭ ކުނި ދެން ނުގެންދާނެ ކަމަށް ވެމްކޯއިން ބުނެފައިވާއިރު، މުޅި މާލެ ގޮނޑުވެ، އީޕީއޭއިން ވެސް ކަންބޮޑުވުން ފާޅުކުރި އެވެ. އެ ފަހުން، އެންވަޔަރަމަންޓް މިނިސްޓަރު އާމިނަތު ޝައުނާ އަންގަވައިގެން ވެމްކޯއިން ވެސް ކުނި ނެގުމުގެ މަސައްކަތް ކުރެ އެވެ.
