ސްވިޑަންގެ ސަރުކާރުން އެ ގައުމުގައި ކީރިތި ގުރުއާން އަންދާލުމުގެ ހުއްދަ ދިން މައްސަލަ ދިވެހި ސަރުކާރުން މިއަދު ކުށްވެރިކޮށްފި އެވެ.
ސްވިޑަންގެ ހަރުކަށި ފިކުރުގެ ސިޔާސީ ފަރާތްތަކުން އިއްޔެ ތުރުކީ އެމްބަސީ ކުރިމަތީގައި ބޭއްވި އިހުތިޖާޖަކީ ސަރުކާރުގެ ހުއްދައާއެކު ކުރިއަށް ގެންދިޔަ އިހުތިޖާޖެކެވެ. ތުރުކީއާ ދެކޮޅަށް ކުރި މުޒާހަރާގައި ގުރުއާން އަންދާފައިވުމުން މުސްލިމު ގިނަ ގައުމުތަކުން އަންނަނީ އެކަން ކުށްވެރިކުރަމުންނެވެ.
މިކަމާ ގުޅިގެން ފޮރިން މިނިސްޓަރު އަބްދުﷲ ޝާހިދު ކުރެއްވި ޓްވީޓެއްގައި ވިދާޅުވީ ސްވިޑެންގެ ހަރުކަށި ޕާޓީގެ ލީޑަރު ރަސްމުސް ޕަލުޑާން ގުރުއާން އަންދައި ހިންގި އަމަލު ހަރުކަށި އިބާރާތުން ކުށްވެރި ކުރާ ކަމަށެވެ.
މި މައްސަލައިގައި ޝާހިދު ޓްވީޓު ކުރައްވާފައިވަނީ މި މައްސަލައިގައި ދިވެހި ސަރުކާރުން އެއްޗެއް ބުނެފައިނުވާތީ ގިނަ ބަޔަކު ފާޑުކިޔަމުން އައި ދަނޑިވަޅެއްގަ އެވެ. އެ މައްސަލައިގައި މިއަދު ހެނދުނު އިދިކޮޅު ޕްރޮގްރެސިވް ޕާޓީ އޮފް މޯލްޑިވްސް އިން ވެސް ވަނީ ބަޔާނެއް ނެރެފަ އެވެ.
