ރޮމޭނިއާއިން ރާއްޖެއަށް ކަނޑައަޅާ އޮނަރަރީ ކޮންސުލްގެ މަގާމަށް އަހުމަދު ސިޔާމް މުހައްމަދު (ސަން ސިޔާމް) އައްޔަންކޮށްފި އެވެ.
އޭނާ އެ މަގާމަށް މިދިޔަ އަހަރުގެ ފަހުކޮޅު ރޮމޭނިއާއިން އައްޔަންކޮށްފައިވާއިރު, އެކަން ދިވެހި ސަރުކާރުން ގަބޫލުކޮށް އިއްޔެގެ ވަގުތެއްގައި ވަނީ ލިޔުން ހަވާލުކޮށްފަ އެވެ. ރޮމޭނިއާއިން ރާއްޖެއަށް ކަނޑައަޅާ އޮނަރަރީ ކޮންސުލްގެ މަގާމަށް ސިޔާމް އައްޔަން ކޮށްފައިވާއިރު، އޭނާ ގެންދަވަނީ ރައްޔިތުންގެ މަޖިލީހުގެ މީދޫ ދާއިރާގެ މެންބަރުންކަން ވެސް ކުރައްވަމުންނެވެ.
ރޮމޭނިއާއިން ރާއްޖެއަށް ކަނޑައަޅާ އޮނަރަރީ ކޮންސުލްގެ މަގާމަށް ސިޔާމް އައްޔަންކުރި ކަން ހާމަކުރައްވާ ފޮރިން މިނިސްޓަރު އަބްދުﷲ ޝާހިދު ކުރެއްވި ޓްވީޓެއްގައި ވިދާޅުވީ، އެ މަގާމަށް ސިޔާމް އައްޔަން ކުރުމުގެ ސަބަބުން ރާއްޖެއާއި ރޮމޭނިއާއާ ދެމެދު އޮތް ގުޅުން އިތުރަށް ހަރުދަނާވެގެންދާނެ ކަމުގެ ޔަގީންކަން އެބަ އޮތް ކަމަށެވެ.
ސަން ސިޔާމްގެ މަގާމު ދިވެހި ސަރުކާރުން ގަބޫލުކޮށްފައިވާއިރު އޭނާ ވަނީ މިދިޔަ އަންގާރަ ދުވަހު ރައީސް އޮފީހަށް ވަޑައިގެން ރައީސް އިބްރާހިމް މުހައްމަދު ސޯލިހާ ބައްދަލުކުރައްވާފަ އެވެ.
