ހުޅުމާލޭގައި ގަވައިދާ ހިލާފަށް ޕާކުކޮށްފައިވާ ވެހިކަލްތައް ޓޯ ކުރުމުގެ މަސައްކަތް ހައުސިން ޑިވޮލޮޕްމެންޓް ކޯޕަރޭޝަން (އެޗްޑީސީ)އިން މިއަދު ފަށައިފި އެވެ.
ހުޅުމާލޭގެ މަގުތަކުގައި ގަވާއިދާ ހިލާފަށް ޕާކުކޮށްފައި ހުރި އުޅަނދުތައް ބަލައި އެޗްޑީސީން މިދިޔަ އަހަރުގެ ފަހުކޮޅު ވަނީ ސާވޭ ރިޕޯޓެއް ހަދައިފަ އެވެ.
ރިޕޯޓުގައި އެޗްޑީސީން ވަނީ ހުޅުމާލޭގެ އެކި ސަރަހައްދުތަކުގައި ޕާކުކޮށްފައި ހުރި ނަންބަރު ބޯޑު ނުޖަހާ ނުވަތަ ސުންބޯޑުގައި ހުރި އުޅަނދުތަކާއި ބޭނުން ނުކުރެވޭ ވަރަށް ހަލާކުވެފައި ހުރި އުޅަނދުތަކުގެ މައުލޫމާތު އާންމުކޮށްފަ އެވެ.
އެޗްޑީސީން އޭރު ބުނީ ސާވޭ ރިޕޯޓުގައިވާ މައުލޫމާތަށް ބިނާކޮށް އުޅަނދުތައް ޓޯ ކުރާނެ ކަމުގެ އިންޒާރު ދީފައިވާނެ ކަމަށެވެ.
ފޮޓޯއާ އެކު އެޗްޑީސީގެ ރިޕޯޓުގައި ނަންބަރު ބޯޑު ނުޖަހާ ނުވަތަ ސުންބޯޑުގައި ހުރި 370 އުޅަނދާއި ބޭނުން ނުކުރެވޭ ވަރަށް ހަލާކުވެފައި ހުރި 46 އުޅަނދު ހިމެނެ އެވެ.
