ވެލާނާ އިންޓަނޭޝަނަލް އެއާޕޯޓުގައި ހިންގަމުން އަންނަ ރެސްޓޯރަންޓެއް ފަޅާލައި، އެތަނުން 14،000ރ. ވަގަށް ނެގި މީހަކު އަހަރު ދުވަހަށް ޖަލަށް ލާން ކްރިމިނަލް ކޯޓުން ހުކުމް ކޮށްފި އެވެ.
ގދ. ރަތަފަންދޫ، ދިލާސާގޭ އަބްދުﷲ ހާރޫންގެ މައްޗަށް ދައުލަތުން ވަނީ ތިން ދައުވާއެއް އުފުލައިފަ އެވެ. އެއީ އެނގިހުރެ ހުއްދަ ނޫން ތަނަކަށް ވަނުމުގެ ދައުވާއާއި ވައްކަން ކުރުމުގެ ދައުވާގެ އިތުރުން މީހެއްގެ މުދަލަށް ގެއްލުން ދިނުމުގެ ދައުވާ އެވެ.
ދައުލަތުން ކޯޓުގައި ބުނެފައިވާ ގޮތުގައި 2021 ވަނަ އަހަރުގެ ޖެނުއަރީ މަހުގެ 18 ވަނަ ދުވަހުގެ ދަންވަރުގެ ވަގުތެއްގައި އޭނާ ވަނީ އެއާޕޯޓުގެ އުތުރުފަޅީގައި ހުންނަ ސްކައި ސެވެން ނަމަކަށް ކިޔާ ރެސްޓޯރެންޓުގެ ސްޓޮކް ރޫމް ދޮރު ތަޅާލައިގެން، އެ ދޮރަށް ގެއްލުންދީ އެ ތަނުގެ ސީސީޓީވީ ފޫޓޭޖު ރެކޯޑަރު ޑީވީއަށް ގެއްލުން ދީފައިވަ އެވެ.
އަދި، އެ ތަން ފަޅާލައި 14،812ރ. އާއި ސީސީޓީވީ ފޫޓޭޖު ރެކޯޑަރު ޑީވީގެ ހާޑް ޑިސްކު ވަގަށް ނަގާފައިވާ ކަމަށް ބުނެފައިވެ އެވެ.
އޭނާގެ މައްޗަށް މި ތިން ދައުވާ ވަނީ ސާބިތުވެފަ އެވެ. އެއާއެކު އެނގިހުރެ ހުއްދަ ނޫން ތަނަކަށް ވަނުމުގެ ދައުވާއަށް ދެ މަހާއި 12 ދުވަސް، ވައްކަން ކުރުމުގެ ދައުވާއަށް ނުވަ މަހާއި ހަތް ދުވަހާއި އެނގިހުރެ ހުއްދަ ނޫން ތަނަކަށް ވަނުމުގެ ދައުވާއަށް 18 ދުވަސް ހިމެނޭހެން ޖުމްލަ އެއް އަހަރާއި ހަތް ދުވަހަށް ޖަލަށް ލާން ކޯޓުން ވަނީ ހުކުމް ކޮށްފަ އެވެ.
