މީގެ 10 އަހަރު ކުރިން ކ. ކާށިދޫގައި ޑިއުޓީއަށް ނުކުމެ ހުއްޓައި ވަޅިއަކުން ހަމަލާދީ މަރާލި ޕޮލިސް އާދަމް ހަލީމް މަރާލި މައްސަލާގައި ހުކުމްކޮށްފައިވާ މުހައްމަދު ސަމާހަށް ދައުލަތުން ހަމަޖައްސާފައިވާ ވަކީލު ވަކިކުރަން ސުޕްރީމް ކޯޓުން މިއަދު ނިންމައިފި އެވެ.
ޖުލައި 23، 2012 ގައި ހިނގި އެ ހާދިސާއާ ގުޅިގެން ކ. ކާށިދޫ، ސުވާސާގޭ މުހައްމަދު ސަމާހުގެ މައްޗަށް ކުށް ސާބިތުވާ ކަމަށް ކަނޑައަޅައި އޭނާ މަރާލުމަށް ކްރިމިނަލް ކޯޓުން ހުކުމް ކުރީ 2013 ވަނަ އަހަރުގެ ތެރޭގަ އެވެ. ހައި ކޯޓުން އެ ހުކުމް ދެމެހެއްޓީ ސެޕްޓެމްބަރު 30، 2020 ގަ އެވެ.
ސަމާހުގެ ފަރާތުން ސުޕްރީމް ކޯޓުގައި އިސްތިއުނާފްކުރި މައްސަލާގައި ބޭއްވި ފުރަތަމަ އަޑުއެހުމުގައި އިސްތިއުނާފީ ނުކުތާތައް ޝަރީއަތަށް އިއްވައިދިނީ ވެސް ދައުލަތުން އޭނައަށް ހަމަޖައްސާފައިވާ ވަކީލު ޖައުފަރު ރަޝީދެވެ.
އޭގެ ފަހުން ސަމާހަށް ވާހަކަ ދައްކަން ފުރުސަތު ދިނުމުން އޭނާ ވަނީ ދައުލަތުން ކުރިން ހަމަޖެއްސި ވަކީލުންނާއި، ފަހުން ހަމަޖެއްސި ވަކީލު ޖައުފަރު ރަޝީދުގެ ފަރާތުން ވެސް އޭނާއަށް ދޭންވާ އެއްބާރުލުން ނުދޭ ކަމަށް ބުނެ ޝަކުވާކޮށްފަ އެވެ.
އަމިއްލައަށް ދިފާއީ ވަކީލަކު ހަމަޖައްސަން މާލީ ފޯރުންތެރިކަން ނެތް މީހުނަށް، އެޓާނީ ޖެނެރަލް އޮފީހުގެ ފަރާތުން ވަކީލަކު ހަމަޖައްސައިދޭން ޖެހެ އެވެ. ވަކީލުންނާ މެދު ހުރި ޝަކުވާތައް އެކި ފަހަރު މަތިން އެ އޮފީހަށް ވެސް ބަޔާންކޮށް ސިޓީ ފޮނުވާފައިވާނެ ކަމަށް އޭނާ ބުންޏެވެ.
"ޖައުފަރު ރަޝީދު އަޅުގަނޑަށް އައްޔަންކޮށްފައިވާ ކަމަށް އެޓާނީ ޖެނެރަލްގެ އޮފީހުން ސިޓީ ފޮނުވާފައިވަނީ 3 އޭޕްރީލް 2022 ގައި، އެ ދުވަހުން ފެށިގެން މިއަދާ ހަމައަށް ވެސް އެއްވެސް ހަބަރެއް، ފޯނު ކޯލެއް، ވީޑިއޯ ކޮންފެރެންސްގެ ޒަރިއްޔާއިން ވެސް، މާފުއްޓަށް ޒިޔާރަތްކޮށްގެން ވެސް ހަބަރެއް ނުވޭ،" ސަމާހު ބުންޏެވެ.
އެ ޝަކުވާތަކާ ގުޅޭ ގޮތުން ޖައުފަރު ރަޝީދު ޝަރީއަތުގައި ވިދާޅުވީ ބައްދަލުވުމަށް ދިމާވާ ގޮންޖެހުމަކީ ކަރެކްޝަންސްގެ ފަރާތުން ލިބެންވާ މިންވަރަށް އެހީތެރިކަން ނުލިބޭތީ ކަމަށެވެ.
ދެ ފަރާތުން ދެއްކި ވާހަކައަށް ރިއާޔަތް ކުރުމަށް ފަހު ޝަރީއަތުން ނިންމީ ދައުލަތުން ސަމާހަށް ހަމަޖެއްސި ވަކީލު އެ މަސައްކަތުން ދުރު ކުރުމަށެވެ. އެއީ އަމިއްލައަށް ވަކީލަކު ހަމަޖައްސަން މަސައްކަތް ކުރަމުންދާ ކަމަށް ސަމާހު ވެސް ބުނުމުންނެވެ.
މި މައްސަލަ ސުޕްރީމް ކޯޓުގައި ބައްލަވަނީ ފަސް ފަނޑިޔާރުންގެ ބެންޗަކުންނެވެ. ރިޔާސަތުގައި އިންނެވީ ފަނޑިޔާރު ހުސްނުއްސުއޫދެވެ. ބެންޗުގައި ދެން ތިއްބެވީ ފަނޑިޔާރު ޑރ. އަޒްމިރަލްދާ ޒާހިރާއި، ފަނޑިޔާރު އައިޝާ ޝުޖޫން މުހައްމަދާއި، ފަނޑިޔާރު މަހާޒް އަލީ ޒާހިރާއި، ފަނޑިޔާރު ޑރ. މުހައްމަދު އިބްރާހީމެވެ.
މައްސަލަ ދަށު ކޯޓުގައި ކުރިއަށް ދިޔައިރު ހަލީމް މަރާލި ކަމަށް ސަމާހު ފުރަތަމަ އިއުތިރާފުވި އެވެ. ނަމަވެސް އެއީ ފުލުހުން ބިރު ދައްކައިގެންވީ އިއުތިރާފެއް ކަމަށް ބުނެ އޭނާ އެ ކަމަށް ފަހުން އިންކާރު ކުރި އެވެ.
