ކުޑަދޮރެއް ހަލާކުކޮށްލައިގެން ޓެކްސް އިދާރާ، މީރާގެ އޮފީސް ފަޅާލައިގެން އެތަނަށް ވަތް މީހަކު ތިން މަސް ދުވަހަށް ޖަލަށް ލުމަށް ކްރިމިނަލް ކޯޓުން ހުކުމް ކޮށްފި އެވެ.
ސ. ހިތަދޫ، ދެކުލައަރާގޭ މުހައްމަދު އަސްލަމްގެ މައްޗަށް ދައުލަތުން އުފުލާފައިވަނީ ހުއްދަ ނޫންތަނަކަށް ވަނުމުގެ ދައުވާއާއި މުދަލަށް ގެއްލުން ދިނުމުގެ ދައުވާ އެވެ.
މިދިޔަ އަހަރުގެ އޮގަސްޓު މަހުގެ ނުވަ ވަނަ ދުވަހުގެ ދަންވަރުގެ ވަގުތެއްގައި މީރާ އޮފީސް ފަޅާލި ކަމަށް ކޯޓުގައި އޭނާ ވަނީ އެއްބަސްވެފަ އެވެ. ކުށަށް އިއުތިރާފުވަމުން އޭނާ ބުނެފައިވަނީ އެއީ މަސްތުގެ ހާލަތުގައި ހުރެ ކުރެވުނު ކަމެއް ކަމަށެވެ.
އޭނާ ކުށަށް އިއުތިރާފުވުމާ ގުޅިގެން އިއްވި އަވަސް ނިޔާގެ ހުކުމުގައި ވަނީ ހުއްދަ ނޫން ތަނަކަށް ވަނުމުގެ ދައުވާއަށް ތިން މަހާއި 18 ދުވަސް އަދި މުދަލަށް ގެއްލުން ދިނުމުގެ ދައުވާއަށް 27 ދުވަހަށް ޖަލަށް ލުމަށް ހުކުމް ކޮށްފަ އެވެ.
އެއާއެކު، އޭނާ މިހާރު ބަންދުގައި ހުރި މުއްދަތު އުނިކުރުމަށްފަހު ތަންފީޒު ކުރަން ޖެހޭނީ ތިން މަހާއި 18 ދުވަހުގެ ޖަލު ހުކުމެކެވެ.
މީރާއިން އޭރު ބުނި ގޮތުގައި، މުވައްޒަފަކު އަތުން ގެއްލުނު 25ރ. ގެ އިތުރުން އެއްވެސް ފައިސާއެއް ނަގާފައެއް ނުވެ އެވެ. އެހެންނަމަވެސް އޭނާގެ މައްޗަށް ވައްކަމުގެ ދައުވާ ކޮށްފައި ނުވެ އެވެ.
މުހައްމަދު އަސްލަމް މީރާ ފަޅާލައިގެން އޭރު ހައްޔަރުކޮށްފައިވަނީ އޭނާ ޖަލުން ދޫވިތާ ތިން ހަފްތާ ފަހުންނެވެ. އޭނާ ޖަލުން މިނިވަންވީ ޖުލައި މަހުގެ 19 ވަނަ ދުވަހުގަ އެވެ. މީރާ ފަޅާލައި ވައްކަމެއް ކޮށްފައި އޭގެ 21 ދުވަސް (ތިން ހަފުތާ) ފަހުންނެވެ.
