މާލެ އާއި ވިލިމާލޭގެ އާންމު ތަންތަން ސާފްކުރުމާއި ކުނިނެގުމުގެ މަސައްކަތާ ހަވާލުވި އިރު ސިޓީ ކައުންސިލަށް ހީވެފައި އޮތީ އެއީ ވަރަށް ފަސޭހަ މަސައްކަތެއް ކަމަށް ބުނެ ވޭސްޓު މެނޭޖްމެންޓް ކޯޕަރޭޝަން (ވެމްކޯ)ގެ މެނޭޖިން ޑިރެކްޓަރ ޔޫސުފް ސިރާޖް ސިޓީ ކައުންސިލަށް ފާޑު ވިދާޅުވެއްޖެ އެވެ.
މިއަދު ބޭއްވި ނޫސްވެރިންގެ ބައްދަލުވުމެއްގައި ވާހަކަ ދައްކަވަމުން ސިރާޖް ވިދާޅުވީ، އެ ކޯޕަރޭޝަނާއެކު ސިޓީ ކައުންސިލުން ވެފައިވާ އެއްބަސްވުން ނިމުމަކަށް ގެނެސް އެ މަސައްކަތް އެ ކައުންސިލުން ކުރަން ނިންމި އިރު ސިޓީ ކައުންސިލަށް ހީވެފައި އޮތީ އެއީ ވަރަށް ފަސޭހަ މަސައްކަތެއް ކަމަށެވެ. އަދި އެ ކައުންސިލުން މިކަން ކުރީ ވެމްކޯގެ މުވައްޒަފުން ކުރަމުން ގެންދިޔަ ބުރަ މަސައްކަތް "އަންޑާ އެސްޓިމޭޓް" ކުރުމަށްފަހު ކަމަށް ސިރާޖް ވިދާޅުވި އެވެ.
"މީގެ ކުރިން މި ހިދުމަތް ވެމްކޯއިން ދެމުން ގެންދިޔައީ މާލެ އަދި ވިލިމާލޭގެ ހުރިހާ ރައްޔިތުންނަށް. އެހެން މި ދެންނެވީ މާލޭގެ މަގުމައްޗަށް އަޅާ ހުރިހާ ކުންޏެއް ވެމްކޯއިން ސާފްކުރަމުން ދިޔަކަން މިއަދު ސިޓީ ކައުންސިލަށް ވެސް އަދި ހާއްސަކޮށް މޭޔަރަށް ވެސް ދޭހަވެގެން ދާނެ ކަމަށް އަޅުގަނޑު ގަބޫލުކުރަނީ،" ސިރާޖް ވިދާޅުވި އެވެ.
އެ މަސައްކަތާ ސިޓީ ކައުންސިލުން ހަވާލުވެ ރަސްމީކޮށް މާލެ ތެރެ ސާފްކުރުމުގެ މަސައްކަތް ފެށިތާ އަދި އެންމެ 48 ގަޑިއިރު ވެފައިވާއިރު، އެތައް ޝަކުވާއެއް ކޮށްފައިވާކަން ފާހަގަކޮށް ސިރާޖް ވިދާޅުވީ މި މަސައްކަތް ނުވާ ނަމަ އެ ކޯޕަރޭޝަނުން މީގެ ކުރިން ދިން މާލެތެރެ ސާފްކުރުމުގެ ހިދުމަތް އަލުން ދޭން ފެށުމަށް އެ ކޯޕަރޭޝަނާއި މުވައްޒަފުން ވެސް ތިބީ ތައްޔާރަށް ކަމަށެވެ.
"މިއަދު ސިޓީ ކައުންސިލަށް ޔަގީންވެގެން ހިނގައްޖެ މިކަމަކީ ސިޓީ ކައުންސިލުން އެ ހީކުރި ވަރަށްވުރެ މާ ބުރަ ބޮޑު މަސައްކަތެއްކަން. އެހެންވީމަ އަޅުގަނޑު މި ދަންނަވަނީ ސިޓީ ކައުންސިލަށް އެކަން ނުކުރެވޭކަމަށް ވަންޏާ ވެމްކޯއާ ހަވާލްކޮށްދެއްވާށޭ،" ސިރާޖް ވިދާޅުވި އެވެ.
މާލެ ސިޓީ ކައުންސިލުން ވެސް އިއްޔެ ވަނީ މި ހިދުމަތް ދޭން ފެށުމާއި ގުޅިގެން ނޫސްވެރިންްގެ ބައްދަލުވުމެއް ބާއްވާފަ އެވެ. އެ ބައްދަލުވުމުގާ މޭޔަރު މުއިއްޒު ވިދާޅުވީ މާލޭގެ މަގުތަކަށް ގޭބިސީތަކުން ޖަމާކުރާ ކުންޏަކީ ވެމްްކޯއިން ނަގަން ޖެހޭނެ ކުންޏެއް ކަމަށާއި އެކަން ނުކުރާ ނަމަ ގާނޫނީ ފިޔަވަޅު އަޅާނެ ކަމަށެވެ.
