ރާއްޖެ ހިމެނޭހެން 20 ގައުމަކަށް ގުރޫޕު ޓުއާތައް ފެށުމުގެ ހުއްދަ ޗައިނާގެ މިނިސްޓަރީ އޮފް ކަލްޗާ އެންޑު ޓުއަރިޒަމް އިން އެގައުމުގެ ޓުރެވެލް އޭޖެންސީތަކަށާއި އޮންލައިން ޓުރެވެލް ކުންފުނިތަކަށް ދީފި އެވެ.
އެ މިނިސްޓަރީން އިއްޔެ ނެރުނު ބަޔާނެއްގައި ބުނެފައި ވަނީ ފެބްރުއަރީ 6، އިން ފެށިފެން ރާއްޖެ ހިމެނޭހެން 20 ގައުމަކަށް ގުރޫޕު ދަތުރުތައް ފެށުމުގެ ހުއްދަ ދީފައިވާ ކަމަށެވެ.
އޭގެ ތެރޭގައި އަވައްޓެރި ސްރީލަންކާ އާއި އިންޑޮނޭޝިއާ އަދި މެލޭޝިއާ ފަދަ ގައުމުތައް ހިމެނެ އެވެ. އައުޓުބައުންޑު ގުރޫޕު ޓުއާތަކަކީ އެކި ގައުމުތަކުގެ ސަގާފަތާއި އާދަކާދަތައް ބަލައި ތަޖުރިބާކޮށްލުުމުގެ އިންތިޒާމުތައް އެ ޕެކޭޖުތައް ވިއްކާ އޭޖެންސީތަކުން ހަމަޖައްސައިދެ އެވެ.
އެގޮތުން ޗައިނާއަކީ އައުޓުބައުންޑު ގުރޫޕު ޓުއާތަކަށް ވަރަށް މަޝްހޫރު ގައުމެކެވެ.
ޗައިނާ ސަރުކާރުގެ އެ ނިންމުމާ އެކު ރާއްޖޭގައި ހުންނަ ޗައިނާގެ އެމްބަސީން ވެސް ވަނީ އެކަމާ ގުޅިގެން ޓުވީޓެއް ކޮށްފަ އެވެ. އެގޮތުން ރާއްޖެއަކީ ޗައިނާ މީހުންގެ މެދުގައި އެންމެ މަގުބޫލު މަންޒިލްތަކުގެ ތެރޭގައި ހިމެނޭ ގައުމެއް ކަމަށް އެ ޓުވީޓުގައި ބުނެފައިވެ އެވެ.
ކޮވިޑުގެ ބަލިމަޑުކަމާ ގުޅިގެން ފާއިތުވި ތިން އަހަރެއްހައި ދުވަހު ޗައިނާގެ ބޯޑަރުތައް ބަންދުކޮށްފައި އޮތުމަށްފަހު، އެގައުމުގެ ބޯޑަރުތައް ހުޅުވާލުމާ އެކު މިދިޔަ ބުދަ ދުވަހު ވަނީ ޗައިނާއިން ރާއްޖެއަށް ސީދާ ދަތުރުތައް ވެސް ފަށާފަ އެވެ.
ޗައިނާގެ ބޯޑަރުތައް ހުޅުވާލުމާ އެކު ރާއްޖޭގެ ފަތުރުވެރިކަން އިތުރަށް ރަނގަޅުވާނެ ކަމަށާއި މިއަހަރު އެކަނިވެސް ޗައިނާއިން ލައްކައަކަށް ވުރެ ގިނަ ފަސިންޖަރުން ރާއްޖެއަށް އަންނާނެ ކަމަށް ލަފާ ކުރެއްވޭ ކަމަށް ޓޫރިޒަމް މިނިސްޓަރު، ޑރ. މައުސޫމް ވަނީ މީގެ ކުރިން ވިދާޅުވެފަ އެވެ.
ޗައިނާއަކީ ކޮވިޑުގެ ހާލަތު މެދުވެރިވުމުގެ ކުރިން ރާއްޖެއަށް އެންމެ ގިނަ ފަތުރުވެރިން އައި ގައުމެވެ. ކޮވިޑުގެ ބަލިމަޑުމަކަމާ ކުރިމަތިލި އަހަރު ރާއްޖެއަށް އައި ފަތުރުވެރިންގެ އަދަދަކީ 1.7 މިލިއަން އެވެ. އޭގެފަހުން 2020 ވަނަ އަހަރު ރާއްޖޭގެ ބޯޑަރު ބަންދު ކުރުމާ ހަމަައަށް ރާއްޖެއަށް ޒިޔާރަތް ކުރީ އެންމެ ފަސް ލައްކަ ފަތުރުވެރިންނެވެ.
ނަމަވެސް، ދުނިޔޭގެ ގައުމުތަކުގެ ބޯޑަރުތައް ހުޅުވާލުމާ އެކު ޖެހިގެން އައި 2021 ވަނަ އަހަރު ފަތުރުވެރިކަން އަނެއްކާވެސް ހަމައަކަށް އެޅުމުގެ ކޮޅުމަތި ފެނުނެވެ. އެ އަހަރު ރާއްޖެއަށް 1.3 މިލިއަން ފަތުރުވެރިން އައެވެ. އަދި، މި ނިމުނު އަހަރު ރާއްޖެއަށް އަންނާނެ ކަމަށް ލަފާ ކުރި އަދަދަށް، 1.6 މިލިއަން ފަތުރުވެރިން ވަނީ ރާއްޖެ އައިސްފަ އެވެ.
މިއަހަރު 1.8 މިލިއަން ފަތުރުވެރިން ރާއްޖެއަށް ޒިޔާރަތް ކުރާނެ ކަމަށް ޓޫރިޒަމް މިނިސްޓަރީން ވަނީ ލަފާކޮށްފަ އެވެ.
