ލޮލު ރޯގާ (ކޮންޓަންކްޓިވަައިރަސް) ފެތުރެމުން އަަންނާތީ ސަމާލުވާން އިލްތިމާސްކޮށްފި އެވެ.
ހެލްތު ޕްރޮޓެކްޝަން އެޖެންސީ (އެޗްޕީއޭ)އިން ބުނީ، ލޮލުރޯގާ ފެތުރޭ މިންވަރު ދަނީ އިތުރުވަމުން ކަމަށާއި، ބަލީގެ އަލާމާތްތައް ދެނެގަނެ ރައްކާތެރިކަމުގެ ފިޔަވަޅު އެޅުން ވަރަށް މުހިންމު ކަަމަށެވެ. ލޮލުރޯގާއިން ރައްކާތެރިވުމަށް ސާފުތާހިރުކަމަށް ސަމާލުވުމަކީ މުހިންމު ކަމެއްކަން އެ އެޖެންސީއިން ވަނީ ބުނެފަ އެވެ.
ލޮލުރޯގާއިން ރަައްކާތެރިވުމަށް އެޅުން މުހިންމު ފިޔަވަޅުތައް؛
- ގިނައިން ސައިބޯނި ލައިގެން އަތްދޮވުން
- އާންމުކޮށް އަތްލާ ތަކެއްޗާއި ތަންތަން ސާފުކުރުން
- ލޮލުގައި އަތްލުން އަދި އުނގުޅުމުން ދުރުހެލިވުން
- ބޭނުންކުރާ ޓިޝޫފަދަ ތަކެތި ރައްކާތެރި ގޮތުގަ ނައްތާލުން
ލޮލު ރޯގާއަކީ ތަފާތު ވައްތަރުގެ ބެކްޓީރިއާ އަދި ވައިރަހުގެ ސަބަބުން ޖެހޭ ބައްޔެކެވެ. މި ބަލީގެ އަލާމާތްތަކުގެ ތެރޭގައި ހިމެނެނީ، ލޮލުން ފެން އައުމާއި މަޑުލުން، ހުން އައުން އަދި ލޯ ރަތްވުމާއި ލޮލުގެތެރެ ހިރުވުމެވެ.
ލޮލު ރޯގާގެ އަލާމާތްތައް ފެންނަ ނަމަ ލަސްނުކޮށް ޑޮކްޓަރަށް ދައްކައި ސިއްހީ އެހީތެރިކަން ހޯދުމަށް އެޗްޕީއޭއިން ވަނީ އިލްތިމާސްކޮށްފަ އެވެ.
މި ބައްޔަކީ ފަސޭހައިން ގައިން ގަޔަށް އަރާ ބައްޔަކަށް ވާއިރު، ބަލި ޖެހިފައި ތިބޭ މީހުން ލޮލަށް އެޅުމަށް ބޭނުންކުރާ ބޭސް ބަލި ނުޖެހޭ މީހުން ބޭނުންކުރުން ފަދަ ކަންކަމުން ދުރުހެލިވުމަށް ވެސް އެ އެޖެންސީއިން ވަނީ އިލްތިމާސްކޮށްފަ އެވެ.
މި ބަލި ޖެހޭތާ ކުރީކޮޅު ލޯ ދުޅަވުމާއި، ލޮލުގައި ރިހުން އަދި ހިރުވުންް ފަދަ ކަންކަން ފެނިދާނެ އެވެ. ބަަލީގެ އަލާމާތްތައް ފެންނަ ނަމަ ލަސްނުކޮށް ސިއްހީ އެހީތެރިކަން ހޯދުމަކީ މުހިންމު ކަމެކެވެ.
