މުދާ އިމްޕޯޓް ކުރުމަށްޓަކައި ކަސްޓަމްސް އަށް ހުށަހަޅާ ގުޑްސް ޑިކްލަރޭޝަން ފޯމުތަކުގައި ބަޔާންކޮށްފައި އޮންނަ އެއާވޭ ބިލް ނަމްބަރާއި އެމުދަލުގެ ކާގޯ މެނިފެސްޓު ނުވަތަ ހައުސް ބީއެލް ނަމްބަރު، އަންނަ އަހަރުން ފެށީގެން ދިމާކޮށްފައި ހުށަހެޅުމަށް މޯލްޑިވްސް ކަސްޓަމްސް ސާވިސް އިން އަންގައިފި އެވެ.
އާދީއްތަ ދުވަހު ކަސްޓަމްސް އިން ޝާއިއު ކުރި އިއުލާނެއްގައި ބުނެފައިވާ ގޮތުގައި ކަސްޓަމްސްއަށް ހުށަހަޅާ ބައެއް ގުޑްސް ޑިކްލަރޭޝަންތަކުގައި އެއާވޭ ބިލް ނަމްބަރާއި އެމުދަލުގެ ކާގޯ މެނިފެސްޓު ނުވަތަ ހައުސް ބީއެލް ނަމްބަރު ދިމާނުވާކަން ވަނީ ފާހަގަ ކުރެވިފަ އެވެ. އެހެން ކަމުން ބަނދަރު ހިންގާ ފަރާތްތަކަށް ލިޔުންތައް ހުށަހާޅާއިރު ދެ ކަމަކަށް ސަމާލުކަން ދިނުމަށް ކަސްޓަމްސްގެ އިއުލާނުގައި ބުނެފައިވެ އެވެ.
ކަސްޓަމްސްގެ އިއުލާނުގައިވާ ނުކުތާތައް
- މާސްޓާ ބީއެލް / މާސްޓާ އެއާވޭ ބިލް ނަމްބަރުގެ ގޮތުގައި ބަޔާންކުރަން ވާނީ އުޅަނދުގެ ކާގޯ މެނިފެސްޓުގައި ބަޔާންކޮށްފައި އޮންނަ ފޯމެޓާ އެއްގޮތަށް އެ ނަމްބަރެވެ.
- ހައުސް ބީއެލް / ހައުސް އެއާވޭ ބިލް ނަމްބަރުގެ ގޮތުގައި ބަޔާންކުރަން ވާނީ އެ މުދަލުގެ ހައުސް ބީއެލް / ހައުސް އެއާވޭ ބިލުގައި ބަޔާންކޮށްފައި އޮންނަ ފޯމެޓާ އެއްގޮތަށް އެ ނަމްބަރެވެ.
ކަސްޓަމްސް އިން ބުނީ ގުޑްސް ޑިކްލަރޭޝަން ތަކުގައި ބަޔާންކޮށްފައި އޮންނަ އެއާވޭ ބިލް ނަންބަރާއި ކާގޯ މެނިފެސްޓު ނުވަތަ ހައުސް އެއާވޭ ބިލުގައި ބަޔާން ކޮށްފައި އޮންނަ ނަންބަރާ ދިމާނުވާ ނަމަ ނުވަތަ ބަނދަރު ހިންގާ ފަރާތްތަކަށް ހުށަހަޅާ އެ މައުލޫމާތު ދިމާނުވާ ނަމަ، ޖެނުއަރީ 1، އިން ފެށިގެން މުދާ ދޫކުރާނީ ކަސްޓަމްސް އިން އަންގާ ގޮތަކަށް ގެންނަން ޖެހޭ އިސްލާހުތައް ގެނައުމަށްފަހުގައި ކަމަށެވެ.
