ކަސްޓަމްސް ދާއިރާގެ ނަޒާހަތްތެރިކަން ކުރިއަރުވައި، މަސައްކަތުގައި އެއްބާރުލުން ދިނުމަށް ދާއިރާތައް ކަނޑައަޅައި ގުޅިގެން މަސައްކަތް ކުރުމަށް އެންޓި ކޮރަޕްޝަން ކޮމިޝަން (އޭސީސީ)އާ އެކު މޯލްޑިވްސް ކަސްޓަމްސް ސާވިސަސް އިން އެއްބަސްވުމެއްގައި ސޮއިކޮށްފި އެވެ.
މިއަދު ސޮއިކުރި އެއްބަސްވުމުގެ ދަށުން ކަސްޓަމްސް ދާއިރާގައި ނަޒާހަތްތެރިކަން ކުރިއަރުވައި، އިދާރީ ހިންގުމުގެ ތެރެއިންނާއި، ހިދުމަތް ދިނުމުގައި ކޮރަޕްޝަނަށް އޮތް ހިރާސް ކުޑަކުރުމަށް ގުޅިގެން މަސައްކަތްކުރާނެ އެވެ. އަދި އެފަދަ ގޮންޖެހުން ބޮޑު މަސައްކަތްތަކެއް ކުރިއަށް އޮތްތަނުގައި ވަކި މިސްރާބެއް ކަނޑައެޅިގެން ކުރުމަށް ވެސް އެއްބަސްވެ އެވެ.
އޭސީސީގެ ނައިބު ރައީސް އަބްދުއްސަލާމް ވިދާޅުވީ އެ ކޮމިޝަނުން ދައުލަތުގެ އިދާރާތަކާއެކު ސޮއިކުރާ މިފަދަ ކޮންމެ އެއްބަސްވުމަކީ ވެސް ގިނަ ދުވަސްތަކެއްގެމަތިން ކުރެވޭ މުހިންމު މަޝްވަރާތަކަކަށްފަހު އިދާރާތަކުގެ މަސައްކަތްތައް ހަލުއިކޮށް އިތުބާރުހިފޭ ފަސޭހަ ނިޒާމެއްގެ ތެރެއިން ހިދުމަތް ފޯރުކޮށްދިނުމަށް ސޮއިކުރާ މުހިއްމު އެއްބަސްވުމެއް ކަމަށެވެ.
"އެހެންކަމުން މިފަދަ އެމްއޯޔޫތަކުގައި ސޮއިކުރުމުން އަމާޒުވާ ފާޑުކިއުންތަކަށް ބެލުމެއް ނެތި ނޫގާނުން މަތިކޮށްފައިވާ ޒިންމާތަށް އަދާކުރުމަށް ކޮންމެ މުއްސަސާއަކުންވެސް މަސައްކަތް ކުރަންޖެހޭ," އޭނާ ވިދާޅުވި އެވެ.
އެއްބަސްވުމުގައި ސޮއި ކުރުމުގެ ރަސްމިއްޔާތުގައި ކޮމިޝަނާ ޖެނެރަލް އޮފް ކަސްޓަމްސް އަބްދުﷲ ޝަރީފު ވިދާޅުވީ ކަސްޓަމްސްގެ މުވައްޒަފުންގެ މެދުގައި ނަޒާހަތްތެރިކަން ކުރިއަރުވައި، އެ ދާއިރާއިން އެންމެ އެދެވޭ ގޮތެއްގައި ހިދުމަތް ދިނުމުގެ ކަންކަން ބައްޓަން ކުރުމަށް އޭސީސީގެ ފަންނީ ލަފާ ކަސްޓަމްސްއަށް ލިބެމުންދާ ކަމަށެވެ. އަދި މިއަދު ސޮއިކުރި އެއްބަސްވުމުގެ ސަބަބުން އެ މަސައްކަތްތައް އިތުރު ހަރުފަތްތަކަށް ކުރިއަރައިގެން ދާނެ ކަމަށް ވެސް ޝަރީފު ވިދާޅުވި އެވެ.
އޭސީސީން ކަސްޓަމްސްއާއެކު އެއްބަސްވުމެއްގައި ސޮއިކޮށްފައިވާއިރު، އެ ކޮމިޝަނުން ދަނީ ދައުލަތުގެ އެކި އެކި މުއްސަސާތަކާއެކު ނަޒާހަތްތެރިކަން ކުރިއެރުވުމާ ގުޅޭ އެއްބަސްވުންތަކުގައި ސޮއި ކުރަމުންނެވެ. އެގޮތުން، އެ ކޮމިޝަނުން ވަނީ މި ހަފްތާ ތެރޭގައި އެިމިގްރޭޝަނާއި ޕީސީބީއާ އެކު މިފަދަ އެއްބަސްވުންތަކުގައި ސޮއިކޮށްފަ އެވެ.
