މާލޭގެ މަގުތަކަށް އާންމުކޮށް ކުނި އަޅާ ތަންތަން ފާހަގަކޮށް، މަގުތައް ސާފުތާހިރުކޮށް ބޭއްވުމަށް ފަރުދީ ޒިންމާ އަދާކުރުމަށް މާލެ ސިޓީގެ މޭޔަރު، ޑރ. މުހައްމަދު މުއިއްޒު އިލްތިމާސް ކުރައްވައިފި އެވެ.
އާންމުކޮށް ކުނި އަޅާ ތަންތަން ގޮތުގައި މާލޭގެ ހަތަރު އަވަށުން ޖުމްލަ 18 ތަނެއް ފާހަގަކޮށް ސިޓީ ކައުންސިލުން ތައްޔާރުކޮށްފައިވާ ލިސްޓަކާ އެކު ސިޓީ ކައުންސިލްގެ ވައިބާ ގުރޫޕަށް ކުރެއްވި މެސެޖެއްގައި އޭނާ ވިދާޅުވީ މާލޭގެ މަގުތައް ސާފުކޮށް ބޭއްވުމަށް ފަރުދީ ޒިންމާ އަދާކުރުން ވަރަށް މުހިންމު ކަމަށެވެ.
އެގޮތުން މަގުތަކަށް މީހަކު ކުނި އަޅާތަން ފެނިއްޖެ ނަމަ އެ މީހަކަށް މަޑުމައިތިރި ކަމާއެކު ނަސޭހަތްތެރިވުމަށާއި، ނަސޭހަތްތެރިވެގެން އެކަން ނުހުއްޓައިފި ނަމަ ފޮޓޯ ނަގާފައި އެ ދާއިރާއެއްގެ ކައުންސިލަރާއި ނުވަތަ ފުލުހުންނާ ހިއްސާ ކުރުމަށް އޭނާ ވަނީ އެދިވަޑައިގެންފަ އެވެ.
މާލޭގެ މަގުތަކަށް އާންމުކޮށް ކުނި އަޅާ ތަންތަން ކަމަށް ފާހަގަކޮށްފައިވާ ސަރަހައްދުތައް
- މާފަންނު / ސަބުދެލި މަގު / ސަތަރު ގޯޅި ކަންމަތި
- މާފަންނު / އަލިރަސްގެފާނު ޒިޔާރަތް ކައިރި
- މާފަންނު / ޖަންބުމަގު
- މައްޗަންގޯޅި / ސަހަރާ ކައިރި
- މައްޗަންގޯޅި / ކުރިކީލަ މަގު / ނިކަގަސް މަގު ކަންމަތި
- މައްޗަންގޯޅި / ހިތިލާގެ / ރެޑްމީ ކައިރި
- މައްޗަންގޯޅި / ބޮޑުފުޅައްގޯޅި
- ގަލޮޅު / ސަހަރާ މަގު / ގ. ސެންޓުގެ ކައިރި
- ގަލޮޅު / ފާށަނާކިލެގެ މަގު / ދާދަރާގޯޅި
- ގަލޮޅު / ރާދަފަތި ހިނގުން / ގ. ބީޗްނެސްޓު ކައިރި
- ގަލޮޅު / ބަނަފުސާ މަގު / ގ. ފަހިވާގެ ރޯޒުމޯޑު ކުރިމަތި
- ގަލޮޅު / މިޔަލަނި ގޯޅި
- މާފަންނު، މައްޗަންގޯޅި، ގަލޮޅު / އަމީނީމަގު ކޮޅުބެދިފައި ހުންނަ ގޯޅިތައް
- ހެންވޭރު / ކަރަންކާމަގު، އަބަދަށްފެހި ކަންމަތި
- ހެންވޭރު / އަބަދަށްފެހި މަގު / ހުޅުދޫގެ ކައިރި
- ހެންވޭރު / އެވާޗާންސު ގޯޅިގަނޑު ތެރެ
- ހެންވޭރު ސަހަރާ / ފޫޅުމާގެ ކައިރި
- ހެންވޭރު / ވައިޖެހޭ މަގު އުތުރުން މަޖީދީ މަގު ކަންމަތި
ފަސް އަހަރުގެ އެއްބަސްވުމެއްގެ ދަށުން މާލޭގެ މަގުތައް ސާފުކުރުމުގެ ޒިންމާ މީގެ ކުރިން އަދާ ކުރަމުން ގެންދިޔައީ އެކަމަށް ހާއްސަކޮށް 2016 ވަނަ އަހަރު އުފެއްދި ވެމްކޯ އިންނެވެ. އެހެންނަމަވެސް އެ އެއްބަސްވުން މިދިޔަ މަހު 26 ވަނަ ދުވަހު ހަމަވުމުން އެ އެއްބަސްވުން އާ ނުކުރުމަށް ސިޓީ ކައުންސިލުން ނިންމީ ކުންފުނިން އެ މަސައްކަތް ކުރާ އަގު ބޮޑު ކަމަށާއި މަސައްކަތުގެ ޒިންމާ ރަނގަޅަށް އަދާ ނުކުރާ ކަމަށް ބުނެ އެވެ.
އެއަށްފަހު މާލެ ސާފުތާހިރުކޮށް ބޭއްވުމުގެ ޒިންމާ އަދާ ކުރުމަށް ނިންމީ މާލެ ސިޓީ ކައުންސިލުންނެވެ. އެއާއެކު މާލޭގެ މަގުތައް ގޮނޑުވުމާއި ވެމްކޯއިން އެ މަސައްކަތް ކުރަމުން އައި އިރު އެކަން ކުރިހައި ފުރިހަމަކޮށް އެ މަސައްކަތް މިހާރު ނުކުރެވޭ ކަމަށް ބުނެ ގިނަ ބައެއްގެ ޝަކުވާތައް ވަނީ އިތުރު ވެފަ އެވެ.
އެކަމާ މެދު ކަންބޮޑުވުން ފާޅުކޮށް އެންވަރަމަންޓު ޕްރޮޓެކްޝަން އޭޖޭންސީން ވެސް ވަނީ މިދިޔަ ބުރާސްފަތި ދުވަހު ބަޔާނެއް ނެރެފަ އެވެ.
ވެމްކޯއިން ކުރިއަށްގެންދިޔަ ބިޔަ ޕްރޮޖެކްޓާ ކައުންސިލުން ހަވާލުވީ 100 އެއްހާ މުވައްޒަފުން އެ މަސައްކަތަށް ނަގައިގެންނެވެ. އޭގެ ތެރޭގައި ކުނި ނެގުމާއި ކުނި ކެހުމަށް 80 މީހުން ނެގި އެވެ.
މިވަގުތު ކައުންސިލުން މަސައްކަތް ކުރަމުންދަނީ ކުނީގެ މަސައްކަތަށް ބޭނުންވާ އުޅަނދުތައް ކުއްޔަށް ނަގައިގެންނެވެ. އެ ކައުންސިލުގެ އަމިއްލަ އުޅަނދުފަހަރުގައި އެ މަސައްކަތް ކުރަން އަދި ފަސް ވަރަަކަށް މަސްދުވަސް ވާނެ ކަމަށް އެ ކައުންސިލުން ވަނީ ބުނެފަ އެވެ.
