ސައޮ ޕައޮލޯ، ބްރެޒިލް (ޑިސެމްބަރު 25) - އުރުގުއޭގެ ފޯވާޑް ލުއިސް ސުއަރޭޒް، ބްރެޒިލްގެ ގަދަބާރު، ގްރެމިއޯ އަށް ބަދަލުވާން އަނގަބަހުން އެއްބަސްވެފައިވާ ކަމަށް މީޑިއާ ރިޕޯޓްތައް ބުނެފި އެވެ.
ޔޫރަޕްގެ ގަދަބާރުތަކަށް ކުޅެފައިވާ ސުއަރޭޒް، 35، މިދިޔަ އޮކްޓޫބަރު މަހުގެ ނިޔަލަށް ހުރީ އުރުގުއޭގެ ނަސިއޮނާލްގަ އެވެ. ސުއަރޭޒް، މިދިޔަ ޖުލައި މަހު، އޭނާގެ ކެރިއަރުގެ ފުރަތަމަ ޓީމަށް ބަދަލުވީ ކުރު ކޮންޓްރެކްޓެއްގަ އެވެ. މިދިޔަ އޮކްޓޫބަރު މަހުގައި ސުއަރޭޒް ވަނީ ނަސިއޮނާލަށް އުރުގުއޭގެ ލީގު ހޯދައިިދޭން އެހީތެރިވެފަ އެވެ.
މި ފަހަރު، ގަތަރުގައި ބޭއްވި ވޯލްޑް ކަޕްގެ ގްރޫޕް ސްޓޭޖުން އުރުގުއޭ ކެޓުމުން، ސުއަރޭޒް ވަނީ ޗުއްޓީ އަކަށް ރާއްޖެ އަތުވެފަ އެވެ. ސުއަރޭޒް، މިހާރު އަންނަނީ ކެރިއަރުގައި ދެން ގުޅޭނެ ޓީމަކާ މެދު މަޝްވަރާ ކުރަމުންނެވެ. އެ ގޮތުން ސުއަރޭޒަށް ސައުދީ އަރަބިއްޔާގެ ކްލަބަކުންނާއި ޔޫރަޕްގެ ޓީމުތަކުގެ އިތުރުން ދެކުނު އެމެރިކާގެ ކްލަބްތަކުގެ ހުށަހެޅުން ވެސް އަންނަނީ ލިބެމުންނެވެ.
ދެކުނު އެމެެރިކާގެ މަޝްހޫރު ކުޅިވަރު މީޑިއާ، ޓައިކް ސްޕޯޓްސް އިން ރިޕޯޓްކުރާގޮތުގައި ސުއަރޭޒް ވަނީ ބްރެޒިލްގެ ގްރެމިއޯ އަށް ދެ އަހަރުގެ ކޮންޓްރެކްޓެއްގެ ދަށުން ބަދަލުވާން އެއްބަސްވެފަ އެވެ. އަދި ކުރިއަށް އޮތް ދުވަސްތަކުގައި ސުއަރޭޒް، ގްރެމިއޯއާ ގުޅުމުގެ ބާކީ ކަންކަން ފުރިހަމަ ވެގެންދާނެ ކަަމަށް ވެސް ރިޕޯޓްތައް ބުނެ އެވެ.
ލަނޑު ޖެހުމަށް ފަހު ސުއަރޭޒް އުފާފާޅުކުރަނީ.
ސުއަރޭޒް، ގްރެމިއޯ އަށް ގެންދަން އެންމެ ބޮޑަށް ބާރު އަޅަނީ، އޭނާއާ އެކު މީގެ ކުރިން ލިވަޕޫލަށް ކުޅުނު މިޑްފީލްޑަރު ލޫކަސް ލެއިވާ އެވެ. ހިލޭ ޓްރާންސްފާއެއްގައި މި ފަހަރު ލާޒިއޯ ދޫކޮށް، ގްރެމިއޯ އަށް ބަދަލުވި ލޫކަަސް ދާދި ފަހުން ހެދި ރުޓީން ޓެސްޓްތަކަކުން ހިތުގެ މައްސަލައެއް ފާހަގަވެގެން ވަނީ ޓްރެއިނިން މެދުކަނޑާލަން ޖެހިފަ އެވެ. އެކަމަކު، ހާލު ރަނގަޅުވިހާ އަވަހަކަށް ލޫކަސް އަލުން ފަރިތަކުރުންތަކުގައި ބައިވެރިވާން ފަށާނެ ކަމަށް ބްރެޒިލްގެ މީޑިއާ ރިޕޯޓްތައް ބުނެ އެވެ.
ޔޫރަޕްގެ ރަން ބޫޓު ދެ ފަހަރެއްގެ މަތިން ހޯދި ސުއަރޭޒް، އެންމެ ފުރަތަމަ ޔޫރަޕްގެ ކްލަބަކަށް ކުުޅުނީ 2007 ވަނަ އަހަރު ނެދަލެންޑްސްގެ ގްރޮނިންގެން އަށެވެ. ސުއަރޭޒް، ގްރޮނިންގެން އަށް ބަދަލުވެ، އެ ޓީމުގައި ވިދާލުމުން، ދެން ނެދަލެންޑްސްގެ ޗެމްޕިއަން، އަޔަކްސް އިން އޭނާ ގެންދިޔަ އެވެ. އެއީ ގިނަ ބަޔަކަށް ސުއަރޭޒް ފާހަގަވާން ފެށި ހިސާބެވެ.
އަޔަކްސްގައި ހުއްޓައި، 2011 ވަނަ އަހަރު ލިވަޕޫލުން، 25 މިލިއަން ޑޮލަރު ދައްކައިފައި ސުއަރޭޒްގެ ސޮއި ހޯދި އެެވެ. އެ ޓީމާ އެކު ތަފާތު މޮޅު ކުޅުމެއް ދައްކައި، ދުނިޔޭގެ ސަމާލުކަން ހޯދި ސުއަރޭޒް، 2014 ވަަނަ އަހަރު ބާސެލޯނާ އަށް ބަދަލުވި އެވެ. އެ ޓީމަށް ކުޅެމުން ކެރިއަރު އެއް ހަރުފަތް މައްޗަށް ޖައްސާލި ސުއަރޭޒް ވަނީ އެ ކްލަބަށް 2020 ވަނަ އަހަރާ ހަމަ އަށް ކުޅެދީ ކާމިޔާބު ވެސް ހޯދައިފަ އެވެ.
ބާސެލޯނާ އަށް ފަހުން ދެން ދެ އަަހަރު ސުއަރޭޒް ފެނުނީ އެތުލެޓިކޯ މެޑްރިޑުންނެެވެ. އެތުލެޓިކޯގައި ވެސް ސުއަރޭޒް ވަނީ ފުރަތަމަ ސީޒަނުގައި މޮޅަށް ކުޅެ، ސްޕެނިޝް ލީގު އެ ޓީމަށް ހޯދައިދޭން މޮޅު ކުޅުމެއް ދައްކައިފަ އެވެ. ފަހު އަހަރު އަނިޔާއާ ހެދި ފޯމަށް އަސަރުކުރުކޮށް، އެތުލެޓިކޯ އިން ނިންމީ ސުއަރޭޒް ދޫކޮށްލާށެވެ.
