ރާއްޖޭގެ އުފެއްދުންތައް ރާއްޖޭން ބޭރުގެ ބާޒާރަށް އެކްސްޕޯޓުކުރާ ފަރާތްތަކަށް ލުއިފަސޭހަތަކެއް ފޯރުކޮށްދިނުމުގެ ގޮތުން މޯލްޑިވްސް ޕޯޓްސް ލިމިޓެޑުން ނަގަމުންދާ އެކްސްޕޯޓް ކޮންޓެއިނާ ޓްރާންސްފާ ކުރުމަށް ނަގާ ފީ ކުޑަކޮށްފި އެވެ.
އެމްޕީއެލް އިން ބުނީ، އެކުންފުނީގެ ޑިރެެކްޓަރުންގެ ބޯޑުން އެގޮތަށް ނިންމާފައިވަނީ މިމަހުގެ އެއްވަނަ ދުވަހުން ފެށިގެންނެވެ.
މި ބަދަލަކީ ރާއްޖެއަށް މުދާ އެކްސްޕޯޓްކުރާ ފަރާތްތަކަށް ވާދަވެރި އަގުތަކެއްގައި ބައިނަލްއަގުވާމީ ބާޒާރުގައި ދިވެހި އުފެއްދުންތައް ވިއްކުމަށް މަގުފަހިކުރުމާއި، ދިވެހި ވިޔަފާރިތައް އިތުރަށް ކުރިއަރުވައި އެކްސްޕޯޓް ވިޔަފާރީގައި ވާދަކުރާ ފަރާތްތަކަށް ލުއި ފަސޭހަތަކެއް ހޯދައިދިނުމުގެ ގޮތުން ގެނައި ބަދަލެއް ކަމަށް އެކުންފުނިން ބުނެ އެވެ.
އެމްޕީއެލް އިން ބުނީ އެ ބަދަލާއެކު، މިހާރު ނަގަމުންދާ އެކްސްޕޯޓް ކޮންޓެއިނާ ޓްރާންސްފާގެ އަގުތައް ގާތްގަނޑަކަށް 75 ޕަސަންޓަށް ކުޑަކުރެވިފައިވާ ކަމަށެވެ. އަދި އަމާޒަކީ އެކްސްޕޯޓަރުންނަށްވެސް ވިޔަފާރި ހިންގުމަށް ފަސޭހަ މަގުތަކެއް ކޮށައިދިނުން ކަމަށް އެކުންފުނިން ބުނެ އެވެ.
އެގޮތުން އަލަށް ގެނައި ބަދަލާއެކު 20 ފޫޓުގެ ކޮންޓެއިނަރަކަށް ޖީއެސްޓީ ނުލައި ނަގަމުން އައި އަގަކީ 1132.08ރ. އެވެ. ކުރިން ނަގަމުން އައީ 4419.03ރ. އެވެ. އަދި 40 ފޫޓުގެ ކޮންޓެއިނަރަކަށް ޖީއެސްޓީ ނުލައި ކުރިން 8767.51ރ. ނަގަމުން އައި ނަމަވެސް މިހާރު ޖީއެސްޓީ ނުލައި ނަގާނީ 2264.15ރ. އެވެ.
