ކުރީގެ ރައީސް އަބްދުﷲ ޔާމީން މިނިވަން ކުރުމަށް ގޮވާލައި އިދިކޮޅުން ސިލްސިލާކޮށް ކުރަމުންދާ މުޒާހަރާގެ ތެރެއިން މާލެ ސިޓީގެ މޭޔަރު ޑރ. މުހައްމަދު މުއިއްޒު ހައްޔަރުކޮށްފި އެވެ.
ސިލްސިލާކޮށް ޕީޕީއެމުން ކުރާ މުޒާހަރާތަކުގައި އެ ޕާޓީގެ އިސް ބޭބޭފުޅުން ހައްޔަރުކުރުން މިހާރު ވަނީ އާންމުވެފަ އެވެ. މުއިއްޒު ހައްޔަރު ކުރުމާ ގުޅިގެން މާލެ ސިޓީ ކައުންސިލުން މިރޭ ނެރުނު ނޫސްބަޔާނެއްގައި ބުނީ، އޭނާ ހައްޔަރުކުރީ ސުލްހަވެރި އެއްވުމެއްގެ ތެރެއިން ކަމަށެވެ.
މުއިއްޒު ހައްޔަރު ކުރުމަކީ އެ ކައުންސިލުން ދެކޭ ގޮތުގައި ގާނޫނު އަސާސީން ލިބިދީފައިވާ ޝުއޫރު ފާޅުކުރުމުގެ މިނިވަންކަން ހަނިކޮށް، މާލެ ސީޓީގެ ރައްޔިތުން އެމީހުންގެ މަންދޫބެއްގެ ގޮތުގައި ހޮވާފައި ހުރި މޭޔަރުގެ ބާރު ކަނޑުވާލުމަށްޓަކައި ހިންގާފައިވާ ޒިންމާދާރުކަން ކުޑަ އަމަލެއް ކަމަށް ވެސް އެ ބަޔާނުގައި ވެއެވެ.
ވ. އާރަށް ކުއްޔަށް ދިނުމުގައި ރިޝްވަތު ހިފުމާއި މަނީ ލޯންޑަރިންގެ ކުށް ސާބިތުވެ، ޔާމީން 11 އަހަރަށް ޖަލަށް ލުމަށް ކްރިމިނިލް ކޯޓުން ހުކުމް ކުރީ ޑިސްމަބްރު 25 ވަނަ ދުވަހުގެ އިރުއޮއްސުމަށް ގާތްވެފައި އޮއްވަ އެވެ. އެއާއެކު ގިނަ އިރުތަކެއް ނުވެ، ކަރެކްޝަންސްގެ ބެލުމުގެ ދަށުން ޔާމީން މާފުށީ ޖަލަށް ގެންދިޔަ އެވެ.
ޔާމީން ޖަލަށްލުމާ އެކު ޕީޕީއެމުން ވަނީ އޭނާ ދޫކޮށްލުމަށް ގޮވާލާ ސިލްސިލާކޮށް މާލޭ މަގުމަތީގައި މުޒާހަރާ ކުރުމަށް ނިންމާފަ އެވެ. އަދި، ބައެއް ރަށްތަކުގައި ވެސް މި ހަރަކާތްތައް ކުރިއަށް ގެންދެ އެވެ.
